ဗၟာ  ၊ အၚ်္ဂလိက် ၊  Font ၊  Converter

Breaking News
Home / ပရိုၚ် / စၠောံၚ်ဒၟံၚ်ကွဳစက် နကဵုဖံၚ်ဂၠုၚ် မတ်မလီု ကဵု တ္ကအ်ခၟိုၚ်ဂှ် ဒှ်အန္တရာဲမာန်မံၚ်

စၠောံၚ်ဒၟံၚ်ကွဳစက် နကဵုဖံၚ်ဂၠုၚ် မတ်မလီု ကဵု တ္ကအ်ခၟိုၚ်ဂှ် ဒှ်အန္တရာဲမာန်မံၚ်

သၟာပရိုၚ်ချူ: >

ရိုဟ်ဟ်ဒဒှ်တ္ၚဲ စၠောံဒၟံၚ်ကွဳစက်ဖ္ဍိုက်မၞိဟ် နကဵုဖံၚ်ဂၠုၚ် (ဂၠုၚ်စက်ဍောတ်တ်ၜါမ တောဲပြိုၚ်တုဲသ္ပလဝ်ဖံၚ်) နူကဵုဒဒန်ရာမည (မတ်မလီု) ကၠောံအာကဵုတ္ကအ်ခၟိုၚ် လ္ပာ်တ္ကအ်မုပန်(သၞေဟ်ဂလာ) တေံဂှ် ဒှ်အန္တရာဲလမျီုမာန်မံၚ်ဏောၚ် ရဲဒေသတအ်ဂးရ။

ပ္ဍဲအရာစၠောံဒၟံၚ်ကွဳစက် မတ်မလီုကဵု တ္ကအ်ခၟိုၚ် နကဵုဖံၚ်ဂၠုၚ်သာ်ဏအ်ဂှ် ကွဳစက်ဖ္ဍိုက်မၞိဟ်မွဲမ သီုအာသီုကလေၚ်တှေ် မွဲကိုဋ်ပန်ဠက်၊ ကွဳစက် ထဝ်ဠာဂျဳမွဲမ သီုအာသီုစဴတှေ် မွဲကိုဋ်ၜါဠက် ဒးကဵုခရိတ်ခဒိုအ်ရ။

ဗီုပ္တိုန်ဒၟံၚ်ကွဳစက် လ္တူဖံၚ်ဂၠုၚ် မတ်မလီုကဵု တ္ကအ်ခၟိုၚ် (Facebook တ္ကအ်ခၟိုၚ်)
ဗီုပ္တိုန်ဒၟံၚ်ကွဳစက် လ္တူဖံၚ်ဂၠုၚ် မတ်မလီုကဵု တ္ကအ်ခၟိုၚ် (Facebook တ္ကအ်ခၟိုၚ်)
“ ယဝ်စၠောံကဵု ဇြိတ်တှေ် ၚုဟ်က္ဍၚ်ဟီုကၠာရ အန္တရာဲဍေံဟွံမွဲ။ စၠောံကဵုဖံၚ်ဂၠုၚ်စက်ဍောတ်တ်ဏအ်တှေ် အန္တရာဲဂၠိုၚ်မံၚ်၊ တောဲပြိုၚ်လဝ် ဂၠုၚ်ဍောတ်တ်ၜါမတုဲ ဒးဖ္ဍိုက်ကွဳစက်ဏောၚ်တှေ် ညံၚ်ဂွိုအ်ဒှ် အန္တရာဲဂှ် ပၟိက်ဇၞော်မံၚ်၊ အဃောပ္တိုန်ဂှ်လေဝ် အန္တရာဲဂၠိုၚ်ကွေံကွေံ၊ ဖေက်လေဝ် ဒးဖေက်မံၚ်ဏောၚ်၊ ဟွံမိက်ကဵုကၠောန်ဂှ် ဍာံဍာံရ” ဒဝ်မျာတ်နဝ်သူဇာ ကောန်တ္ကအ်ခၟိုၚ် ဟီုရ။

ယဝ်စၠောံကွဳစက် နကဵုဇြိတ် နူမတ်မလီုကဵု သၞေဟ်ကလုဲတေံမ္ဂး ကွဳစက်မွဲမတှေ် အာကဵုစဴ ဒးကဵုခရိတ် (၇-၈) ကိုဋ်ဒကေဝ်၊ ဇြိတ်မွဲမတှေ် အောန်အိုတ် ကွဳစက်ဒးပေၚ် ၅ မဏောၚ်။ ဗီုစၠောံဒၟံၚ်ကွဳစက် လ္ပာ်သၞေဟ် ဂလာဏအ်ဂှ် အိုတ်ခရိတ်သာကီုလေဝ် အန္တရာဲအောန်ဂၠိုၚ်ကွေံကွေံ ဂွံတီကေတ်ရ။

