နာဲတၠလွဳ- ပတိုန်ထ္ၜးလဝ်ရ။
သၟာန်။ ။ ကိုပ်ကၠာအိုတ် ဆက်မိပ်ကဵုပုရိသာတ်တံ ယၟုပ္ဍဲပေဲါဇာတ်၊ ယၟုပ္ဍဲကွာန်၊ ဂွံအာယုက်မူစိသၞာံဂှ်လေဝ် လဴထ္ၜးကဵုညိ?
သွဟ်။ ။ ယွံ မ္ၚဵုရအဴ။ ယၟုအဲပ္ဍဲပေဲါဇာတ်ဏံဂှ်တှေ် ”ဆောဝ်ရောတ်” ယၟုဇေတ်တ် ပ္ဍဲသ္ၚိကော်ခဴစဒၟံၚ်တှေ် ”သဵုတုၚ်” (စိုးသိန်း) ရ။ တုဲပၠန် သီုသၞာံဏံ တှေ် ပေၚ်အာယုက် (၄၅) သၞာံရ။
သၟာန်။ ။ ပ္ဍဲကဵုပေဲါဇာတ် ”ဆာန်ညဳဆာန်” ဏံ နကဵု ”ဆောဝ်ရောတ်” ကေတ်လဝ်တာလျိုၚ် ဒၞာဲလဵု၊ ဂွံမွဲပ္တံ မူစိရောဂှ် လဴကဵုညိ?
သွဟ်။ ။ ပ္ဍဲကဵုပေဲါဇာတ်ဏံ ကေတ်လဝ်တာလျိုၚ် ကတဵုဟရိုၚ်ကီု၊ ချူဒၟံၚ်အစဳ အဇန်ထ္ၜးဇာတ်ကီုရ။ ပ္ဍဲကဵုကတဵုဟရိုၚ် မၞိဟ် (၄) တၠဏံ အဲဂှ် ဒှ်မၞိဟ်က္ဍိုက်ပ် ကတဵုဟရိုၚ်ဇၞော်အိုတ်တုဲ မွဲပ္တံမ္ဂး ဂွံသြန် (၂၅၀၀၀) ဒကေဝ်ရ။ ချူဒၟံၚ်အစဳအဇန် ထ္ၜးဇာတ်ဏံဂှ် နကဵုအဲ စွံစေတနာလ္တူညးတံတုဲ ညးတံလေဝ် ကလေၚ်စွံစေတနာလ္တူအဲကီုရ။ ၚုဟ်မး ၜိုတ်တေံ ၜိုတ်ဏံရဂှ်ဟွံသေၚ် နကဵုအဲဟွံဂွံသြန်လေဝ် စေတနာချူဂှ်တှေ် ချူကဵုဒၟံၚ်ပေၚ်ၚ်ရ။
သၟာန်။ ။ နကဵု ”ဆောဝ်ရောတ်” ကတဵုဟရိုၚ်ကၠုၚ်ဒၟံၚ် ပ္ဍဲကဵုပွိုၚ်သုခုမဏံ ဂွံပွိုၚ်မူစိသၞာံကီုရော တုဲပၠန် ပြံၚ်သၠာဲဇာတ်လဵု နွံကီုရော?
သွဟ်။ ။ နူစအာယုက် (၁၅) သၞာံတေံဂှ် နွံဒၟံၚ်ပ္ဍဲကဵုပေဲါဇာတ်ဗၟာ ”ခေတ်ပေါ်” ရ။ အခိၚ်ဍောတ်ဒၟံၚ်တေံဂှ် လှေ်ကောန်သၟိၚ်ကီု၊ ဒှ်မၞိဟ်က္ဍိုက်ပ်ထ္ၜးဇာတ်ကီု၊ သီု ကဵုကတဵုဟရိုၚ်ကၠုၚ်ဒၟံၚ် ပ္ဍဲကဵုဇာတ်ဗၟာဂှ်တှေ် ဂွံပွိုၚ် (၂၅) သၞာံကီုရ။ ဇာတ်မန်ဏံဂှ်တှေ် လၟုဟ်မှ ကတဵုဟရိုၚ်ဂွံ ပွိုၚ် (၅) သၞာံရ။ ပ္ဍဲကဵုပွိုၚ် (၅) သၞာံဏံဂှ် ပေဲါဇာတ် ”မန်ချေတ်သဵု” ဂှ် (၁) သၞာံ၊ ပေဲါဇာတ် ”ဆာန်ဇေတ်” ဂှ် (၂) သၞာံ၊ ပေဲါဇာတ် ”ရတ်ပေၚ်” ဂှ် (၁) သၞာံ၊ သၞာံဏံ ပေဲါဇာတ် ”ဆာန်ညဳဆာန်” ဏံဂှ် ဂွံ (၁) သၞာံကီုရ။
သၟာန်။ ။ ဟိုတ်နူလအ်ကဵုသၞာံ နကဵု ”ဆောဝ်ရောတ်” ချဳဒရာၚ်ကၠုၚ်ဒၟံၚ် ပရေၚ်သုခုမဏံဂှ် ဇၞော်မောဝ်တဴတက်တိုန် ၜိုတ်ဂလိုၚ်လဵု နွံကီုရော?
