ပ္ဍဲကဵုပေဲါရုဲမာဲ ၂၀၁၀ ဂိတုနဝ်ဝေမ်ပါဝွံ အလုံဂကူမန် ညးမၞံုကဵုအခေါၚ်အရာကဵုမာဲတအ် ထ္ၜးကၠုၚ်လညာတ် “ကျခိုၚ်ရေဝ်” (ပြည်ထောၚ်စုကြံ့ခိုၚ်ရေးနှၚ့် ဖွံ႕ဖြိုးရေပါတီ) တအ် ဟွံလီဠာန်ထောံမ္ဂး မာဲဗွဲမဂၠိုၚ်ဂှ် နွံဒၟံၚ်ပ္ဍဲကဵုဗော်ဒဳမဝ်ကရေဇြဳအလုံရးမန်တုဲ ဗော်ဒဳမဝ်ကရေဇြဳအလုံရးမန်ဂှ် သွက်ဂွံဇၞးအာအမာတ် ဗွဲမဂၠိုၚ် နွံရောၚ်။
မုဟိုတ်ညးဍုၚ်ကွာန်ဂကူမန်တအ် ထ္ၜးကၠုၚ်ဆန္ဒညးတအ်သာ်ဏံရော၊ လ္တူဆန္ဒဂကူမန် ပ္ဍဲတွဵုရးဍုၚ်မန်ဂှ် နူကဵုအလဵုအသဳ သွက်ဂွံဒက်ပ္တိုန်တၟိ ပ္ဍဲကဵုတွဵုရးဍုၚ်မန်ဂှ် ဗၞတ်ၜိုတ်လဵုဗပေၚ်ကဵုရော။
ဂကူမန်တအ်ဂှ် နွံကၠုၚ်ကဵုဝၚ် ကဵုကၠံလ္ၚီသၞာံ၊ လိက်ပတ်ဘာသာဗွဲမခိုၚ်ကၠိုက် ကေၚ်နွံကၠုၚ်၊ ကေၚ်ဒယှ်ပြထာကၠုၚ် ပ္ဍဲကဵုသ္ဂုတ်သၠုၚ်ကျာဗၟာပစ္စုပ္ပန်ဏအ်သၟးဟွံသေၚ် သီုကဵုတရးကၠုၚ် သာသနာလိက်ပတ်ကဵုဂကူဗၟာ ဂကူသေံ ပ္ဍဲရးဒိုဟ်အဂၞဲတိုက်အာယှဝွံတုဲ ကေၚ်ဒှ်ကၠုၚ်ဂကူဇၞော်မွဲရောၚ်ဂှ် ဂကူမန်တံ တီဝၚ်ညးတအ်ရ။ ဒၟာနူဝၚ်ဂကူမန်ပိုဲ နွံကၠုၚ်သာ်ဝွံတုဲ ခမဳသၚ်ကဵု ညးမဆာန်ဂကူမန်တံ ဂစာန်တုဲ ထိၚ်ဒဝ်ကၠုၚ်ဂကူ၊ ဘာသာ၊ သာသနာအိုတ်ရ။ ဆန္ဒဂကူမန်တအ် ကၠးဒၟံၚ်ရ။ ဟိုတ်ဂှ်ရ အလဵုအသဳတွဵုရးဍုၚ်မန်ဂှ် ယဝ်ရဗက်စဆန္ဒဂကူမန်တအ် ချိုတ်တ်ပၠိုတ်တ်မ္ဂး ပ္ဍဲအရာထိၚ်ဒဝ်ဂကူမန်တအ် ကၠောန်ၜိုတ်ဒၟံၚ်ပရေၚ်ထိၚ်ဒဝ်ဂကူ ဘာသာ သာသနာဂှ် ကၟာတ်လဒဵုဟွံထေက်၊ သီုကဵုဒးကဵုဒြဟတ်ရောၚ်။
ဂကူမန်တအ် ကၠောန်ၜိုတ်ကၠုၚ်မံၚ် ပရေၚ်လိက်ပတ်ယေန်သၞာၚ်ဟီုဂှ် ဂွိၚ်ဖေက်ဂကူမန်တအ် ကၠေံဗ္ဒန်အာ လ္တူဂၠးတိဝွံရောၚ်။ အလဵုအသဳတၠအဝဵုပၞာန်တုဲတုဲကၠုၚ်တေံဂှ် ကၟာတ်လဒဵုကၠုၚ် ပရေၚ်ဗ္တောန်လိက်မန် ပ္ဍဲကဵုဘာအလဵုအသဳကွာန်မန်ဂမၠိုၚ်၊ ပလီုပလာ်ကၠေံ သက်သဳဝၚ်မန်ဂမၠိုၚ်၊ ပထုဲပလာပ်ယေန်သၞာၚ်မန်ဂမၠိုၚ် နွံကၠုၚ်ရ။ အလဵုအသဳတွဵုရးဍုၚ်မန်ဂှ် ဟိုတ်နူဂကူမန်တအ် ရုဲစှ်ပတိုန်လဝ်တုဲ စပ်ကဵုကိစ္စဏအ်ဒးစဵုဒၞာ၊ ဒးမၚ်မွဲ၊ သီုကဵုဒးကဵုဒြဟတ်ရောၚ်။ ဟိုတ်ဂှ်ရ အလဵုအသဳတွဵုရးဍုၚ်မန်ဂှ် သွက်ဂွံဗတောန်လိက်မန် နွံကဵုဗဗွဲဓရ်ဂွံဒှ်မာန်ဂှ် အလဵုအသဳတွဵုရးဍုၚ်မန် ဒက်ပ္တန်တၟိဏအ် ထေက်ကဵုဒးဖန်ဗဒှ်ကဵု သၞောဝ်ဥပဒေရောၚ်။
ပ္ဍဲကဵုပေဲါရုဲမာဲအလန်ဏံမ္ဂး သၟာကမၠောန်ဂကူမန်မၞံုတန်တဴဒၟံၚ် ပ္ဍဲဍုၚ်သေံ ဂၠိုၚ်ကဵုကိုဋ်တအ် ဟွံဂွံအခေါၚ်ကဵုမာဲရ။ ယဝ်ရညးတအ် ဂွံအခေါၚ်မ္ဂး မာဲညးတအ်ဗွဲမဂၠိုၚ်ဂှ် သွက်ဂွံကဵုဏာမာဲ ကုဗော်ဒဳမဝ်ကရေဇြဳအလုံရးမန် ဒှ်မာန်ရ။ မုဟိုတ်ရော ဂကူမန်တံဂှ် ပ္ဍဲကဵုဍုၚ်ဇကု ကွာန်ဇကု မိက်ဂွံမံၚ်ၜိုဟ်ဟ်သြိုဟ်ဟ် မိက်ဂွံဂယိုၚ်လမျီု၊ ကၠောန်ၜိုတ်စ ၜိုဟ်ဟ်သြိုဟ်ဟ်ရဒှ်မာန်မ္ဂး ညးမွဲလေဝ် ဟွံမိက်သ္ပဍိက် ပ္ဍဲကဵုဍုၚ်ညးတၞဟ်တအ်ရ။ စပ်ကဵုကိစ္စပရေၚ်ပိုန်ဒြပ်ကီု၊ သၟာကမၠောန်ဒးတိတ်အာ ကၠောန်စဒၟံၚ် ပ္ဍဲကဵုဍုၚ်ဇိုၚ်ဝုတ်ဒိုဟ်ကီုဂှ် နူကဵုအလဵုအသဳတွဵုရးဍုၚ်မန်ဏအ် ထေက်ကဵုဒးရံၚ်စံၚ်အာ သွက်ဂွံဒှ်အာဂုဏ်ဖဵု အလုံဂကူမန်ထေက်ရောၚ်။
ပ္ဍဲကဵုဍုၚ်မန်ဝွံ သယံဇာတဇဳသာ်ဝါဗ္ၚ ကၠအ်သွဝ်တအ် နွံတဴဒၟံၚ်ဗွဲဗဂၠိုၚ်ရ။ ဆဂးပ္ဍဲကဵုဍုၚ်မန်ဂှ် ပရေၚ်ဖောအ်ဗြေဝ်ဍိုန်လျဒၟံၚ် နွံတၟာဂလိုၚ်ရောၚ်။ ကဆံၚ်အလံၚ်ဘဝမၞိဟ်ဂွံတဴတက်တိုန်ဟီုဂှ် တန်တဴလ္တူ ပရေၚ်ဖောအ်ဗြေဝ်ဗွဲမဂၠိုၚ် မပ္တံကဵုဂၠံၚ်ဍာန်အာကၠုၚ်၊ ပၟတ်ဍာ်တအ်ရောၚ်။ ပ္ဍဲတွဵုရးဍုၚ်မန် ဂၠံၚ်ဍာန်ခိုဟ်ဟ်တံ ဂွံနွံကၠုၚ်ကီု၊ သၟာဗ္ၚတအ် ဂွံနွံအခေါၚ်ပိုၚ်ပြဳတိ ညးဍုၚ်မန်တအ် ထေက်ကဵုဒးဖန်ကဵုရောၚ်။
မာဲတိတ်ကၠုၚ်နူကဵုဂၠံသြိုဟ် ညးဍုၚ်ကွာန်တအ်ဂှ် ပၟိက်ဇၞော်ကွေံရောၚ်။ ဆန္ဒညးတအ်ဂှ် နွံဒၟံၚ်ပ္ဍဲကဵု ဂတှေ်မာဲဂှ်ရောၚ်။ အလဵုအသဳတၟိဂှ် ယဝ်ရဟွံဗက်စဆန္ဒညးတအ်၊ ကၠောန်စသွက်ဂုဏ်ဖဵုဇကုသၟးမ္ဂး ဒစဵုဒစး ကုဆန္ဒညးဍုၚ်ကွာန်ဂမၠိုၚ်တုဲ ပရူညးတအ်ဂှ် ဟဳအာ အကြာဍာ်ပါၚ်ညးဍုၚ်ကွာန်မာန်ရောၚ် ပ္တိုန်ထ္ၜးဏာရ။