အလဵုအသဳ အမေရိကာန် အဝ်ပါမာ ဂှ် သွက်သ္ဂောံခါန်ကၞက် ညးစၞးတၟေၚ် စပ်ကဵုဍုၚ်ဗၟာဂှ် စဳဇန်မံၚ်ရ။ စပ်ကဵုပရေၚ်ဒဳမဝ်ကရေဇြဳ ဍုၚ်ဗၟာကီု၊ ပရေၚ်ကၟာတ်လဒဵု ပရေၚ်ပိုန်ဒြပ်ကီုဂှ် ရပ်စပ်အဓိကဏောၚ် ဒးတော်ဆကေတ်ရ။ စပ်ကဵုပရေၚ်ဝွံတုဲ နူဌာန်ပရိုၚ်ဗၠးၜးမန် မိကျေဝ်ဂေါဝ် သၟာန်သွဟ်လဝ်ကဵု ဥက္ကဌ ဗော်ဒဳမဝ် ကရေဇြဳ အလုံရးမန် နာဲဇၞူမန် ကော် နာဲၚိုဲတိၚ် ရ။
သၟာန်။ ။ စပ်ကဵုအလဵုအသဳ အမေရိကာန် သွက်ဂွံခါန်ကၞက် ညးစၞးတၟေၚ် စပ်ကဵုဍုၚ်ဗၟာဂှ် ဗီုလဵုအာစာညာတ်ကေတ်ရော?
သွဟ်။ ။ သွက်ဂွံသဳကၠဳ၊ သွက်ဂွံသၠာဲဂတးလညာတ် ဆန်ၜန် သွက်ဂွံကၠောန် ဒဳမဝ်ကရေဇြဳ ဍေံဂွံပြေပြံၚ်၊ ကၠုၚ်သၠာဲဂတးလညာတ် ကၠုၚ်ပညဳဏောၚ်တှေ် ပဵုခိုဟ်ဏောၚ် ညာတ်ကေတ်လေဝ်။ ယဝ်ရဝေၚ်ဂၠာဲဒုဟ်သက်က်ဏောၚ် ဟီုတှေ် ဍေံဟွံခိုဟ်။ အေဂှ်ရတှေ် မုဒှ်ဒှ်လေဝ် ပညဳ၊ သၠာဲဂတးညးသကအ်၊ သဳကၠဳညးသကအ်၊ ကဵုလညာတ်ညးသကအ် ဂၠံၚ်တရဴဍေံ ကလိတ်ကလောတ်ဏောၚ်။
သၟာန်။ ။ ဂၠာဲဒုဟ်ဟီုဂှ် ဗီုလဵုမိက်ဂွံသ္ဂးရော?
သွဟ်။ ။ ဂၠာဲဒုဟ်ဟီုဂှ် မၞိဟ်တံဏံ (အလဵုအသဳ) ဂှ် ကၠာကၠာတေံ ကၠောန်လဝ်ဒုဟ် ဗီုဗီုဏံ။ ရံၚ်ကေတ်ကဵု လညာတ်ဗီုဏံတှေ် ညာတ်မံၚ်ဒုဟ်တွဵုရ။ လၟုဟ်လေဝ် အလဵုအသဳဏံ အာဂှ် အာမံၚ်ကွေံလေဝ်။ ဆဂး ဂၠံၚ်တရဴအာဂှ် အာအတိုၚ်ပၟိက်ဆန္ဒ ညးဍုၚ်ကွာန် ဟွံသေၚ်ဏီ။ ယဝ်ရ မိက်ဂွံညာတ်ဒုဟ် ဗီုဂှ်တှေ် ညာတ်ဂွံမံၚ်တွဵုလေဝ်။ လၟုဟ် မၞိဟ်တံဏံ (အလဵုအသဳ) ဂှ် အာဂှ် အာအတိုၚ်ပၟိက်ဆန္ဒ ညးဍုၚ်ကွာန် ဟွံသေၚ်ပုဟ် ပိုဲဒုၚ်လဝ်တဲဟဂှ်။ ဆဂး မွဲတ္ၚဲတှေ် အတိုၚ်ဆန္ဒ ညးဍုၚ်ကွာန် ဒှ်ကၠုၚ်ဏောၚ် ပိုဲစၟဳစလဝ်ဟဂှ်။ အေဂှ်ရတှေ် နာကၠောန်ဗီုဏံ နာသ္ပဗီုဏံ ဒးပ္ညဳပ္ညပ် သဳကၠဳ ထံက်ထ္ၜးအာထေက်ဏောၚ်။
သၟာန်။ ။ ညးစၞးတုဲတုဲကၠုၚ်တေံ ညံၚ်ကဵုဂါမ်ပါရဳ ကုလသမဂ္ဂ ဗလးနၚ်ဂှ် မုတၚ်ဍိုန်လျညးတံ နွံကၠုၚ်ရော? တုဲပၠန် လၟုဟ်ညးစၞး အမေရိကာန်ဏံဂှ် မုကၠောန်ကဵု လတူနူကၠာတေံမာန်ရော?
