ရ။
“ပ္ဍဲပွိုၚ်ဍုၚ်ရေဝ်ဏံ ဗော်လုပ်ပြိုၚ်အဓိက ဗော်လဵုရောဂှ် တီမံၚ် သီုဖ်အိုတ်ရ။ ဗော်လ္ၚဵုလ္ၚဵု ဟီုတွံကၠုၚ်ဂှ် ရံၚ်ဗော်ညိ၊ လ္ပရံၚ်ပူဂဵုညိ ဂးရ။ပိုဲဂှ် ဗီုဂှ်ဟွံသေၚ် ရံၚ်သီုဗော် ရံၚ်သီုပူဂဵုညိ။ မၞိဟ်ကၠောန်ကလောန် ဍာံဍာံမာန်ဂှ်ရ မှာဇန်တံ စုတ်ကဵုမာဲညိ” သာ်ဝွံ ဥုတိတ်ဝေန် လၟောဝ်ညးစၞး (ဂကူဗၟာ) သွက်ကၠတ်ထဝ် တွဵုရးမန် နူဗော်ပျဳခါၚ်ဖျဵု ဟီုရ။
ညးစၞး ဗော်ပျဳခါၚ်ဖျဵု ဂှ် ဆၜိုတ်ဒှ်ကဵုဒှ် လုပ်ဒုၚ်ရုဲ ဟွံသေၚ်၊ နူဗော် ခ္ဍိုဟ်ဂြိုက် အစောံစရာဲ အသဝ်ဂုန် ပူဂဵု တံဂှ်တုဲမှ ကဵုလုပ်ပြိုၚ်ဏောၚ်ဂှ်လေဝ် ညးတေံဟီုရ။
ပ္ဍဲပေါဲဟီုတွံ ပရေၚ်တံၚ်ဂြဲမာဲဂှ်ဝွံ စၞးဗော် ပျဳခါၚ်ဖျဵု ညးစၞး မသုန်တလ လုပ်ပြိုၚ်ရုဲ ပ္ဍဲပွိုၚ်ဍုၚ်ရေဝ်ဏောၚ် ဒှ်တုဲ သွက်ကၠတ်ထဝ် တွဵုရးမန်ဂှ် ညးစၞးဗော် ပျဳခါၚ်ဖျဵု ဂကူဗၟာ ကဵု ဂကူကရေၚ်တံ တိုန်ဟီုတွံတုဲ မှာဇန် ကေုာံ ကောန်ဗော် နူကဵုကွာန် ပွဳပွူဍုၚ်ရေဝ်ကဵု ရဲနွံလ္တူဍုၚ်ရေဝ်တံ သီုဖ်အိုတ် ညးတိုန်စိုပ် နွံၜိုတ် ၂၀၀၀ (ၜါလ္ၚီ) တလ ရ။
ပ္ဍဲပွိုၚ်ဍုၚ်ရေဝ်ဝွံ ကောန်ဂကူမန်ရ တန်တဴဂၠိုၚ်အိုတ်တုဲ လၟိဟ်ဗွဲမအောန်ဂှ် ဒှ်ဂကူဗၟာကဵု ဂကူကရေၚ် ရ။ ဗော်ပျဳခါၚ်ဖျဵုဂှ် ဗော်ကောန်ဂကူဗၟာ ဏောၚ် ကောန်ဍုၚ်အရၚ်တံ လ္ပညာတ်ကေတ် ဗီုဂှ်ညိ ဂှ်လေဝ် ကောန်မန် မွဲတလ နွံယၟု ဥုသဵုထောန် ညးအုပ်ကာဗော် ပျဳခါၚ်ဖျဵု ခရိုၚ်မတ်မလီု ဂးတဴသာ်ဂှ်ရ။
