ပ္ဍဲပွိုင်ဍုင်ရေဝ် (သၟဝ်ကျာ) ဂှ် မွဲကာလဏံ ကံင်ဇြဳပၞာန်တံ ဗက်ရပ်မံင်သၟတ်တံ နွံဗွဲမဂၠိုင်တုဲ ကော်ဏာကဵုသ္ပကောန်ပၞာန် (ဗၟာ) ဟာဂှ် ညးမဒှ်မိမသၟတ်တအ် ဖေက်လကိုတ်ဒှ်မံင် ဂဝိင်အိုတ်ရောင် ညးဒေသရေဝ်သၟဝ်ကျာမွဲတၠ ဟီုလဴထ္ၜးရ။

ဗွဲကြဴနူကဵု ဂကောံပၠန်ဂတးမန် ၄ ဒပ်တံ ပံင်ကောံတုဲ ဒက်ပတန်ဏာ “ကရောင်ပၞာန်ပံင်တောဲရာမည” တုဲဂှ် ဒဒှ်ရ ဂကောံပၠန်ဂတးမန်တံ သွက်ဂွံသၠုင်ပတိုန်အသိင်ပေါဲပၞာန် ပ္ဍဲဒေသတိဍာ်ဍုင်မန်ရောင်ဂှ် အခါတ်အကာဲဒးရ။

ပ္ဍဲဒေသရးကီု ဒေသတိဍာ်ကောန်ဂကူဂမၠိုင်တံကီု ဒေသမုက်ပၞာန်သၠဲလးတိုန်ဒၟံင်ဂှ်တုဲ ပေါဲရုဲမာဲကံင်ဇြဳပၞာန် မချပ်ဇန်လဝ်ဂှ် ဂွံဒှ်ကၠောန်ဟွံလောဲရောင် သၟာပရေင်ဍုင်ကွာန်မန်လ္ရဵု သ္ၚဳဂၠိပ်ရ။

သၞာံ ၂၀၂၅ ဂိတုဖေဖဝ်ဝါရဳ ၁ ဏံမ္ဂး ဒပ်ပၞာန်မေန်အံင်လှာင်တံ သီအဝဵုပေင်ကၠုင် ၄ သၞာံရ။ ဒပ်ပၞာန်မေန်အံင်လှာင်တံ လလောင်တြး အကာဲအရာကာတၟေင်တုဲ မွဲသၞာံမွဲဝါ၊ ကြဴနူဂှ် တြဴဂိတု မွဲဝါ တြဴဂိတုဂှ် တြဴဝါ ဆက်အာယုက်တုဲ အုပ်ဓုပ်ကၠုင်လဝ် ဍုင်ဗၟာ နနဲအဓမ္မရ။

သၞာံတုဲကၠုၚ်တေံ ကံင်ဇြဳပၞာန်မသီလဝ်အဝဵုတံ ပတိတ်ကၠုင်လဝ် သၞောဝ်ဥပဒေညးဍုင်ကွာန် ဒးယိုက်ဂၠေင်ပၞာန်တုဲ ပ္ဍဲစၟတ်တ္ၚဲဂျာန်နဝါရဳ ၂၃ ဂှ် ထပ်ပ္တိတ်ကၠုင် ဥပဒေလၟေင်ကမၠောန် (နည်းဥပဒေ) ပၠန်ရ။

သွက်ဂွံဂလိုင်ပ္တိုန်လၟိဟ်မၞိဟ် ညးမလုပ်ယိုက်ဝန်ပၞာန် အတိုင်သၞောဝ်ဥပဒေ လုပ်ယိုက်ဝန်ပၞာန် (ပြည်သူ့စစ်မှုထမ်းဥပဒေ) မာန်ဂှ် နူကဵုညးစၞးဗော်ပရေင်ဍုင်ကွာန်တအ် ကဵုလဝ်ကသပ်နွံရောင် တ္ရဲဏအ် (ဂျာန္နဝါရဳ ၂၅) ဂှ် ကံင်ဇြဳပၞာန်တအ် ချူဓမံက်ကၠုင် ပ္ဍဲမုက်လိက်ပရိုင်ညးတအ် (မျာန်မာအလေန် စတမ်တအ်) ရ။

ဆေင်ပုင်အလုံတွဵုရးဍုင်မန်မွဲဂှ်ကွဳစက်အာတရဴဇမ္ၚောဲ ညးဇူဒီုတိက်ဗတမ်တံ လုပ်ဇူဒီုမ္ဂး ဒးပလံင်စရင်တေင်ကၟုဲရောင် ဌာနမဆေင်စပ်တံ ကဵုကၠုင်စၞောန်တုဲ ဆေင်ပုင်ဗွဲမဂၠိုင် ရဲအာတရဴဇမ္ၚောဲတံ ဟွံဂံင်တိက်ဇူဂှ်ရ ဟွံဂွံသွံဖျာအိုတ်ရောင် တၠဆေင်သွံပုင်တံ ဟီုလဴထ္ၜးရ။

တ္ရဲဏအ် (ဂျာန္နဝါရဳ ၂၃) ဖါနူဂယး အခိင်ၜိုတ် ၈ နာဍဳပြင်င်ဂှ် အကြာဒပ်ပၠန်ဂတးတအ်ကဵု ဒပ်ကင်ပၞာန်ဗမာ ခလရ – ၃၁ မၞုံဍုင်ခေါဇာတအ် ဒှ်ပေါဲဗ္တိုက်ဆေင်မုက်ညးသ္ကအ် ဗၞတ်မွဲချိုန်ခဏရောင် ဂွံတီကေတ်ရ။

ပ္ဍဲဒေသဍုင်မန်ဂှ် ပွိုင်ဍုင်ဗွဲမဂၠိုင် ဒပ်ပၞာန်ဗၟာတံ ထပက်ကၠုင်ပၞာန် နကဵုကရောင်ပၞာန်တုဲ သၟတ်ဂမၠိုင်တံ ဒှ်ဂဝိင် ဖေက်ဒးဒုင်ရပ်တံင် သ္ပကောန်ပၞာန်ဂှ်ရ ဂြိပ်ပါဲတိတ်နူကွာန်နွံဗွဲမဂၠိုင်ရောင် မိမသၟတ်ဒေသရေဝ်သၟဝ်ကျာမွဲတၠ ဟီု လဴထ္ၜးရ။

တ္ရဲကောန်ဂကူမန် မရနုက်ကဵု ၇၈ ဝါ အလုံပွိုင်ဍုင်ရေဝ်ဂှ် ပ္ဍဲသၞာံဏံ ကၠောန်အာပ္ဍဲဌာနဇြပ်သ္ဘင်ဓရ်မန် လ္တူဍုင်ရေဝ်ဏောင် ဂွံတီကေတ်ရ။