ဟီုထ်ၜး အခိၚ်ဆဵုဂဗညးဂှ်ရ။
ကမ္မတဳကေၚ်ကာ နာဲတၠညးဝွံ ဒေံါဇူနုက်တိတ်နူဗော်ဍုၚ်မန်တၟိတုဲ အဃောညးချဳဒရာၚ်ဒၟံၚ် သွက်အ လံၚ်အမာတ်မန်တံ ဂွံဇၞးမာဲဂှ် ဟီုထ်ၜးအခိၚ်ဆဵုဂဗကဵုညး အံက်တဝ်ဗါ ၁၂ ပ္ဍဲရာမည ဟိုဝ်တေဝ် ဍုၚ်မတ် မလီုရ။
‘နကဵုအဲဂှ်တှေ် ပေဲါဗ္တိုက်ရပ်လွဟ်ဂှ် ဒှ်မံၚ်အဓိကရောၚ်ဂှ် အဲဒုၚ်ဂိုၚ်ကေတ်လဝ်ဗီုဂှ်လၟိုန်ရ၊ ဆဂးတှေ် ပ္ဍ္ဍဲကဵုကာလပေဲါရုဲမာဲမွဲလစုတ်ဏံဂှ် သွက်ကောန်ဂကူမန်လေဝ်အဓိကပၟိက်ဇၞော်မံၚ်ကီုရောၚ်တုဲတှေ် မုဒှ်ဒှ် အဲနုက်တိတ်ထောံနူဗော်တုဲတှေ် လုပ်ဘိုၚ်ကၠောန်ချဳဒရာၚ်အာကိစ္စပေဲါရုဲမာဲဏံဏောၚ်’ နာဲတၠညး(ကမ္မ တဳကေၚ်ကာ ဒေံါဇူနူဗော်ဍုၚ်မန်တၟိ)ဟီုထ်ၜးရ။
အခိၚ်ကာလဇြဟတ်ဓရိုဟ် ကိစ္စထ္ပက်စၟတ်တဲဒေံါပန်ပှော်အလုံဍုၚ် NCA ဏံဂှ် နကဵုကမ္မတဳကေၚ်ကာ ဗော်ဍုၚ်မန်တၟိမွဲတၠ နုက်တိတ်အာနူဗော်သာ်ဏံဂှ် ခမဳသၚ် ညးဍုၚ်ကွာန်ဂမၠိုၚ် ဟီုဂးပါ်ပဲါ ကၠုၚ်လ္တူဗော် ဍုၚ်မန်တၟိနွံကၠုၚ်ရ။
‘ဗီုလဵုဒှ်ဒှ်ရ ပရေၚ်ဍုၚ်ကွာန်အခိၚ်ဏံဂှ်တှေ် ဇကုကဵုဇကု ဒးညဳညးကံရောၚ်၊ ဗော်သၟးဟွံသေၚ် ဒၞာဲလဵု ဒှ်ဒှ်ရ ၂၀၁၅ ဏံဂှ်ပြံၚ်လှာဲဗီုလဵုဍေံဒှ်ဟွံတီဏီပုဟ်၊ တ္ၚဲဏံဂှ် အကြာကောန်ဂကူပိုဲ တုဲတှေ် အကြာကောန် ဍုၚ်အရၚ် တုဲမှ ပိုဲဂွံအာပရေၚ်ကၟိန်ဍုၚ်တေံဂွံ’ သာ်ဏံ ဖက်ဆောညးအုပ်ကာ ဂကောံပံၚ်ကောံပရေၚ်ဂကူ မန် နာဲလျးရတ် ဟီုရ။
နာဲတၠညးဂှ် ဒှ်ညးစိုတ်ထတ်ကဵု ပရေၚ်ပေဲါရုဲမာဲ ၂၀၁၅ ဏံတုဲ အလံၚ်အမာတ်မန်တအ်သွက်ဂွံဇၞးမာဲဂှ် နကဵုညးလုပ်ဘိုၚ်ကၠောန်ချဳဒရာၚ်ပညဳပညပ်ဒၟံၚ် နဇိုၚ် နတဲရ၊ လ္တူ နာဲတၠညး လုပ်ဘိုၚ်ကၠောန်ချဳဒရာၚ် ဒၟံၚ်ဂှ် ဗၠေတ်ဒၟံၚ်ကဵု မူဝါဒဂၠံၚ်တရဴဗော်ဍုၚ်မန်တၟိရောၚ်ဂးတုဲ နူကဵု ကမ္မတဳကေၚ်ကာဂှ် ကိုပ်ကၠာ ဒးဒုၚ် ယှအ်ဖျေံတာလျိုၚ်ညး နဒဒှ် ဗဟဵုကမ္မတဳမွဲရ။
‘အခိၚ်ဗဟဵုကော် စဴအာဗဟဵုစိုပ်တေံဂှ် ဗဟဵုယှအ်ဖျေံတာလျိုၚ် ဗဟဵုကမ္မတဳရ၊ အတိုၚ်မုလေဝ်ဟွံတၟေၚ် မံၚ်ရတှေ် မုဒှ်ဒှ်ရ အဲလုပ်ကၠောန်ဒတုဲထောံသွက်ပေဲါရုဲမာဲဏံတွဵုရောၚ် ဖျေံစိုတ်တုဲတှေ် အဲပ္တိုန်လိက်နုက် တိတ်နူဗော်ရ’ သာ်ဏံ နာဲတၠညး ဆက်လဴကလးရ။
ကမ္မတဳကေၚ်ကာ နာဲတၠညး ဝွံ ကေတ်ကၠုၚ်လဝ်တာလျိုၚ် ပ္ဍဲဗော်ကဆံၚ်ၚ်လအ်ပွိုၚ် ၂၈ သၞာံကဵု ၁ တ္ၚဲတုဲ သေပ်တေမ်ဗါ ၈ ဂှ်ပ္တိုန်လိက် အာတ်အခေါၚ်ဇူပွိုၚ်ပိဂိတုရ၊ ၂၁ သေပ်တေမ်ဗါ ဂှ် ဒးဒုၚ်ယှအ် ဖျေံတာ လျိုၚ်ရ၊ အဆက်ဂှ် နကဵုဗဟဵုသ္ၚဳဂၠိပ်တုဲ ဂိတုသေပ်တေမ်ဗါ ၂၄ ဂှ် ကဵုအခေါၚ် နုက်တိတ်အာ နူဗော်ဍုၚ် မန်တၟိရ။