ခမဳသၚ်ဒေသဖာလိန်တံ အာဆဵုဂဗလဝ်ကဵု ဥက္ကဌကၠတ်ထဝ် တွဵုရးဍုၚ်မန်၊ ဝန်ဇၞော်၊ ဝန်ဇၞော်ပရေၚ်ပိုန်ဒြပ်ကဵု ကိုန်အစဳဇန် ပ္ဍဲဂိတုဒဳဇြေမ်ဗာ ၁၅ တုဲကၠုၚ်ဏံဂှ် အာတ်မိက်ဒုၚ်ဂုဏ် သွက်ဂွံဒေံါကဵု ကိုန်အစဳဇန်ရုၚ်စက်တၟံချးဂှ်တုဲ အပ္ဍဲတ္ၚဲဂှ်ဟေၚ် စကံက်စၟတ်တဲ ဒစဵုဒစးရ။
“ ပြဟ်ဟ်ဏံ ကံက်ဂွံလဝ် ကွာန်အၚ်ဒၚ် မွဲကွာန်ဓဝ်ရ၊ ရဲလိက်တၞးစၟတ်သမ္တီကောန်ဍုၚ် နွံဂှ်ဟေၚ် ကံက်အာစၟတ်တဲ ညးဒစဵုဒစး ကိုန်အစဳဇန် ရုၚ်စက်တၟံချးရ＂ သာ်ဝွံ တၠဂုဏ်နန္ဒက မြော်ဟီုရ။
ကွာန်အၚ်ဒၚ်ဂှ် လၟိဟ်သ္ၚိနွံၜိုတ် ၅၀၀ ပြၚ်တုဲ ညးဟွံထပက်စၟတ်တဲ ဒစဵုဒစး ကိုန်အစဳဇန်ရုၚ်စက်တၟံချးဂှ် နွံၜိုတ် ၁၅ သ္ၚိဓဝ်ရဏောၚ်၊ ဂွံထ္ၜးသက်သဳ နကဵုဆန္ဒ ညးတၠခန္ဓဍာံဍာံမာန် အဃောထပက်မံၚ်စၟတ်တဲဂှ် ကေတ်လဝ်ဗီုရုပ်ရ သာ်ဝွံ တၠဂုဏ်နန္ဒက မြော်ဟီုပၠန်ရ။
လၟုဟ်ပြဟ်ဟ်ဏံ ကံက်ဂွံလဝ်စၟတ်တဲ ညးဒစဵုဒစး ကိုန်အစဳဇန်ရုၚ်စက်တၟံချးဂှ် ၜိုတ် ၁၀၀၀ ပြၚ်ၚ် တုဲမံၚ်ရ၊ ဂတနူဏံလေဝ် ဆက်ကံက်အာစၟတ်တဲ ပ္ဍဲသ္ကုတ်ဒေသဖာလိန် မပ္တံကွာန်သၞေဟ်ဇၞူ၊ သာဲဂြာံ၊ သၞေဟ်ကြုက်၊ ပလိုၚ်သေံ၊ ကွာန်တၟိသၞေဟ်ဓမၚ်တံ နွံရောၚ်ဂှ် ဂွံတီကေတ် ပ္ဍဲပဲါကောံဓရီု ဂကောံညဳသၟဟ်ဒေသဖာလိန် ကၠောန်ဗဒှ်လဝ် ဒၞာဲဘာလကျာ် ကွာန်သၞေဟ်ဇၞူ (ဂိတုဒဳဇြေမ်ဗာ ၁၉) ဂှ်ရ။
ဥူမေန်ကျဳယှုၚ် ညးထ္ပက်စၟတ်တဲဒစဵုဒစး ဂှ်＂ကိုန်အစဳဇန်ဏံ ပိုယ်တံ ဆလအ်လေဝ် ဟွံမွဲပၟိက်ပုဟ်၊ ဒေသပိုယ် ဂွံလီုလာ်အာဂှ်လေဝ် ပိုယ်ဟွံမွဲပၟိက်ပုဟ်၊ ဟို်တ်ဂှ်ရ ပိုယ်ဒးထ္ပက်စၟတ်တဲ ဒစဵုဒစး＂ သာ်ဝွံ ဟီုရ။
စၟတ်တဲကံက်ဂွံလဝ်တံဂှ် ပလံၚ်ဗစိုပ်ကဵု အလဵုအသဳတွဵုရး၊ အလဵုအသဳကၟိန်ဍုၚ်၊ သီုကဵု ဌာနဆေၚ်စပ်တံဂှ်ရောၚ် တၠဂုဏ်အ္စာ မြော်ဟီုရ။
တုပ်သာ်ဂှ်ကီု ဂကောံရေၚ်တၠုၚ်ဖိုလ်မှာဇန်ဍုၚ်ရေဝ် YSS ဂှ်လေဝ် စၟတ်တဲဒဵုဒစး ကိုန်အစဳဇန်ရုၚ်စက်တၟံချးအၚ်ဒၚ် ဗၞတ် ၅၀၀၀ ဂှ် စနူကၞောတ်ဂိတုအဝ်ဂါတ်တုဲ ကံက်တြးပ္တိတ်လဝ် အကြာပွဳပွူကိုန်အစဳဇန်ဂှ်ရ။
တုဲပၠန် ဂိတုဒဳဇြေမ်ဗာ ၁၄ လောန်ကၠုၚ်ဏံဂှ် ဂကောံ YSS အာက္ဍိုပ်တုဲ ညးဒစဵုဒစး ကိုန်အစဳဇန် ရုၚ်စက်တၟံချးအၚ်ဒၚ် ၜိုတ် (၄၀၀) တၠပြၚ်ၚ်တံ ချဳဒရာၚ်ထ္ၜ့းဆန္ဒ ကွာ်ဂၠံၚ်လ္တူဍုၚ်ရေဝ်ရ။
ဂကောံညဳသၟဟ်ဒေသဖာလိန်ဂှ် ဒက်ပ္တန်လဝ် ပ္ဍဲကၞောတ်သၞာံ ၂၀၁၃ တုဲ ရန်တၟံကဵု ရဲဒေသတံ ဂွံညဳသၟဟ်ကီု၊ အကြာဒေသတံ အန္တရာယ်ဒှ်ကၠုၚ်မ္ဂး ပံၚ်ကောံတုဲ ဂွံပသောၚ်အာကီုတုဲ ဇၟာပ်တ္ၚဲတိၚ် ကၠာဂိတုဟွံအိုတ်ဂှ် ကောံဓရီုသဳကၠဳမံၚ် လၟေၚ်ဂိတုရ။