သွဟ်။ ။ ယွံ ပ္ဍဲကဵုစိုပ်အဲတှေ် ဇၞော်မောဝ်တိုန်တၟာဂလိုၚ်ရ။ နကဵုပုရိသာတ်တံတှေ် ဗီုလဵုညာတ်လ္တူအဲဂှ် ဟွံတီဏီ၊ နူထ္ၜးဇာတ် စိုပ်ကောန်သၟိၚ်၊ နူကောန်သၟိၚ် စိုပ်ကတဵုဟရိုၚ်ရ။ အကြာဂှ် သီုကဵုချူဒၟံၚ်အစဳအဇန်ထ္ၜးဇာတ်တုဲ ယၟုအဲဂှ် ၜိုတ်ထေက်ကြိုက် မံက်ဂတဝ်ဏာ ဂတ မုက်ပုရိသာတ်တံနွံဏောၚ် အဲထေၚ်ကေတ်ရ။
သၟာန်။ ။ နကဵု ”ဆောဝ်ရောတ်” လှေ်ကၠုၚ်ဒၟံၚ်ဇာတ်ဗၟာ ဂၠိုၚ်နူကဵုဇာတ်မန်တုဲ အခိၚ်လုပ်ကၠုၚ်ဇာတ်မန်ဏံဂှ် ပရေၚ်အခက်အခုဲ ဆဵုဂဗ ဗီုလဵုနွံကီုရော?
သွဟ်။ ။ နကဵုထ္ၜးပြယာဲဟီုဂှ် အခက်အခုဲ ဟွံမွဲကွေံကွေံပုဟ်၊ ပ္ဍဲကဵုဟီုအရေဝ်မန်ရ မိက်ဂွံဒှ်အခက်အခုဲညိညိ။ ဣဏံဂှ် တမ်ဝါဒိတေံ စကာကၠုၚ်ဒၟံၚ် အရေဝ်ဗၟာဂၠိုၚ်နူကဵု အရေဝ်မန်တုဲ အခိၚ်ဟီုအရေဝ်မန်ဂှ် ဟွံမိက်ကၠးစကွေံကွေံပုဟ်၊ ဆဂး အဲဂှ် ဂကူမန်ရ။
သၟာန်။ ။ ပုရိသာတ်တံ ဂွံဒုၚ်တဲမာန်ဂှ် ”ဆောဝ်ရေတ်” မုဒးဍိုက်ပေၚ်ကဵု အ စောန်စရာဲပရေၚ်သုခုမ နွံကီုရော?
သွဟ်။ ။ ယွံ အဲဂှ်တှေ် ဂ္စာန်ဒၟံၚ်လၟိုန်ရ။ နူကဵုလုပ်ကၠုၚ်ဇာတ်မန်တုဲတှေ် ညံၚ်ပုရိ သာတ်ကောန်ဂကူမန်တံ ဂွံဒုၚ်တဲမာန်ဂှ် မပ္တံကဵု ကတဵုဟရိုၚ်ကီု၊ ချူဒၟံၚ်အစဳအဇန်ထ္ၜးဇာတ်ကီု ညံၚ်ဂွံခိုဟ် ညံၚ်ဂွံမြဟ်အာ လ္တူပုရိသာတ်တံမာန်ဂှ် ၜိုတ်ပညာအဲနွံ အဲဂစာန်ကၠောန်ရ။
သၟာန်။ ။ လ္တူပုရိသာတ်တံဂှ် ဗီုလဵုစွံစိုတ်တုဲ ”ဆောဝ်ရောတ်” ဟီုဂး ဆက်ဆောံကၠုၚ်ကီုရော?
