နာဲမာန်
ကြဴနူ ကွဳလိုန်ဓါတ် အ္စာပါမောက္ခ (Law) ကၠေံအာဂှ်တုဲ ကွးဘာတက္ကသိုလ်မတ်မလီုတအ် အခိၚ် တိုန်ဘာဂှ် ယဝ်ဟွံကွက်လဝ်ကာဒ်ပ္ဍဲကအ်မ္ဂး ဟွံဂွံအခေါၚ်လုပ်ပါၚ်တြၚ်ဘာရောၚ် ကွးဘာမန်မွဲတၠ ဟီုလဴ ထ္ၜးကဵုရ။
ကွးဘာတက္ကသိုလ်မတ်မလီုဝွံ တုဲတုဲကၠုၚ်တေံ ကၠောန်ပ္တိတ်ကဵုကာဒ်ကွးဘာနွံကၠုၚ်ကီုလေဝ် ဟွံ ဒးကွက်လဝ်ပ္ဍဲကအ်လၟိုန်ရ။ လၟုဟ်မ္ဂး လုပ်ပါၚ်ဘာဂှ် ညးလျိုၚ်မၚ်ပါၚ်ဘာတအ် စၟဳစၟတ်ဒၟံၚ်ညးကာဒ်ဟွံမွဲဂှ် ဟွံကဵုအခေါၚ်လုပ်ပါၚ်ဘာရ။
“စိုပ်ပ္ဍဲအခန်ဘာလေဝ် ယဝ်ဟွံကွက်လဝ်ကာဒ်တှေ် အစာတအ်ဟီု ကမၠတ်၊ တုဲတှေ် သီုကဵုတပ်ဒဏ် (၅၀၀) ဏောဝ်” သာ်ဏံ ကွးဘာချဳဒရာၚ်ဒၟံၚ်ပရေၚ် ဂကောံမွဲတၠ ဟီုရ။
ပ္ဍဲဗွိုၚ်ဘာတက္ကသိုလ်ဂှ်ဝွံ ကွဳလိုန်ဓါတ်ကွးဘာတအ် ကၠေံဒၟံၚ်မွဲဏှေအ်မွဲဏှေအ်ကီုလေဝ် ပရေၚ် ကရေပ်ဓရတ်ကွးဘာတအ်ကီု စၟဳစၟတ်ကွးဘာတအ်ကီု မွဲအလန်လေဝ် ကေၚ်သ္ပလဝ်ဟွံမွဲရ။
“စိုတ်အဲတှေ် ဒၟာနူကဵု စုက်ကၠုၚ်ပေဲါရုဲမာဲ (၂၀၁၀) တုဲတှေ် မၚ်ရံၚ်ကွးဘာတအ်ဒှ်မာန်ဏောဝ်၊ မုပ ရောဟီုတှေ် လၟုဟ်ပ္ဍဲဗဒမ် (အဆောၚ်) ဟလိုၚ်တအ်လေဝ် ပရေၚ်စၟဳစၟတ်တေၚ်ကၠုၚ်မံၚ်ကီုဏောဝ်” သာ်ဏံ သ္ကိုပ်ကွးဘာ ညးမချဳဒရာၚ်ဒၟံၚ်ပရေၚ်ဂကောံမွဲတၠဂှ် ဟီုရ။
ပရေၚ်ကွးဘာတအ်ဒးဒုၚ်မၚ်ရံၚ်ဂှ် ပ္ဍဲဗဒမ် (အဆောၚ်) ကွးဘာတအ်မံၚ်လေဝ် ညးတၠဗဒမ်တအ် ဒးဒုၚ်ဝန်ထ္ပက်စၟတ်တဲ “နကဵုသၞောဝ်စေဝ်ပၞောန် ဗဒမ်ဒးဒၟံၚ်ရောၚ်” ဂှ်လေဝ် တေၚ်ကၠုၚ်ဒၟံၚ်ရ။
“ကၠာတဲ တၞးလိက်ဒးဒုၚ်ဝန် ထ္ပက်စၟတ်တဲ (အဆောၚ်မှ သတ်မှတ်စည်းကမ်းချက်များအတိုၚ်း နေ ထိုၚ်ပါမည်ဖြစ်ကြောၚ်း) ဂှ် ဒးထ္ပက်စၟတ်တဲ ပိတၞးကၠာလေဝ် လၟုဟ်မ္ဂး ဒးထ္ပက်(၇) တၞး၊ ဒးပလံၚ် (၇) ဌာနဏောဝ်” သာ်ဏံ ညးတၠဗဒမ်မွဲတၠ လဴကဵု ပရေၚ်ကွးဘာတအ် ဒးဒုၚ်မၚ်ရံၚ်ပဵုကၠုၚ်ဂှ်ရ။
စပ်ကဵုပရေၚ်လိက်ညးတၠဗဒမ်တအ် ဒးဒုၚ်ဝန် ထ္ပက်စၟတ်တဲတၞးကၠာတဲဂှ် ပ္ဍဲရုၚ် (မရက)၊ (ဒပ်ရး အဂၞဲ)၊ (ဒပ်ဗၠာဲသၟိၚ်) ပိဌာနဂှ် ဒးပလံၚ်ကၠာလေဝ် လၟုဟ်မ္ဂး စနူကဵုဒပ်ထံၚ်ပရိုၚ် (စရဖ)၊ (sp) ဂကောံ ဒပ်ဗၠာဲသၟိၚ်တၟေၚ်၊ ဌာနကိစ္စဇၞော်ဇၞော်တၞဟ်ဟ်တအ်လေဝ် ဒးပလံၚ်ဗစိုပ်ကီုရောၚ် ညးတၠဗဒမ်တအ် ဟီုရ။
ဝၚ်ဂကောံကွးဘာတက္ကသိုလ်တအ်ကဵု ပရေၚ်ဍုၚ်ကွာန်ပ္ဍဲဍုၚ်မန်ဗၟာဂှ် ဆက်စပ်ကၠုၚ်ဒၟံၚ်အဆက် အဆက်နွံတုဲ ပရေၚ်ကွးဘာတက္ကသိုလ်တအ် ဒးဒုၚ်မၚ်ရံၚ်ဂှ် အကာဲအရာတၟေၚ်ကၠုၚ်မ္ဂး ပရေၚ်ကရေပ်ဓ ရတ်ကွးဘာ ပရေၚ်ကွးဘာတအ်ဒးဒုၚ်မၚ်ရံၚ်ဂှ် အခိၚ်အကာဲအရာပရေၚ်ဍုၚ်ကွာန်တၟေၚ်ကၠုၚ်မ္ဂး လၟိုန်ဒှ်ကၠုၚ် ဒၟံၚ်နွံရ။