သၞာံဂတဂတတေံ ဂွံၜံက်ခဲါအာ ပရေၚ်သုတေသနဝၚ်ဍုၚ်သုဝဏ္ဏဘူမိဂှ် နကဵုအစဳအဇန်အလဵုအသဳတွဵုရးဍုၚ်မန် ဒပ်ဒၞးလဝ်တုဲ မၚ်မွဲထိၚ်ဒဝ်အာ ဒၞာဲကၟာၚ်ဍုၚ်တြေံ ပ္ဍဲဍုၚ်သဓီုရောၚ် ဂွံတီကေတ်ရ။
“လပါ်သဓီုဏံလေဝ် မုပိုဲဟွံဂွံကၠောန်ဏီပုဟ်။ ၜိုတ်အာလ္ၚတ်မံၚ်ဓဝ်ရ။ ဒၞာဲလၟုဟ် ကၟာၚ်ဍုၚ်ဂှ် ညံၚ်ဂွိုအ်လီုအာဂှ် ပိုဲ ဒပ် (ဒၞး) ထောံဏောၚ်။ စဵုဂေတ်ကဵုဇုက်ပသဲတုဲ ထိၚ်ထောံဏောၚ်။ ပိုဲပတိုန်လဝ် လၟေၚ်ကမၠောန်တုဲယျ။ သကိုပ် ဝန်ဇၞော်လေဝ် တုပ်လဝ်စိုတ်တုဲယျ။ ပိုဲဆက်ကၠောန်ရဏောၚ်” သာ်ဝွံ ညးလျိုၚ်ပရေၚ်ယေန်သၞာၚ် ဝန်ဇၞော်တွဵုရး ဍုၚ်မန် ဒံက်တာမာံနဲသဵု ဟီုကဵုသၞံၚ်တိုၚ်ရ။
နကဵုအစဳဇန်အလဵုအသဳတွဵုရးဍုၚ်မန် သြန်ဒါန် (ဇေကမ္ဘာဦးခၚ်ရွှေ) မကဵုလဝ် နွံမံၚ်(၃၀၀) ကိုဋ် ပအပ်လဝ်ပ္ဍဲ ဗါဏ်ဂှ် ကလိဂွံပ္ကဴသြန် ဗၞတ် (၃၅) ကိုဋ်တုဲ ဒၞာဲမကြပ်ကဵုဘာလကျာ်မူလမေန်ကောန် (ဗဒဲါသၠာတ်က်ၜၚ်ကျာတြေံ) ဍုၚ်သဓီု တိကုန်ကၟာၚ်ဍုၚ် မနွံဇမၠိၚ် (၁၃၀၀) ပေဂှ် မၚ်မွဲစဵုဗိုၚ်ဒၞးပးလဝ်ရောၚ်။
ပ္ဍဲကဵုသၞာံဘဏ္ဍာ (၂၀၁၅-၁၆) ဂှ် သွက်ဂွံၜံက်ခဲါဒေသသုဝဏ္ဏဘူမိ (ပွိုၚ်ဍုၚ်သဓီုကဵု ပွိုၚ်ဍုၚ်ၜဳကလေၚ်) ဂှ် နူကဵုအ လဵဵုအသဳကၟိန်ဍုၚ် ဖျေံလဝ်ကဵုသြန်ဘဏ္ဍာ (၈၀၀) ကိုဋ်ဂှ် ပရေၚ်ၜံက်ခဲါ အာစိုပ်ဒတုဲရောၚ် ဂွံတီကေတ်ရ။
ပရေၚ်ၜံက်ခဲါအလန်ဏံဂှ် ဆဵုညာတ်စမြိုၚ် ညံၚ်ရဴဒၞာဲမၞိဟ်ဒၟံၚ်တန်တဴ နကဵုဗဒမ်ဍောတ်တ်ဗွဲမဂၠိုၚ်ကီု ပ္ဍဲကဵုဗဒမ်မွဲဂှ် ဂွံဆဵုကေတ်ကပေါတ်စကာအပ္ဍဲသ္ၚိ မပ္တံကဵုပ္ၚာန်ခေါ်ခရော်တံဂှ် နွံပေၚ်ထာတ်ရောၚ်။ ဒၞာဲမၜံက်ခဲါလဝ်တုဲတုဲတံဂှ် ညံၚ်ဂွံကၟဳလဝ်ကဵုသောတ်ကဵုဒယိုၚ်ပသဲဂှ် ဖန်ဇန်လဝ်တုဲရောၚ် ဂးရ။
သွက်ဂွံဒှ်ပရေၚ်ၜံက်ခဲါသၞာံဂတတေံဂှ် နူကဵုအလဵုအသဳတွဵုရးဍုၚ်မန် အာတ်မိက်လဝ်သြန်ဘဏ္ဍာဗၞတ်ၜါဆကီုလေဝ် ဗီုပြၚ်ကလိဂွံမံၚ်လၟုဟ်ဂှ် လၟိဟ်အောန်ကွေံကွေံတုဲ ညံၚ်ရဴခဲါလဝ်ဝၚ်ဍုၚ်ပျူ ဟာန်လေန်တံကီု ဖျေံကဵုဘဏ္ဍာထေက် ရောၚ် တၠပညာဝၚ်မန်တံ ဟီုဂးမံၚ်ရ။
“ဆဵုပ္ဍဲဝၚ်၊ သၠရိုတ်တံ လိက်တြေံတံ လိက်တၟံဆဵုလဝ် ပ္ဍဲကျာ်သဓီုတံဂှ် ဝၚ်မနုဟဝ်ဂှ် နွံမံၚ်တုဲတုဲရ။ အေကၠာနူဂှ် ဂွံထ်ၜးသက်သဳ ချိုတ်တ်ပၠိုတ်တ်မာန်ဂှ် ပိုဲဒးခဲါဏောၚ်။ ယဝ်ရပိုဲဆဵုယျတှေ် ညးတၞဟ်သက်ကယျာန်ဟွံမွဲရ” သာ်ဝွံ တၠပညာဝၚ်မန် အ္စာနာဲမိုၚ်တဝ် ဟီုကဵုသၞံၚ်တိုၚ်ရ။
ကၠာနူကဵုကျာ်တြဲဟွံကတဵုဒှ်ကျာ်ဏီ ဘဳသဳ (၅၀၀) သၞာံပြၚ်တေံ မၚ်ဗၠာဲသုဓမာနဝ ပတန်လဝ်ဍုၚ် ဗဒဲါကြုၚ်ထဝ် တိတ်တုဲ တၚ်လဝ်ယၟုဍုၚ်သုဝဏ္ဏဘူမိရောၚ် ဂွံဆဵုညာတ်ကေတ် ပ္ဍဲဝၚ်ဍုၚ်သုဝဏ္ဏဘူမိရောၚ်။