မာံသုတ – ရုၚ်ဒပ်လပါ် ဒပ်ပၞာန်မၚ်ပယျဵု မဖျေံသဇိုၚ် ပ္ဍဲကွာန်သၞေဟ်ဇုက်၊ ပွိုၚ်ဍုၚ်ရေဝ် မၞုံသၟဝ်ကောပ်ကာဲ ဌာန်ဂအုပ်ပၞာန် ရးဒိုဟ်အဂၞဲဂှ် ပံၚ်ဝိုၚ်ဝေၚ်တုဲ ဂၠာဲဒၟံၚ်ပရေၚ်ပိုန်ဒြပ်ရောၚ် ညးဒေသတံ ဟီုအိုတ်ရ။
ပ္ဍဲကွာန်သၞေဟ်ဇုက်ဂှ် ဂကောံဒပ်မၚ်ပယျဵုတံ ကဵုလဝ်ဂီုကၠီုတုဲ ပံက်လဝ်ဝိုၚ်ဝေၚ်နာနာ မပ္တံကဵု ဝေၚ်ဒဇဵုစာၚ်၊ ဝိုၚ်ဖေဝ် သီုဗတမ်တ္ၚဲတုဲ ညးတံ ဗက်ကေတ်မံၚ်အကံက်အိုတ်ရ။
ပ္ဍဲဂိတုမြေက္ကသဵုမ္ဂး ပ္ဍဲဒေသဂှ် သဘၚ်ကျာ် ဟွံမွဲဂှ်ရ သွက်ရဲပံက်ဝိုၚ်ဝေၚ်တံဂှ် ဒှ်မံၚ်ကမၠောန် ပ္ဍဲဝိုၚ်ဝေၚ် ကွာန်သၞေဟ်ဇုက်အိုတ်ရောၚ်ဂှ်လေဝ် ညးဆက်ဟီုရ။
နူဝိုၚ်ဝေၚ်တံဂှ် မွဲမွဲတ္ၚဲ ဂွံမံၚ်အကံက် ၜိုတ် ၁၅ ကိုဋ်ရောၚ်ဂှ်လေဝ် ညးမစုက်လုက်မွဲတၠ ကုညးလျိုၚ်ဂကောံဒပ်မၚ်ပယျဵုဂှ် ဟီုရ။
“ပ္ဍဲဝိုၚ်ဝေၚ် ကွာန်သၞေဟ်ဇုက်ဂှ်တှေ် ရာန်ကေတ်ဂဥုဲချေံလေဝ် ဂွံမံၚ်။ အဆက်ညးကဵု ညးရ။ ယဝ်ရာန်ဒၞာဲတၞဟ်တၞဟ်တှေ် ဒးဖေက်မံၚ် ပလုက်ဏီ” သာ်ဝွံ သၟတ်နူကွာန်လၟိုၚ်မွဲတၠ ဟီုရ။
ပ္ဍဲတွဵုရးမန် သကုတ်သၠုၚ်ကျာ ပ္ဍဲပွိုၚ်ဍုၚ်မုဟ်ဍုၚ်၊ ဇြပ်ဗု၊ ရေဝ်တံဂှ် သၟတ်ဗွဲမဂၠိုၚ် သုၚ်စောဲမံၚ် ဂဥုဲချေံသၟးဟွံက သီုသုၚ်စောဲမံၚ်တၞးဘိၚ် လှဲလှဲလးလးအိုတ်ရ။ ဟိုတ်နူဂှ်ရ နူဗော်ဍုၚ်မန်တၟိ ဖျေံအစဳအဇန် ဗတိုက်ပလီု အန္တရာဲဂဥုဲၜူမာဲတုဲ ရပ်စပ်မံၚ် ညးသုၚ်စောဲ သွံရာန်တံဂှ် ဂွံဆဵုကေတ်ရ။
“ဇၟာပ်ဇၟာပ်ဒၞာဲပံက်ဝိုၚ်ဝေၚ်တံဂှ် ပရးမံၚ်ဂဥုဲၜူမာဲဖအိုတ်ရ။ ပ္ဍဲဝိုၚ်ဝေၚ် ပွိုၚ်ဍုၚ်ဇြပ်ဗု၊ ပ္ဍဲဝိုၚ်ဝေၚ် ကအ်ဗိန် ကအ်ပံက်လေဝ် ဗီုဏံကီုရ” သာ်ဝွံ ညးတာလျိုၚ် ဂကောံဗတိုက်ပလီု အန္တရာယ်ဂဥူၜူမာဲ နူဗော်ဍုၚ်မန်တၟိ ဟီုရ။
ဂကောံဖျေံလွဟ်တံကီု၊ ဂကောံဒပ်မၚ်ပယျဵုလ္ၚဵုတံကီုဂှ် သွက်ပရေၚ်ဒတူလိုၚ်ညးတံ ပံက်ဝိုၚ်ဝေၚ်တုဲ ဂၠာဲမံၚ်သြန်ဗွဝ် မွဲနဲမွဲဗီုအိုတ်ရောၚ်ဂှ်လေဝ် ညးဆက်ဟီုရ။
ကိုပ်ကၠာနူပေဲါရုဲမာဲ ၂၀၁၀ ဂှ် ဒပ်မၚ်ပယျဵု မံက်ကၠုၚ်တုဲ ညးဖျေံလွဟ်တံဂှ်လေဝ် ညံၚ်ရဴဂကောံကီု ချဳဒရာၚ် အာကၠုၚ်မံၚ် ပ္ဍဲဒေသ သီုလွဟ်လက်နက်ဂှ် ဂွံဆဵုကေတ်ကီုရ။