သွဟ်။ ။ လောန်ကၠုၚ်တေံဂှ် အုပ်ဓုပ်လဝ် အလဵုအသဳပၞာန် တၠအဝဵုပၞာန်တှေ် တၚ်ဍိုန်လျဍေံ နွံကၠုၚ်တွဵုလေဝ်။ ညးစၞးကုလသမဂ္ဂ ကၠာကၠာတေံဂှ် ကၠောန်စတှေ် ညှာမံၚ်ဟာ ဓညမံၚ်ဟာ ဟွံသေၚ်တှေ် ပရေၚ်ဍုၚ်ကွာန် ဂွိၚ်ဖေက် ဟွံပြေပြံၚ်ဟာ မပတံသာ်ဂှ်လေဝ်။ တော်ဗီုဂှ်တုဲ ဍေံဟွံပိုတ်သ္ကုတ် ဒှ်ကၠုၚ်ဟဂှ်။ တုဲတှေ် ပရေၚ်ကမၠောန် တၠအဝဵုဂှ် ပိုတ်သ္ကုတ်ဂၠိုၚ်တှေ် ဒှ်သၞဂၠိုၚ်လေဝ်။ ဍေံဂှ် တၠအဝဵုတှေ်။
စပ်ကဵုခါန်ကၞက် ညးစၞးအမေရိကာန်ဂှ် နကဵုပိုဲ သွက်ဂွံဒစဵုဒးစ ဟွံမွဲမံၚ်ရ။ ဆဂးဂှ် ခိုဟ်အိုတ်ဂှ် ခါန်ကၞက် သွက်ဍုၚ်ဏံတှေ် ပ္ညဳပ္ညပ်ညးသကအ်၊ သဳကၠဳညးသကအ်တှေ် ဂၠံၚ်တရဴပိုဲ အာဂှ် ကလိတ်ကလောတ်ညိဟာ ဟွံတီ ပ္ဋဲစိုတ်တေံ ဒုၚ်ကေတ်လဝ်ဟဂှ်။
သၟာန်။ ။ ဟီုဂှ်တှေ် နဲလဵုဂွံတတ်ထပါ် တၚ်ဍိုန်လျဏံဂှ်ရော?
သွဟ်။ ။ လၟုဟ်ဂှ်ဂှ် အဝဵုဂှ် ဍေံပအပ်ထောံယျ ဒးဟီုဟဂှ်လေဝ်။ ဍေံပအပ်ဇေတ်တ်လေဝ် ဒှ်ဂွံ၊ ဍေံပအပ်ဇေတ်တ် ဟွံသေၚ်၊ ဍေံတံၚ်လဝ်ဇုက်လေဝ် ဟီုဂွံ။ လၟုဟ် ဍေံတံၚ်လဝ်ဇုက်ဏောၚ် လက္ကရဴဂှ်။ ၜိုန်ဍေံတံၚ်လဝ်ဇုက်ကၠာရလေဝ် ဗီုကၠာတေံ နဒဒှ်တၠအဝဵု ပိုတ်တ်သ္ကုတ်တ်ဂှ် ဍေံဟွံကၠောန်ရ ဍေံဍိုန်စှေ်ဏောၚ်။ ဍေံဍိုန်စှေ်အာတှေ် ပိုဲဂှ်ဒးပ္ညဳဏောၚ် သၠာဲဂတးလညာတ်ဏောၚ် သဳကၠဳဏောၚ်တှေ် ဂၠံၚ်တရဴ ပိုဲဂွံအာဂှ် ဍေံကလိတ်ညိဏောၚ် ပိုဲပတှေ်လဝ်ဗီုဂှ်။ ဆဂး ယှအ်ဂှ် ဟွံဂွံပုဟ်။
သၟာန်။ ။ ယဝ်ရ အာစာတံ ပ္ညဳတှေ် ဗီုလဵုပ္ညဳရော?
