“အတိုၚ်ဖျေံလဝ် သ္ဂုတ်သွာတ်ဗော်မ္ဂး ဇၟာပ်ကောန်ဂကူမန် ပေၚ်အာယုက် ၁၈ တံ မွဲအခန်မွဲကဏ္ဍ၊ မွဲဒကုတ်မွဲဒကဴ ညံၚ်ဂွံ ယိုက်ဂၠေၚ်တာလျိုၚ်မာန်၊ ဆဂးဇၟာပ်မၞိဟ်ပေၚ်အာယုက် ၁၈ ဒးဗ္တောန်ကွတ်ပၞာန်ဟီုဂှ် လၟုဟ်ပိုယ်တံကၠောန်ဟွံဂွံဏီပုဟ် ＂ သာ်ဏံ သကိုပ်တမ်ဒပ်လၟိဟ် ၄ ဟီုရ။
ဘာကွတ်ပၞာန်တုဲကၠုၚ်ဏံ ပ္ဍဲကဵုအကြာ သၞာံ ၂၀၁၄ ကၠောံ ၂၀၁၅ ဏံဂှ် ပံက်ကၠုၚ်လဝ် ပ္ဍဲခရိုၚ်သဓီု တမ်ဒပ်လၟိဟ် ၄ လၟေၚ်ဘာ ဗၞတ် ၁၀၇ ဝါ၊ ဂတနူဏံသွက်ဂွံပံက်အာဘာ လၟေၚ် ၁၀၈ ဝါဂှ် စဳဇန်လဝ် သွက်ဂွံပံက်အာ ဒၞာဲခရိုၚ်ထဝဲါနွံရောၚ် သာ်ဏံ ဆက်ဟီုရ။
နကဵုတၚ်ရန်တၟံ ဂတနူဏံ သွက်ဂွံပံက်အာ ဘာကွတ်ပၞာန် ပံက်အာဘာကွတ်ပၞာန် ပ္ဍဲခရိုၚ်ထဝဲါနွံတုဲ သွက်ဂွံကၠောန်အာ နေလၟၚ်အဆက်ဆက်ဂှ် စဳဇန်လဝ်နွံမံၚ်ရာၚ်ဂွံတီကေတ်ရ။
＂မူဟိုတ်ရောဟီုတှေ် ကာလဗော်ပိုယ်သ္ပပေဲါဆဵုဂဗသောၚ်ကလးကဵု ညးဍုၚ်ကွာန်တှေ် ညးဍုၚ်ကွာန်တံဂှ် တိုန်စိုပ်အောန်၊ ကောန်ဂကူပိုဲဂှ် ဟွံကၠိုဟ်လဝ်ဏီပုဟ်ဟိုတ်ဂှ်ရ ပိုယ်ဂွံပံက်ဘာကွတ်ပၞာန် ဇၟာပ်မၞိဟ်ပေၚ်အာယုက် ၁၈ ဂှ် ဍေံဟွံဒှ်၊ ဘာကွတ်ပၞာန်ပိုယ်ဏံဂှ် ညးဂလိုၚ်စှေ်စိုတ်မှ ပိုယ်ကၠောန်ဂွံ၊ဇကုလေပ်လဝ်နူဘာဏံတုဲတှေ် ၝဇကုလေပ်လဝ်ဏံ ဇကုဂွံစဵုဒၞာမာန် ဇကုဂွံရပ်စပ်သုၚ်စောဲမာန် ＂ သာ်ဏံ နာဲထဝ်နွံ ညးဆက်ဟီုရ။
သွက်ဂွံတိုန်ဘာကွတ်ပၞာန်ဏံဂှ် မၞိဟ်အာယုက် အကြာ ၁၈ သၞာံကဵု ၄၅ သၞာံဒးနွံ၊ လၟိဟ်မၞိဟ်အောန်အိုတ္ၜိုတ် ၃၀ တၠ ဒှ်မှ နူကဵုဗော်တံ ကဵုဘာရ၊ ယဝ်ခါရ မိက်ဂွံတိုန်ဘာကွတ်ပၞာန်မ္ဂး ကေတ်အဆက်ကဵုဂကောံညးအုပ်ဓုပ်ကွာန်တံကီု သီုကဵု ရုၚ်ဆက်ဆောံတံမာန်ဂှ် ဂွံတီကေတ်ရ။
＂တိုန်ဘာဏံတုဲ ဂွံတိုန်လညာတ်ဏောၚ်၊ ပညာကွတ်ပၞာန်ဇကုဂွံလဝ်ဏံ ဍေံတၟေၚ်နူပညာတၞဟ်ဟ်တၟာဂလိုၚ်၊ ကွတ်ဇကုလေပ်လဝ်ဏံ အရၚ်ဂွံစဵုဒၞာဇကုဇကုကီု၊ကွာန်ဇကုကီု၊ ဂကူဇကုကီုဏောၚ် ＂ သာ်ဏံ ကွးဘာကွတ်ပၞာန်မွဲတၠ မာံတိၚ်သီု ဟီုရ။
ဘာကွတ်ပၞာန်ဝွံ ပံက်ဂွံလဝ် လၟေၚ် ၁၀၇ ဝါ ဒှ်တုဲ၊ ပ္ဍဲကဵုခရိုၚ်သဓီု တမ်ဒပ်လၟိဟ် ၄ ဏံသၟးဂှ် အပ္ဍဲသၞာံ ၂၀၁၂ ဂှ်မွဲဝါ၊ သၞာံ ၂၀၁၄ ကၠောံ ၂၀၁၅ ဏံမွဲဝါ ဗၞတ် ၂ ဝါ ပံက်လဝ်ဘာပၞာန်ဂှ် ဂွံတီကေတ်ရ။