“အလိုန်လပှ်နွံတှေ် ပိုဲဟွံဖ္ဍိုက်၊ အခိၚ်ဍာ်စှေ်လေဝ် ပိုဲဟွံဖ္ဍိုက်၊ အခိၚ်ဍာ်တိုန် ဍာ်ဂၠိုၚ်ဂှ် ဒးဂွါန်တိုန်ပရၚ်ကုန်တှေ် ကွဳစက်က္လိတ်အာတအ် ကဆေဝ်အာတအ်ဂှ်နွံ” နာဲလေန်ထိတ် ရဲဗက်ဂၠုၚ်စက် ဂးရ။

ဟိုတ်နူ ဒးကဵုဒၟံၚ် အခေါန်သၞေဟ်ဂှ်ရ ကိစ္စဒးစၠောံဒၟံၚ်ကွဳစက် နကဵုဂၠုၚ်စက်ဏအ်ဂှ် ၚုဟ်က္ဍၚ်မံၚ်ညိဏီရ။ ယဝ်က္တဵုဒှ်အာ မွဲသာ်ၜါရာတှေ် ဒှ်သဇိုၚ်ဝန် ရဲဂၠုၚ်စက်တအ်ရ။

“ကိစ္စဏအ် တုဲကၠုၚ်ၜိုတ်မွဲသတ္တဟပြၚ်ၚ်တေံ အဲဆက်ဖုၚ်ကဵု ဌာနသဳဗေန်တုဲရ၊ ရဲဒေသတအ်လေဝ် အာတ်ကၠုၚ်အရီုဗၚ် သွက်ဂွံဗိုၚ်ထိၚ်ဒဝ်ကီုရ။ တုဲပၠန် ဒၞါဲလ္ၚဵု ဖ္ဍိုက်မၞိဟ် ဂၠိုၚ်ကွေံကွေံ၊ မၞိဟ်လ္ၚဵုတအ်ပၠန် တ္ၚဲပၠိုတ်ကၠုၚ်တှေ် ဗ္ၜူတိုန်အရက်တှေ် ကိစ္စတအ်ဏအ်လေဝ် ညံၚ်ဂွံဗိုၚ်ထိၚ်ကဵု ဟီုလဝ်ကဵု သဳဗေန် ကီုရ” ဒံက်တာအံၚ်နာၚ်ဥု ဒုက္ကဌ ကၠတ်ထဝ်တွဵုရးမန် ဂးရ။

ကာလလ္ဆောဝ်တှေ် သီုဟွံကဵုသမ္တီ ကုရဲတာလျိုၚ်သၞေဟ်ၜဳမွဲသာ် ရဲဂၠုၚ်တအ်ကဵု ရဲဒေသတအ် ပ္ညဳတုဲတှေ် ဟိုတ်နူ ပ္တိုန်ဖျေံ ဖ္ဍိုက်စၠောံကွဳစက်ဂှ်ရ က္တဵုဒှ်ဟိုတ်နွံကီု ညးဟီုရ။

ကိစ္စ စၠောံဒၟံၚ်ကွဳစက် နကဵုဖံၚ်ဂၠုၚ်ဏအ်ဂှ် ပ္ဍဲသၞာံ ၂၀၁၃ တေံ ညးတာလျိုၚ်သၞေဟ်ၜဳကဵု အလဵုအသဳ တွဵုရးတအ် ပ္ညဳတုပ်စိုတ်ရၚ်သ္ကအ်တုဲ ကဵုလဝ်အခေါၚ်ရဂှ် ဂွံတီကေတ် နူရဲဒေသတအ်ကီုရ။

ဗှ်မာန်မံၚ်

ဝါဒဍုၚ်အေန်ဒဳယစၟဳသ္ၚဳရံၚ်ဗၟံက် Act East Policy ကေုာံ ဒေသမဏိပူရ ဟွံၜိုဟ်လလမ်

ဝါဒဍုၚ်အေန်ဒဳယစၟဳသ္ၚဳရံၚ်ဗၟံက် Act East Policy ဟိုတ်နူဂွံအခေါၚ်တိုန်စိုပ် ပ္ဍဲပေဲါသဳကၠဳ အ္စာလိက်ပရိုၚ်ဍုၚ်ဗၟာ-အေန်ဒဳယ နကဵုအစဳဇန် ဂတးဂတန်ရေၚ်တၠုၚ်မဳဒဳယာ ကေုာံ အပ္ဍဲဒေသ အကြာဍုၚ်ဗၟာကဵု Related

Leave a Reply

%d bloggers like this: