အခိၚ်ကာစန်ဒက်မာဲဏံ ကာတ်ကောန်ဍုၚ်ဂှ် လီုကီုဒှ် ယဝ်ကၠောန်တၟိကီုဒှ် ဟွံဒးကဵုၚုဟ်မးမွဲသာ် အခေါၚ်ကၠောန်/ပဠေဝ် နွံပေၚ်ပေၚ်ရောၚ် အလံၚ်အမာတ်လ္ၚဵုတအ် ဟီုလဝ်ကီုလေဝ် နူရုၚ် (လဝက) တအ် ကေတ်မံၚ်ၚုဟ်အတိုၚ်တြေံရရောၚ် ညးအာကၠောန် ကာဒ်ကောန်ဍုၚ် နူသကုတ်သၠုၚ်ကျာ ပွိုၚ်ဍုၚ်မုဟ်ဍုၚ်မွဲတၠ ဟီုရ။

ရုၚ်စက်ဆုထ္ၜိုတ်တအ် ဟိုတ်နူဒးကဵုအကံက်ဂၠိုၚ်တုဲ ဆုထ္ၜိုတ်ဂှ် ၚုဟ်ယအ်စှ်ေအာ မွဲတာန် မွဲကိုဋ်ပြၚ်မံၚ်ရောၚ် ရဲကုတ်ထဗိုၚ်ဆုထ္ၜိုတ်တအ် ဟီုရ။

အလံၚ်အမာတ်လုပ်ပြိုၚ်ပေါဲရုဲမာဲ ပွိုၚ်ဍုၚ်ရေဝ်ဂမၠိုၚ်ဂှ် ဟိုတ်နူဒှ်ဂဝိၚ်ကဵု ပရေၚ်ဂီုကၠီုတုဲ ဒးစန်ဒက်မံၚ်မာဲ နူဌာန်ဇမ္ၚောဲရောၚ် ညးလုက်စုက်ကဵု အလံၚ်အမာတ်မန်မွဲတၠ ဟီုရ။

ထ္ၜိုတ်ဂတှ်ေအဆံၚ်သၠုၚ် မုက်ဂၞန် (၁) ဂှ် ပရဲပရၚ်ဂၠိုၚ်ကီုလေဝ် ဟိုတ်နဒူးပ္တိတ်တမ်ရိုဟ်ဂၠိုၚ်လောန်ဂှ်တုဲ တၠကၠအ်ထ္ၜိုတ်တအ် ကၠောန်ပ္တိတ်ဟွံမာန်ဏီရောၚ် တၠကၠအ်ထ္ၜိုတ်မွဲတၠ ဟီုရ။

ညးဍုၚ်ကွာန်တအ် ဒှ်ဒၟံၚ်ဒဒိုက် ကိစ္စဒးကေတ်တာလျိုၚ်ယိုက်ဂၠေၚ်ပၞာန်ဂှ် အခိၚ်စန်ဒက်မာဲဏံ အလံၚ်အမာတ်စန်ဒက်မာဲဂမၠိုၚ်တအ် ဟွံဟီုဓမံက်ပ္တိတ်မွဲသာ်ရောၚ် ညးလ္ၚတ်အခါတ်အကာဲမံၚ် စပ်ကဵုပေါဲရုဲမာဲဍုၚ်မန်မွဲတၠ ဟီုရ။

ကိစ္စလိုၚ်လပှ်ကျာ သဵုယှေဝ်မဳဒဳယာ Social media ဟွံညိၚ်မံၚ်တ္ၚဲဏံဂှ် ကမ္မယှေန်ပၞာန်တအ် စမ်ၜတ်မံၚ် သွက်ဂွံကၟာတ်ကၠေံ ဝဳပဳအေန် VPN ဖအိုတ်နွံရောၚ် တၠကွတ်သွာၚ်အာၚ်တဳ ဆက်စပ်မံၚ်ကဵု ကမ္မယှေန်ပၞာန် ပ္ဍဲဍုၚ်မန်မွဲတၠ ဟီုထ္ၜးရ။

လ္ပာ်ဂကောံပၠန်ဂတးတအ်ကီု လ္ပာ်ကမ္မယှေန်ပၞာန်တအ်ကီု ဗက်ဆဵုဂဗဒၟံၚ်ကဵု ဂကောံနာနာတအ်တုဲ လ္ပာ်ညး လ္ပာ်အဲ ဟီုတွံပြိုၚ်ကဵုဒၟံၚ်ဇြဟတ်ဓရိုဟ် ကုညးဍုၚ်ကွာန်တအ်နွံရောၚ် ညးဒေသတအ်ဟီုရ။

နူကဵုညးဍုၚ်ကွာန်တအ် မုချူ မုဟီုဂး လတူသဵုယှေဝ်မဳဒဳယာ Social media ဂှ် နကဵုကမ္မယှေန်ပၞာန်တအ် မၚ်ရံၚ်မံၚ် ပွိုၚ် (၂၄) နာဍဳနွံတုဲ ပွမချူဟီုဂး လတူလပှ်ကျာဂှ် ဒးစွံသတိထေက်ရောၚ် တၠကွတ်အ္စာကဵုမံၚ်တန်ဗ္တောန် ကွတ်အာၚ်တဳ (Information Technology- IT) လတူဍုၚ်မတ်မလီုမွဲတၠ ဟီုကဵုသတိရ။

တိုက်ဩန်ဗေန်ဂမၠိုၚ်တအ် ဟွံပ္တိတ်ကဵုဩန်ဂၠိုၚ်ဂၠိုၚ်တုဲ တၠကမၠောန်ကၠောန်ပရေၚ်ပိုန်ဒြပ် ဇၞော်ဇၞော်တအ် ဒှ်မံၚ်ခက်ခုဲကဵု ကမၠောန်နွံရောၚ် တၠကမၠောန်ဆေၚ်ထဝ် ဍုၚ်မတ်မလီုမွဲတၠ ဟီုရ။

နဲကဵုမာဲ နကဵုစက်အဳလေက်ထရဝ်နေစ် (အီလက်ထရောနစ်မဲစနစ်) Electronic Voting Machine (EVM) ဂှ် ကၠောန်ပ္တိတ်လဝ် သွက်ဂွံထ္ၜးဗီုပြၚ်စုတ်မာဲ ကုညးဍုၚ်ကွာန်တအ် ဟွံမွဲတုဲ အလံၚ်အမာတ်တအ် ဒးကၠောန်ပ္တိတ်ထ္ၜး ဗီုပြၚ်နကဵုတၞးစက္ခူရောၚ် ညးဍုၚ်ကွာန်တိုန်စိုပ်လဝ် ပေါဲသောၚ်ကလး နဲစုတ်မာဲ နူအလံၚ်အမာတ်မန်မွဲတၠ ဟီုရ။