ဩန်ကၟိန်ဍုၚ်ဗၟာဂှ် ၜိုန်ရၚုဟ်မးသဝ်အောန်စှေ်ကီုလေဝ် ကၠောန်ဩန်ဝါတ်တိုန်တုဲ ပ္ဍဲအရာဗက်ဩန်ဒါန် သွက်တ္ၚဲကောန်ဂကူမန် သၞာံဏံဂှ် ဝါတ်တဴဗွဲမလောန်ရောၚ် ကမ္မတဳကၠောန်ဗဒှ်မွဲတၠ ဟီုထ္ၜးရ။

မုဟိုတ်ဂွံဒှ်ပေါဲရုဲမာဲပတောံရောမ္ဂး ဟိုတ်ဂှ်နွံတဴဗွဲမဂၠိုင်ရ။ ပၞောဝ်ကဵုဟိုတ်ဂမၠိုင်ဂှ် ကာလဏအ် ကြပ်အလုံမွဲဍုင် ဒှ်ဒၟံင်ပေါဲပၞာန်ရ။ နကဵုအလဵုညးမကၠောန်ဗဒှ်ကဵုပေါဲရုဲမာဲ ကဝ်မယှေန်ပၞာန်တအ် ထောံဗမ်နကဵုယာန်ကျာ ဂစိုတ်မံင်ညးဍုင်ကွာန်ဂှ် ကၠောန်အာပေါဲရုဲမာဲမ္ဂး ဂွံဒှ်ပေါဲရုဲမာဲတပ်တး ဓဝ်ယာဂှ် ဒှ်မာန်ဟွံသေင်ရ။ မွဲတင်ပၠန်ဂှ် ဗော်ပရေင်ဍုင်ကွာန်ဇၞော်ဇၞော် ဗီုကဵုဗော်အေန်အေလ်ဒဳတအ်ကီု ဗော်တၞဟ်ဟ်တအ်ကီု ရိုဟ်ပလီုကၠေံတုဲ ရပ်ထိင်ကၠေံက္ဍိုပ်သကိုပ် သၟာပရေင်ဍုင်ကွာန် ညးဍုင်ကွာန်ထံက်ဂလာန်တအ် ဟွံကဵုလုပ်ပေါဲရုဲမာဲရ။ ပွမကၠောန်ပေါဲရုဲမာဲသာ်ဏအ်ဂှ် ဒှ်အာပေါဲရုဲမာဲ မၞုံကဵုဗၞတ်ဗ္ၜတ်တုဲ ဟွံဒှ်ပေါဲရုဲမာဲ ဗၠးဗၠးၜးၜးမွဲရ။

ခြာဟွံလအ် စၟတ်တ္ၚဲ (၂၈) ဏံမ္ဂး စိုပ်ကၠုၚ်တ္ၚဲသၟတ်မန် အလန်စုဒ္ဒက (၁၄) ဝါပၠန်ရ။ တ္ၚဲသၟတ်မန်ဝွံ နူကၠာပၞာန်ဟွံဂွံသီအဝဵုတေံဟီုမ္ဂး သၟတ်ဗွိုၚ်ဇဳ မပ္တံကဵု သၟတ်ဗော်ရပ်လွဟ်၊ သၟတ်ဗော်ပ္ဍဲဍုၚ်၊ ဗွိုၚ်နူဂကောံနာနာ ပံၚ်ကောံတုဲ ပလေဝ်ပလေဝ်ကၠုၚ် သွက်တ္ၚဲသၟတ်မန် ရ။

တ္ၚဲအ္စာကဝိမန် မရနုက်ကဵု (၁၀) ဝါဏံဂှ် ကၠောန်ဗဒှ် ပ္ဍဲဍုၚ်ကၟာဝက်ရောၚ်တုဲ နူတနေံဏံ ဂိတုပုဟ် (၄) မံက်၊ ဒဳဇြေန်ဗာ (၂၂) ဂှ်  ဂကောံအ္စာကၞေဟ်မန် သ္ပကောံဓရီု (လၟေၚ် ၃) ပ္ဍဲဘာဗ္ဂောသၟဝ် ဍုၚ်မတ်မလီုတုဲ ဖျေံဏာပရေၚ်ကမၠောန်နွံရ။

