ဂကောံဗ္တောန်လိက်ပတ်မန် ကေုာံ ယေန်သၞာၚ်ဗုဒ္ဓဘာသာ ပွိုၚ်ဍုၚ်မုဟ်ဍုၚ် က္ဍိုက်ပ်တုဲ ကၠောန်ဗဒှ်သ္ဘၚ်သၟာန် သွဟ်လိက် ကဆံၚ်ပွိုၚ်တိုက် အလုံပွိုၚ်ဍုၚ်မုဟ်ဍုၚ် မွဲဗီုပြၚ်ဓဝ်ရောၚ် ဂွံတီကေတ်ရ။
တ္ၚဲဏံ ဂိတုဨဗရေဝ် (၄) ဂှ် ကၠောန်ဗဒှ်သဘၚ်သွဟ်လိက်ဥတုကညၚ်ဂှ် သီုဖအိုတ် (၁၁) ပွိုၚ်တိုက်ဂှ် နကဵုဋ္ဌာန သွဟ်လိက် (၂၁) ဋ္ဌာနနွံတုဲ ပွိုၚ်တိုက်လ္ၚဵုဂှ်မွဲဋ္ဌာနဟေၚ်၊ ပွိုၚ်တိုက်လ္ၚဵုဂှ် ၜါပိဋ္ဌာနလေဝ် နွံရောၚ်။
“ဗီုပြၚ်သွဟ်လိက်ဂှ်တှေ် နူကဵုပွိုၚ်ဍုၚ်ဂှ် ပတိတ်ပုစ္ဆာ၊ တၞးသွဟ်သီုဖအိုတ်ဂှ် ကောံပ္ဍဲဂအုပ်ရုၚ်ဏောၚ်။ ပကောံတုဲ တှေ် ပ္ဍဲကဵု (၁၁) တိုက်ဂှ် တၞးသွဟ်ဂှ် ပိုဲသၠာဲဂတးတုဲတှေ် စၟဳစၟတ်ဏောၚ်။ စၟဳစၟတ်ဂှ် ပ္ဍဲကဵုဂအုပ်ရုၚ်ပွိုၚ်တိုက်ရ။ သဝ် တ္ၚဲဏံ ညးစၟဳစၟတ်ရ” သာ်ဝွံ ဒု-ဥက္ကဋ္ဌ ဂကောံဗ္တောန်လိက်ပတ်မန် ကေုာံ ယေန်သၞာၚ်ဗုဒ္ဓဘာသာ ပွိုၚ်ဍုၚ်မုဟ်ဍုၚ် အ္စာနာဲမန်ရာဇာ ဟီုကဵုသၞံၚ်တိုၚ် ပ္ဍဲဂိတုဨဗရေဝ် အခိၚ်နူဂယးရ။
တၞးသွဟ်ကွးဘာကဆံၚ်ပွိုၚ်တိုက်တံဂှ် ပကောံနၚ်ပ္ဍဲရုၚ်ပွိုၚ်ဍုၚ်တုဲ နူကဵုဂကောံပွိုၚ်ဍုၚ်ဂှ် သၠာဲဂတးကဵုတၞးသွဟ်ကု ပွိုၚ်တိုက်တၞဟ်ဟ် ကဵုစၟဳစၟတ်ပတိတ်ကဵုစရၚ်အံၚ်ရ။ တ္ၚဲယးဂှ် သၠာဲဂတးစရၚ်အံၚ်ပ္ဍဲရုၚ်ပွိုၚ်ဍုၚ်ပၠန်ရောၚ်။
“ပ္ဍဲကဵုသၠာဲဂတးစၟဳစၟတ်ဂှ် တၚ်ခိုဟ်လေဝ်နွံ၊ တၚ်ပရေံလေဝ်နွံရ။ တၚ်ခိုဟ်ဂှ် ပရေၚ်ဆန္ဒဂတိအကြာပ္ဍဲပွိုၚ်တိုက်ဇကု ဂှ် ဟွံမွဲရပုဟ်။ တၚ်ပရေံဂှ် သၞာံလ္ၚဵုဂှ်တှေ် စရၚ်အံၚ်ဇကု ဂွံနၚ်နူပွိုၚ်တိုက်တၞဟ်ဟ်ချူနၚ်ကဵုဂှ် ယောၚ်ယာနွံမံၚ်ညိ” သာ်ဝွံ အ္စာဘာမန်မွဲတၠ ဟီုရ။