သွဟ်။ ။ ပုရိသာတ်တံ စွံၚုဟ်မးကဵု သုခုမတုဲ ကၠုၚ်စိုပ်ပ္ဍဲကဵုဇကုမ္ဂး ဇကုလေဝ် ဒးကလေၚ်စွံၚုဟ်မးကဵု ပုရိသာတ်တံကီုရ။ မုဟိုတ်ရောဟီုတှေ် ဒၟာနူပုရိသာတ်တံရ ပိုဲရဲသုခုမတံ ဂွံကၠုၚ်ယၟုရ။ ဟီုဇေတ်တ်တှေ် အ္စာဇကုလေဝ်ဟီုဂွံရ။
သၟာန်။ ။ ပဲါနူကမၠောန်သုခုမပေဲါဇာတ်ဏံတုဲ ကမၠောန်တၞဟ်ဟ်တံ မုကၠောန်ဒၟံၚ်ကီုရော?
သွဟ်။ ။ လၟုဟ်ပြဟ်ဟ်ဏံ ပဲါနူသွံဖျာ ကဵု လှေ်ပေဲါဇာတ်တုဲ ကမၠောန်တၞဟ်ဟ်တံ မုဟွံဂွံကၠောန်ဏီပုဟ်၊ ဆဂး ဂတဏံ ဗီုလဵုကတဵုဒှ်ပၠန်ဂှ် အဲကေတ်ဟွံဒးရ။
သၟာန်။ ။ ပုရိသာတ်တံ ကဵုကၠုၚ်ဇြဟတ်တက်တဲကဵု ”ဆောဝ်ရေတ်” မ္ဂး ပ္ဍဲစိုတ်တေံ ဗီုလဵုဒးဒုၚ်သိုၚ်ကီုရော?
သွဟ်။ ။ ၜိုတ်ဇကုဂ္စာန်ကၠောန်ကၠုၚ်လဝ်ဂှ် ပုရိသာတ်တံ ကဵုဇြဟတ်တှေ် မိပ်စိုတ်ကွေံကွေံရ။ ယဝ်ရ ဟွံဂွံဇြဟတ်နူပုရိသာတ်တှေ် ပိုဲတံအာဍာ်ဇမၠိၚ်ဟွံမာန်ပုဟ် ပရေၚ်သုခုမပိုဲလေဝ် အိုတ်အာမာန်ရ။ ဟိုတ်ဂှ်ရ စဵုကဵုလၟုဟ် ပိုဲတံ နွံဒၟံၚ်လ္တူစၚ်ဂှ် ဟိုတ်နူကဵုပုရိသာတ်တံရ။
သၟာန်။ ။ တုဲပၠန် သွက်ကမၠောန်သုခုမဓါန်ဂတဏံ မု ”ဆောဝ်ရောတ်” ကူချပ်လဝ် နွံဒၟံၚ်ကီုရော?
သွဟ်။ ။ ချပ်လဝ်ကမၠောန်ဓါန်ဂတဟီုဂှ်တှေ် ညံၚ်ဂွံခိုဟ်တိုန်နူဏံပၠန်၊ ညံၚ်ဂွံမံက်ဂတဝ်နူဏံပၠန်ဂှ် လ္ပာ်ကတဵုဟရိုၚ်ကီု၊ လ္ပာ်ချူအစဳအဇန်ထ္ၜးဇာတ်ကီု၊ ပုရိသာတ်တံ ညံၚ်ဂွံဂွံဓရ်သတိမာန်ဂှ် အဲဂၠိုက်ဂၠာဲတုဲ ပ္တိုန်ထ္ၜးကဵုဏောၚ်ရ။
သၟာန်။ ။ သွက်သၞာံ (၂၀၁၁) ဏံ ”ဆောဝ်ရောတ်” ဗီုလဵုမိက်ဂွံဟီုပ္ကန်ကဵု ပုရိသာတ်တံ နွံဒၟံၚ်ကီုရော?
သွဟ်။ ။ သၞာံဏံရ အဲဂွံစိုပ်ကၠုၚ် ပေဲါဇာတ် ”ဆာန်ညဳဆာန်” ရ။ ပေဲါဂှ် လေဝ်ဆက်ဂၠိုၚ် ၜိုတ်ဇကုလေပ်ကၠုၚ်လဝ် ဂှ်ရ ထ္ၜးပျးကဵုပုရိသာတ်တံတုဲ ဂွံကၠုၚ်ယၟု ညိညရ။ ဆဂး ဗီုလဵုဒှ်ဒှ် သွက်ပုရိသာတ်တံတှေ် သၞာံဂတဏံ ညံၚ်ဂွံတၟေၚ်နူဏံပၠန်ဂှ် ဖန်က်ကဵုရောၚ် ကဵုဏာသတိပါၚ် ပ္ဍဲကဵုလိက်ပရိုၚ်သၞံၚ်တိုၚ်ဏံ ကီုရ။