သွဟ်။ ။ ပ္ညဳဗီုလဵုရောဟီုတှေ် ပ္ညဳ ပ္ဋဲကဵုကၠတ်ထဝ်တေံဏောၚ်။ နာဏံ ဒှ်မံၚ်ဗီုဏံ ဒးသၠာဲဂတးလညာတ်။ ပိုဲဂှ် ပတှေ် သၞောဝ်ဥပဒေ ၂၀၀၈ ဍေံတုဲတှေ် ပိုဲကၠောန် ဟွံသေၚ်ပုဟ်။ ဥပဒေ ၂၀၀၈ ဏံ မွဲတ္ၚဲတှေ် ပိုဲပလေဝ်မာန်ဏောၚ် ပိုဲတော်လဝ်ဟဂှ်။ ဟဂှ်ရ ပိုဲကၠောန်။ ၂၀၀၈ ဏံ ပိုဲဒးကအ်တုဲ ပိုဲကၠောန်ဟွံသေၚ်။ ဥပဒေ ၂၀၀၈ ဏံဂှ် ဍေံတန်ကြန်မံၚ်တွဵု ဍေံဒှ် ဟွံဂွံပုဟ်။ ဍေံဒးပြံၚ်သၠာဲမံၚ်တွဵုဏောၚ်။ ပရေၚ်ဂကောံမၞိဟ်ဂှ် ဍေံပြံၚ်သၠာဲမံၚ်တှေ် ဥပဒေဏံလေဝ် ဒးပြံၚ်တွဵုဏောၚ်။ ပိုဲပတှေ်ဗီုဂှ်တုဲတှေ် ပ္ဋဲကၠတ်ထဝ်တေံဂှ် နဗဗွဲဓရ် ပိုဲပတိုန်ထ္ၜးဏောၚ်။ ပိုဲထံက်ထ္ၜးဏောၚ်။ ပိုဲပညဳဏောၚ်တှေ် ဂွံဏောၚ် ပိုဲပတှေ်လဝ် ဟဂှ်လေဝ်။
သၟာန်။ ။ ညးစၞးအမေရိကာန်ဏံဂှ် စပ်ကဵုပရေၚ်ကောန်ဂကူ ကောန်ဍုၚ်အရၚ်တံတုဲ ဗီုလဵုညးတံ ဒးကၠောန်ထေက်ရော?
သွဟ်။ ။ ကောန်ဍုၚ်အရၚ်ဂှ် ထောံလဝ် ဟွံဂွံပုဟ်။ ပရေၚ်ဏံဂှ် စှေ်အဓိက ကွေံကွေံဏောၚ်။ ယဝ်ဒးဟီုတှေ် ကၠာတေံဟီုမံၚ် ပိဂကောံဟာ ပိဗော်ဟာ မွဲလ္ပာ်ဓဝ် ကၠောန်တှေ် အံၚ်ဇၞး ဟွံမာန်ပုဟ်။ ပြသၞာကောန်ဍုၚ်အရၚ် ပ္ဋဲဍုၚ်ဗၟာဏံဂှ် လၟုဟ်ဂှ် ဒှ်မံၚ် က္ဋိုပ်ပြသၞာ ပြသၞာက္ဋိုပ်။ မုဒှ်ဟလဵုရောတှေ် ကောန်ဍုၚ်အရၚ်ဏံဂှ် ပွိုၚ် ၅၀ သၞာံ ၆၀ သၞာံ ညးတံ ဒစဵုဒးစးကၠုၚ်မံၚ်ကဵု အလဵုအသဳအဆက်က်တွဵု။ အေဂှ်ရတှေ် မုညးတံ ပၟိက်နွံရောဂှ်တှေ် စွံထောံ ဝိုတ်ထောံ သ္ပထောံမဇ္ဇျဟ် ဟွံဂွံပုဟ်။ သ္ပထောံ ဥပေက္ခာ ဟွံဂွံပုဟ်။ အေဂှ်တှေ် ညးစၞးကၠုၚ်နူအမေရိကာန်ဂှ်တှေ် ပ္ညဳကဵု မွဲလ္ပာ်ဓဝ်လေဝ် ဟွံဂွံပုဟ်။ ဗွဲတၟေၚ်ဂှ်တှေ် ကောန်ဍုၚ်အရၚ်တံဂှ် သ္ပထောံ မဇ္ဇျဟ် ဟွံဂွံပုဟ်။ အလဵုအသဳဏံ ဒးပါဏောၚ်၊ မွဲလ္ပာ်ဂှ်လေဝ် ကောန်ဍုၚ်အရၚ် ဒးပါဏောၚ်။ မၞိဟ်တံဏံပါမှ ပြသၞာဍုၚ်ဗၟာဂှ် ဍေံပြေပြံၚ်မာန်ဏောၚ်။ ဗီုဂှ်ဟွံသေၚ်တှေ် ပြေပြံၚ်ဟွံမာန်ပုဟ်။