နာဲမာန် – ပရိုၚ်ကောဠဟောဠတိတ်မံၚ် ပ္ဍဲအခိၚ်စပံက်ဘာဏံ ဂွံအခေါၚ်ဗ္တောန်လိက်မန် ပ္ဍဲဘာတန်အလဵုအသဳ ရောၚ်ဟီုဂှ် ဒဵုတ္ၚဲဏံ မုအခေါၚ်ဟွံမွဲဏီရောၚ် ဖက်ဆောညးအုပ်ကာ ဗော်ဒဳမဵုကရေဇြဳအလုံရးမန် စၠတ်ထဝ်တွဵုရးမန် နာဲသာန်တေန် ဟီုရ။
ပရေၚ်ဂွံအခေါၚ်ဗ္တောန်လိက်မန် ပ္ဍဲဘာတန်အလဵုအသဳဂှ် ပရိုၚ်တိတ်မံၚ် ဇၟာပ်ပွိုၚ်ဍုၚ်ရ။ “အဵု နူကၠၚ်ဏံရ ဖုၚ်စိုပ်ကၠုၚ်ပ္ဍဲအဲ ကျာ်ဇၞော်ဂွံအခေါၚ်ဗ္တောန်လိက်မန် ပ္ဍဲဘာဗၟာဣရ၊ သီုဂွံအခေါၚ်ဗ္တောန်လိက် အပ္ဍဲအခိၚ်ဘာရောၚ် အ္စာၝောံနူကွာန်တေံ ဆက်နၚ်ကဵုအဲ” သာ်ဏံ ကျာ်ဇၞော်အ္စာ ကေတုမာလာ (ကော်) ဂုဏ်ဂျုက် ဘာကံပလိုၚ်ဂှ် ဟီုထ္ၜးရ။
ပရိုၚ်ဗ္တောန်လိက် ပ္ဍဲဘာတန်အလဵုအသဳဂှ် ၜိုန်ရပရိုၚ်ပြးစိုပ်ဒၟံၚ် ဇၟာပ်ဍုၚ်ကွာန်ကီုလေဝ် ဍာံဍာံဂှ် ဒၞာဲလဵု လေဝ် ဟွံဂွံစဗ္တောန်ဏီပုဟ်၊ ပိုဲအဃောချပ်ဇန်မံၚ်ဖိုဟ်၊ အကြာမွဲၜါတ္ၚဲဏံတှေ် ကောံဓရီုပိုဲနွံမံၚ် ပ္ဍဲကောံဓရီု ဂှ်တှေ် ပိုဲဗီုလဵုဂွံဆက်ပ္တိုန် ပိုဲချပ်စညးသ္ကံပၠန်ရောၚ်၊ နူက္ဆံၚ်လ္တူတေံ ၜိုန်ရဟွံဖျေံကဵုလေဝ် နူသၟဝ်ဏံ ညးဍုၚ်ကွာန်ကဵု အမာတ်တံ ဒှ်မွဲကသပ်တုဲပ္တိုန်တှေ် ဒးဂွံတွဵုရောၚ် ပိုဲစှေ်စိုတ်ရဂှ် စၠတ်ထဝ် နာဲသာန်တေန် ဟီုရ။
ပရေၚ်ဗ္တောန်လိက်မန်ဂှ် ဟိုတ်နူပရိုၚ် ဂွံအခေါၚ်ဗ္တောန် ပ္ဍဲဘာတန်အလဵုအသဳရောၚ်ဂှ်တုဲ ဘာကောန်ဂကူ ကွာန်လ္ၚဵု ဒဵုကဵုဘာကြပ်လီုအာ နွံမံၚ်ရောၚ် ညးတာလျိုၚ် ဂကောံရေၚ်တၠုၚ်ပရေၚ်ပညာမန်တံ ဟီုထ္ၜးရ။ “ဗီုကဵု ဘာပရေၚ်ပညာကောန်ဂကူမန် ဖက်ဆောတန်သၠုၚ် ကွာန်ကံဝါန် ပွိုၚ်ဍုၚ်ကျာ်မြဟ်ဂှ်တှေ် ကြပ်လီုအာမံၚ်၊ အ္စာၝောံတံဂှ်လေဝ် ဒုၚ်ထောံတဲ သွက်ဂွံဗ္တောန်လိက်မန် ပ္ဍဲဘာဗၟာဂှ် အ္စာဂှ်လေဝ်ယအ်၊ ကွးဘာတံဂှ်လေဝ် ပြံၚ်စိုပ်အာ ဘာဗၟာဂၠိုၚ်၊ ဘာဂှ် ပိုဲဒးထိၚ်လဝ် တၟာကလှေ်” သာ်ဏံ ညးက္ဍိုပ်ဂကောံရေၚ်တၠုၚ် ပရေၚ်ပညာမန် နာဲသိုက်ဆီ ဟီုထ္ၜးရ။
စပ်ကဵု ပရေၚ်ဂွံအခေါၚ်ဗ္တောန်လိက်မန် ပ္ဍဲဘာတန်အလဵုအသဳဂှ် ပရိုၚ်ပြးစိုပ်ဒၟံၚ် ဒၞာဲဘာကောန်ဂကူမၞုံဂှ်တုဲ “ကွးဘာပ္ဍဲဘာကောန်ဂကူ ကွာန်ဗွဲဂမၠိုၚ် ကွးဘာတံယအ်ဒၟံၚ် ဒၞာဲဗွဲမဂၠိုၚ်ရောၚ်၊ ဆဂး ဘာလဵုယအ်၊ ဘာဂှ်ယအ်ဂလိုၚ်လဵုဂှ် ဟွံဂွံလ္ၚတ်ချိုတ်တ်ပၠိုတ်ဏီတုဲ ဟီုဟွံဒးဏီ” သာ်ဝွံ ဥက္ကဌပရေၚ်ပညာ ပွိုၚ်ဍုၚ်ဇြပ်ဗု မိသိုက်ပိုန် ဟီုထ္ၜးရ။
ပရေၚ်ပညာကောန်ဂကူမန် အပ္ဍဲဍုၚ်ဂှ် ဟိုတ်နူရောအ်ရေၚ် ဒှ်အခက်အခုဲကဵု ပရေၚ်ဗ္တောန်လိက်မန် ပ္ဍဲဘာတန်အလဵုအသဳဂှ်တုဲ မွဲၜါတ္ၚဲဏံ ဂကောံရေၚ်တၠုၚ် ပရေၚ်ပညာကောန်ဂကူမန်ကဵု ဌာန ပရေၚ်ပညာဗဟဵု ဗော်ဍုၚ်မန်တၟိ ကေုာံ ခမဳသၚ်တံ သွက်ဂွံဆဵုဂ္ဗညးသ္ကံ နွံရောၚ်ဂှ်လေဝ် နာယကဂကောံမရေၚ်တၠုၚ် ပရေၚ်ပညာကောန်ဂကူမန် လ္ပာ်ခမဳသၚ် ကျာ်ဇၞော်အ္စာ သဳလဝန္တ နူဘာဟံသာထဝ် ဍုၚ်ဇြပ်ဗု ဟီုထ္ၜးရ။