ပၞော်ကျာ
တ္ၚဲကောန်ဂကူထဝဲါ မရနုက်ကဵု (၄) ဝါဂှ် ကၠောန်ဗဒှ် ပ္ဍဲကဵုဗဒိုပ်ညးဒှ်ဒဒိုက် ၜါန်တုန်ယာန် ဒေသပယျဵုသေံကဵု ဗၟာ ပ္ဍဲစၟတ်တ္ၚဲ ဂျောန် ၂ နူဂယး ၈ နာဍဳဂှ်ရ။
ညးတိုန်စိုပ်ပ္ဍဲအခန်ကၞာတံဗွဲဂမၠိုၚ်တံဂှ် ကောန်ဂကူထဝဲါတံမဒှ်တုဲ ကောန်ဂကူကရေၚ် ကေုာံ မန်တံတိုန်စိုပ်ကီု အပံၚ်ဖအိုတ်မၞိဟ်ၜိုတ် ၂၀၀ တၠ တိုန်စိုပ်ရ။
ပ္ဍဲသ္ဘၚ်ကၞာဂှ် နကဵုဓရ်ပတှေ်ပေၚ်ပေၚ် အရေဝ်၊ ဘာသာ၊ လိက်ပတ်ဇကု ညံၚ်ဂွံတန်တဴအာ ဍာ်ဇမၠိၚ်မာန် ဆက်ဂစာန်အာအိုတ်တုဲ စဵုကဵု အခေါၚ်အရာကောန်ဂကူ အလဵုဇကု ဇကုဖန်ဖက်ကေတ်ကေတ်ဂွံ ဆက်ဂစာန်အာရောၚ်ဂှ် ညးလျိုၚ်သ္ဘၚ်ကၞာ အခေါၚ်ဟီုဂး နာဲထောန်လောန်ဥူ ဟီုဏာ ပ္ဍဲကဵုအသေအဟာန်ဂှ်ရ။
နာဲထောန်လောန်ဥူ ဟီုဏာဂှ် “ကောန်ဂကူထဝဲါဟီုဂှ် ဂကူမွဲဂကူကီုရောၚ် နွံကၠုၚ်သီုကဵုဝၚ်ဏောၚ် လ္ၚဵုတှေ် ဇကုဂှ် ဂကူလဵုရောလေဝ် စၟတ်သမ္တီလဝ်ဟွံမွဲပုဟ် အရေဝ်ဂကူဇကု ဒးဟီုဂှ်လေဝ် ဂွတုဲဖေက်မံၚ်အိုတ်ရ ကဵုဇြိုဟ်နက် ပရေၚ်ကောန်ဂကူဇကုညိ လအ်တှေ် ဒှ်အာ ဗီုဂကူဗျူတံအိုတ်ဏောၚ်” ဂှ် ညးကဵုသတိ ဟီုဏာကဵု ညးမတိုန်စိုပ်တံရ။
သွက်ဂွံ ဒတူဒလိုၚ်အာ နကဵုဂကူမွဲဂကူမာန်ဂှ် ကၠာအိုတ် ညးတံ စဒက်ကၠုၚ်ဂကောံချဳဒရာၚ် ပ္ဍဲအရပ် ဍောတ်ဍောတ်မွဲကၠာရ။ လက္ကရဴ ဒှ်တိုန်ဂကောံ ဖေါအ်ဗြေဝ်မၞိဟ်မွဲမွဲတုဲ တ္ၚဲကောန်ဂကူထဝဲါဂှ် နူဂကောံဏံ ဖျေံဗီု စဒက်ပတိုန် ထမံက်ရုပ်ရဴကၠာအိုတ်ရ။ လၟုဟ်မ္ဂး စိုပ်ကၠုၚ် တ္ၚဲကောန်ဂကူထဝဲါ မရနုက်ကဵု (၄) ဝါရ။