ၜိုန်ဂှ်လေဝ် ပရေၚ်သၠာဲဂတးစၟဳစၟတ်ဏံ ပြသၞာအောန်တုဲ ပရေၚ်ဂကောံသ္ဂောံတဴတက်တိုန်ဂှ် ဟီုဂးလောဲသွာရောၚ် နာဲမန်ရာဇာ သောၚ်ကလးလဝ်ရ။
ဇၟာပ်ပ်ပွိုၚ်တိုက်ညးကဵုညး တန်ညးကဵုညး မွဲမွဲတန် ကွးဘာသ္ကေက်သ္ကာ (ပ-ဒု-တ) ပိတၠ ရုဲစှ်လဝ်ကဵုဂှ်ဟေၚ် ပ္ဍဲကဵုဂိ တုဨဗရေဝ် (၇) ဂှ် လုပ်ပြိုၚ်သွဟ်ကဆံၚ်ပွိုၚ်ဍုၚ် ပ္ဍဲဘာအသောကရာံ ဍုၚ်မုဟ်ဍုၚ်ပၠန်ရောၚ်။ ကုကွးဘာသ္ကေက် သ္ကာတံဂှ် ဂိတုဨဗရေဝ် (၁၀) ဂှ် ကၠောန်ဗဒှ်သ္ဘၚ်ပ္တိုန်ဂုဏ်စရာဲ ပ္ဍဲကဵုဍုၚ်မုဟ်မုဟ်ရောၚ်။
ပ္ဍဲဂကောံပွိုၚ်ဍုၚ်မုဟ်ဍုၚ်ဝွံ ပွိုၚ်တိုက်ကွာန်ၜဝ်-လာံသဴ၊ ပွိုၚ်တိုက်ကွက်ဝါန်-နာၚ်ပြိုၚ်၊ ပွိုၚ်တိုက်ကအ်ခပုၚ်-ကွာန် တာ၊ ပွိုၚ်တိုက်မုဟ်ဍုၚ်၊ ပွိုၚ်တိုက်ဝၚ်ဒုန်၊ ပွိုၚ်တိုက်တဵုဂူ၊ ပွိုၚ်တိုက်နာၚ်သၠုၚ်၊ ပွိုၚ်တိုက်ကၟာဝက်၊ ပွိုၚ်တိုက်ကၠအ် သတ်၊ ပွိုၚ်တိုက်ဒဵုမာဲ-ဆက်တဲ၊ ပွိုၚ်တိုက်သၞေဟ်ဗ္ဒဝ်ဂးတုဲ ပွိုၚ်တိုက်နွံမံၚ် (၁၁) ပွိုၚ်တိုက်ရောၚ်။
နကဵုလိက်မူပွိုၚ်ဍုၚ်မုဟ်ဍုၚ် ကေုာံ လိက်မူအလုံဒေသရးမန်ဂှ် သီုဖအိုတ်စနူတန်ကောန်ၚာ် စဵုကဵုလိက် အခိုက်ကၞာ မန် သီုဖအိုတ် (၁၂) တန်ဝွံ သွက်ကွးဘာဥတုကညၚ် (၉၆၉၁) တၠဂှ် အ္စာဘာစေတနာ (၄၃၀) တၠတံ ဗ္တောန်ထ္ၜး မံၚ်ကဵုရောၚ်။
ဂကောံဗ္တောန်လိက်ပတ်မန်ကေုာံယေန်သၞာၚ်ဗုဒ္ဓဘာသာ ပွိုၚ်ဍုၚ်မုဟ်ဍုၚ်ဝွံ နူကဵုသက္ကရာဇ်ဍုၚ် (၁၃၅၄) သၞာံတေံ ဒက်ပတန်ကၠုၚ်လဝ်တုဲ လၟုဟ်မ္ဂး အာယုက်ဂကောံပေၚ်ကၠုၚ် (၂၄) သၞာံတုဲ သဘၚ်စှေ်ဘာဒုၚ်တၠုၚ်သ္ဘၚ်ရတုသြန် ဏံဝွံ ကၠောန်ဗဒှ်အာပ္ဍဲပွိုၚ်တိုက်မုဟ်ဍုၚ်ရောၚ်။