“ ဗွဲမဂၠိုၚ် ညာတ်မံၚ်ဗော်ပိုဲ ဗော်ဗၟာရ။ ဟီုဍာံဍာံတှေ် ဗော်ပိုဲဂှ် ပ္တန်လဝ် နကဵုကောန်ဍုၚ်အရၚ်တံ ကီုရ။ မန်လေဝ်ပါ၊ ကရေၚ်လေဝ် ပါမံၚ်ကီုဂှ် ညးတံညာတ်မံၚ်ရသေၚ်ဟာ ပ္ဍဲကဵုပေါဲဏံ” သာ်ဝွံ ဥုသဵုထောန် အဆံၚ်ကၠတ်ထဝ် ကောန်ဂကူ လုပ်ပြိုၚ်ရုဲ ပ္ဍဲဒေသမာဲ လၟိဟ် (၈) ပွိုၚ်ဍုၚ်ရေဝ် ဟီုရ။
သွက်ဂွံဇၞးမာဲ ပ္ဍဲပေါဲရုဲမာဲ သၞာံ ၂၀၁၅၊ ဂိတုနဝ်ဝေမ်ဗာ ၈ ဏံဂှ် ဗော် NLD ရပ်လဝ် ရမျှာၚ်ကမြေဲ ပဠေဝ်သၞောဝ် ၂၀၀၈ ဂှ်ဏောၚ်ဒှ်တုဲ ကာလ ညးဍုၚ်ကွာန်တံ စုတ်မာဲမ္ဂး လ္ပရံၚ်လ္တူပူဂဵုညိ ရံၚ်ရုဲစှ်ဗော်တုဲ ကဵုမာဲအိုတ်ညိ သာ်ဝွံ ဒဝ်အိုၚ်သာန်သုကျဳ ဥက္ကဌ ဗော် NLD ဟီုဖ္တိုက်ဖ်ေအာဝ်လဝ်ရ။
ရန်ကဵု သွက်ဂွံဇၞး ပေါဲရုဲမာဲတုဲ ဥုတေန်ဥု ဥက္ကဌ ဂကောံကေတ်ဇၞးမာဲ (ဗဟဵု) နူNLD စှေ်စိုပ်ကၠုၚ်ရေဝ်တုဲ ပ္ဍဲအံက်တဝ်ဗာ ၈ ဂှ် စှေ်ပရေၚ်စန်ဒက် ကၠောန်သ္ပဏာ ပေါဲပအပ် လၟောဝ်ညးစၞး ဗော်ညးတံ ပ္ဍဲကဵုဖလာတ် ဍုၚ်ရေဝ်ဂှ် တုဲမံၚ်ကီုရ။
ပ္ဍဲပေါဲရုဲမာဲ သၞာံ ၂၀၁၀ တေံ ပ္ဍဲပွိုၚ်ဍုၚ်ရေဝ်ဏံ ဒေသမာဲ သွက်ကၠတ်ထဝ် ကောန်ဍုၚ်ကွာန်ဂှ် မွဲဒၞါဲ၊ သွက်ကၠတ်ထဝ် ကောန်ဂကူဂှ်လေဝ် မွဲဒၞါဲ၊ သွက်ကၠတ်ထဝ်တွဵုရးဂှ် ၂ ဒၞါဲ နွံကၠုၚ်တုဲ၊ ပ္ဍဲပေါဲရုဲမာဲ သၞာံ ၂၀၁၅ ဏံဂှ် သွက်ကၠတ်ထဝ် ကောန်ဂကူ က္လိဂွံ ၂ ဒၞါဲရ။
ပ္ဍဲတွဵုရးမန်ဝွံ သွက်ကေၚ်ကာ ကောန်ဍုၚ်အရၚ်မ္ဂး ဗၟာ၊ ကရေၚ် ၊ ပအိုအ် မသ္ပစၞးကဵု ကောန်ဍုၚ်အရၚ်ဂှ် နွံ ၃ ဒၞါဲတုဲ ပ္ဍဲသီု ၃ ဒၞါဲဏံဂှ် ဗော်ဇၞော် ၜါဗော် မတွံဂး ဗော် NLD ကဵု ဗော်ပျဳခါၚ်ဖျဵု တံရ လုပ်ပြိုၚ်အာဏောၚ်။