ညးတာလျိုၚ် ဂကောံဖေါအ်ဗြေဝ် ကောန်ဂကူထဝဲါ နာဲထောန်လောန်ဥူဟီုဂှ် “စနူသၞာံ ၂၀၀၅-၂၀၀၆ တေံ စဒက်ကၠုၚ်ဂကောံရ လက္ကရဴဒှ်တိုန် ဗီုပြၚ်ဂကောံချိုတ်တ်ပၠိုတ်တ်ရဏောၚ် သွက်ဂွံသ္ပစၞး ကောန်ဂကူထဝဲါတံ တ္ၚဲလဵု ဒှ်တ္ၚဲကောန်ဂကူထဝဲါထေက်ရော စရုဲစှ်ကၠုၚ်ဂှ် ပိုဲတံ စစၟတ်ကၠုၚ် တ္ၚဲကောန်ဂကူထဝဲါ သကိုပ်ဗိုလ်ဗထူ ပြဟ်လလုဲအာ ပ္ဍဲတွဵုရး အံၚ်လာန် စၟတ်တ္ၚဲ ဂျောန် ၂ ဂှ် နဒးဒှ် တ္ၚဲကောန်ဂကူထဝဲါမွဲတ္ၚဲ ဖျေံကၠုၚ် သကုတ်သွာတ်တုဲ ဒှ်တ္ၚဲဏံရ” ဏောၚ်ဂှ် ညးလဴကဵုဝၚ် ဗီုလဵုတ္ၚဲကောန်ဂကူထဝဲါ စဒှ်ကၠုၚ်ဂှ်ရ။
စကၠောန်ကၠုၚ်လဝ် ပ္ဍဲကဵုသၞာံ ၂၀၀၇၊ ဂိတုဂျောန် ၂ တုဲ လၟုဟ်တှေ် ကၠောန်ဗဒှ် အံၚ်ဇၞးပေၚ်စိုပ်ကၠုၚ် (၄) ဝါရ။
အခန်ကၞာသၞာံဏံဂှ် ဂွံဇြဟတ်ဂၠိုၚ် နူသၞာံလောန်ကၠုၚ်တေံတေံဏီရ မုဟိုတ်ရောတှေ် သၞာံတုဲကၠုၚ်တေံဂှ် ကောန်ဂကူပိုဲတံ ပရေၚ်ဆက်စၠောံ ဂကောံမွဲကဵုမွဲ အောန်မံၚ်တုဲ ကၠောန်မာန်ၜိုတ်ညိညဓရ်ရ။ ပ္ဍဲသၞာံ (၂၀၁၀) ဏံဂှ် ဂွံကၠုၚ်အဆက် ကောန်ဂကူထဝဲါ စိုပ်မံၚ်ဍုၚ်သၟာၚ်တံတုဲ ကၠောန်မာန်ကၠုၚ် ဗွဲမကတိုၚ်ၚ်တၟဟ်ဟ်ရဏောၚ် ညးလဴရ။
ပ္ဍဲကဵု တ္ၚဲကောန်ဂကူထဝဲါ သၟတ်ဗြဴပါလုပ် ပရေၚ်ချဳဓရာၚ်မွဲတၠဂှ်လေဝ် “တ္ၚဲကောန်ဂကူထဝဲါ ဂွံဒှ်အာဗီုဏံဂှ် မိပ်စိုတ်ကွေံကွေံရ၊ မုဒှ်ရောတှေ် ပ္ဍဲဂကောံ ကောန်ဂကူထဝဲါ ကဵုထဝဲါ သၟတ်ဗြဴ ဗီုဗီုပိုဲတံ ပါလုပ် ချဳဓရာၚ်ကၠုၚ်မာန်ကီုဂှ် ဂွံဇြဟတ်ကွေံရ။ သၞာံဂတဏံပၠန်တှေ် ပဵုတုဲ မၞိဟ်ဂွံဂၠိုၚ်တိုန် ခိုဟ်တိုန်ပၠန်ဂှ်လေဝ် နကဵု တာလျိုၚ်သၟတ်မွဲတၠ ၜိုတ်ဂစာန်မာန် ဆက်ပါလုပ်ချဳဓရာၚ်အာပၠန်ရောၚ်” ဂှ် ညးလဴထ္ၜးပရေၚ် ဒုၚ်စသိုၚ်ရ။