သၟဟ်သၟန် – သၞောဝ်ဥပဒေချူဓဇက် သ္ပဒတန်လဝ် ပ္ဍဲကဵုကၠတ်ထဝ်တံဂှ် ညံၚ်ဂွံတြးဗ္စိုပ်ကဵု ညးဍုၚ်ကွာန်တံမာန် နူကဵုအလဵုအသဳ ဒးကၠောန်ကဵုထေက်ရောၚ်ဂှ် နူကဵုဗော်ဒဳမဵုကရေဇြဳအလုံရးမန် ဗ္တိုက်ဖၟောဝ်ဏာ အလဵုအသဳတွဵုရးမန် ပ္ဍဲကဵုတ္ၚဲစၟတ်သမ္တီ ကၠတ်ထဝ်တွဵုရးမန် ပေၚ် (၃) သၞာံဂှ်ရ။
ကၠောန်ဗဒှ်စၟတ်သမ္တီ ကၠတ်ထဝ်တွဵုရးမန် ပေၚ် (၃) သၞာံ ပ္ဍဲကဵုၝောံခန်တွဵုရးမန် တုဲကၠုၚ်ဂိတုဂျာန္နဝါရဳ (၃၁)၊ အခိၚ် (၁၂) နာဍဳဂှ် နာဲလှခိုၚ် သ္ပစၞးဗော်အလုံဒေသတုဲ ဟီုဏာသာ်ဝွံရ။
“ပရေၚ်ခၞံသၞောဝ်ဟီုဂှ် အလဵုအသဳနွံအဝဵုတံ ချူခၞံသ္ပဒတန်ကီုလေဝ် ညးဒးဒ္ဂေတ်ဗက်ဥပဒေဏံဂှ် ပိုဲကောန်ဍုၚ်ကောန်ကွာန်တံရ။ ညးဍုၚ်ကွာန် ဒးရှေ်သှေ် ဒးဒ္ဂေတ်ဗက်သၞောဝ်တံဂှ် စပ်ကဵုသၞောဝ်ဝွံတုဲ တၚ်ရန်တၟအ်၊ တၚ်စၟတ်သမ္တီ၊ တၚ်ဒးဒ္ဂေတ်ဗက်၊ တၚ်ဒးဝေၚ်ပဲါ၊ ဒုဟ်ဒဏ်သၞောဝ်တံဂှ် ဒးကၠိုဟ်လဝ်ဏောၚ်” သာ်ဝွံ နာဲလှခိုၚ်ဟီုရ။
အလဵုအသဳတွဵုရးမန်ဝွံ ပ္ဍဲပွိုၚ် (၃) သၞာံဂှ် သၞောဝ်ဥပဒေ (၂၁) စံၚ် ချူခၞံသ္ပဒတန်မာန်ကၠုၚ်တုဲ နဲဥပဒေဂှ် ခၞံဂွံလဝ် (၃) စံၚ်ရ။ ဟိုတ်နူကဵု အလဵုအသဳတွဵုရး စၞောန်ပ္ညုၚ်ကဵု ဌာနမဆေၚ်စပ်တံ ဍိုန်လျမံၚ်တုဲ သၞောဝ်ဥပဒေ ဟွံဂွံချူလဝ် နဲဥပဒေဏီတံဂှ် ညံၚ်ဂွံကဵုဇြဟတ်ဓရိုဟ်မာန်ပၠန်ဂှ် နူကဵုဌာန်ပရိုၚ် တာန်လွေန်တိုၚ် ကဵုကသပ် ပ္ဍဲကဵုပေဲါဂှ်ရ။
“သၞောဝ်ဥပဒေတံဂှ် ကိုပ်ကၠာနူကဵု နဲဥပဒေဟွံဂွံတိတ်ဏီ ညံၚ်ဂွံစကာဂွံဂှ် ၜိုတ်သ္ပမာန် ချူစုတ်လဝ်ရ။ ဥပဒေသ္ပဒတန်လဝ် တုဲတံဂှ် နူကဵုဌာနဝန်ဇၞော်၊ ဌာနမဆေၚ်စပ်တံ စိုတ်လုပ်စကီု ပံၚ်တောဲဗၟံက်ရုပ်ရဴကီု ဍိုန်လျမံၚ်ဏီရ” သာ်ဝွံ ဥက္ကဌကၠတ်ထဝ်တွဵုရးမန် ဥူကျေန်ဖေ ဟီုရ။
လ္တူညးစၞးကၠတ်ထဝ်ဂှ် ညးဍုၚ်ကွာန်တံ ဟွံဂွံကဵုတရိုပ်စိုတ် နွံလေပ်ရ။ ညးစၞးကၠတ်ထဝ်တံလေဝ် ၜိုတ်သ္ပမာန် ၜိုတ်ကၠောန်ဂွံဂှ် ဂစာန်ကၠောန်မံၚ် ညံၚ်ဟွံဂွံဒေက်ရောၚ်ဂှ် ညးဆက်ဟီုရ။
အလဵုအသဳတွဵုရးမန် ကေုာံ ဌာနမဆေၚ်စပ်ဂမၠိုၚ်၊ ဗော် (တစည)၊ ဗော်ကျဖောအ်၊ ဗော် (NLD) ဗော်ဒဳမဵုကရေဇြဳအလုံရးမန် ကေုာံ ညးစၞးနူကဵုဗော်နာနာတံကီု သီုကဵုအ္စာပရိုၚ်ဂမၠိုၚ် တိုန်စိုပ် ၜိုတ် (၂၀၀) တၠပြၚ်ရောၚ်။
သွက်ဂွံတိုန်စိုပ်ကောံဓရီုကၠတ်ထဝ်တွဵုရးဂှ် ဗော်ပရေၚ်ဍုၚ်ကွာန်တံ အာတ်မိက်ပ္ဍဲပေဲါဂှ်ကီုရ။ ၝောံသ္ၚိကၠတ်ထဝ် စကာမံၚ်လၟုဟ်ဂှ် ဟိုတ်နူကဵုက္ဍန်ဂြက်မံၚ်တုဲ ကာလသိုၚ်ခၞံ ၝောံခန်သ္ၚိကၠတ်ထဝ်တုဲဒှ်မ္ဂး ညးစၞးဗော်ပရေၚ်ဍုၚ်ကွာန်တံ သွက်ဂွံတိုန်စိုပ်ကောံဓရီုကၠတ်ထဝ် အခေါၚ်နွံရောၚ် ဂွံတီကေတ်ရ။