ရဲကုတ်ဓဗိုၚ်ဆုထ္ၜိုတ်တအ် ဒးဒုၚ်အကံက်ကဵု ဂကောံရပ်လွဟ်ဂမၠိုၚ်တအ် ဂၠိုၚ်လောန်ဂှ်တုဲ ရဲကုတ်ဓဗိုၚ်ဆုလ္ၚဵုတအ် ဒးဒေါံဇူကမၠောန်နွံရောၚ် ညးမကုတ်မံၚ်ဆု ဒေသရေဝ်မွဲတၠ ဟီုရ။

ပ္ဍဲတွဵုရးချေၚ် ဒေသပလေက်ဝ ဗီုကဵုကၟာတ်တာဒၞာသၟတ်တအ် အခေါၚ်တိတ်မ္ၚးဒေသဂှ် ပ္ဍဲဒေသမန်လေဝ် ခြာဟွံလအ် သွက်ဂွံစအာနွံရောၚ်ဂှ် သ္ကိုပ်ဗိုလ်နူဒပ်မန်ရာမညမွဲတၠ ချူဓမံက်လဝ် လတူမုက်လိက်ပရေၚ်မၞိဟ်နွံရ။

နူကဵုတိုက်ဩန်တအ် ဗပဵုကဵုအိက်ဩန်လေဝ် မၞိဟ်ပၠောပ်ဩန်ဂိုၚ်စွံပ္ဍဲတိုက်ဩန် အောန်စှ်ေကၠုၚ်မံၚ်ရောၚ် တၠကမၠောန်ဆေၚ်ဓမာတ်ထဝ် ပံက်လဝ်ရုၚ်ကမၠောန် လတူဍုၚ်မတ်မလီုမွဲတၠ ဟီုလဴထ္ၜးရ။

ပ္ဍဲကဵုပေါဲရုဲမာဲ နူကဵုဒပ်ပၞာန်ဗၟာသီအဝဵုတအ် မက္ဍိုက်ပ်ကၠောန်ဗဒှ်အာ ပ္ဍဲသၞာံ ၂၀၂၅ ဏအ်ဂှ် ညးစၞးကၠတ်ထဝ်ဗၞတ်ၜိုတ် ၁၀ တၠ ဂွံဒုင်ရုဲစှ်မာန်ရောင် ညးစၞးအလံင်မာတ်မန်လ္ရဵု တော်ခယျကေတ်လဝ် နွံရ။

ၚုဟ်ထဝ်ဂှ် ထပက်တိုန်မံၚ်သိုက်သိုက်တုဲ ၚုဟ်တိကၠအ်ဂအာၚ်သ္ၚိကီု၊ ၚုဟ်ကွဳစက်ကာကီု ဗက်တိုန်အာၚုဟ်ထဝ် ဖအိုတ်ရောၚ် ရဲသွံရာန်တအ် ဟီုရ။

ဗွဲကြဴနူကဵု သ္ကိုပ်အုပ်ဓုပ်ကွာန် နာင်သၠုင် ကဵု ဂကောံမွဲတၠ ဒးဒုင်ပန်ဂစိုတ်ဏာ ပ္ဍဲဒဒှ်ပွိုင်ဍုင်မုဟ်ဍုင်တုဲကၠုင် ဒဳဇြေမ်ဗာ (၇)တုဲကၠုင်ဏံတုဲဂှ် ရမျှာင်ကဵုဒြဟတ်ဓရိုဟ်ဒစဵုဒစး ပွမဂစိုတ်ဂယိုင် သ္ကိုပ်အုပ်ဓုပ်ကွာန်ဒေသမန်ဂှ် ထတ်သ္ကာတ်ကၠုင် ရ။