သွက်ကောန်ဂကူ ကောန်ဍုၚ်အရၚ် မတန်တဴဒၟံၚ် ပ္ဍဲတွဵုရးဍုၚ်မန် ကေုာံ ပ္ၚံက်ၜဳမုဟ်တၟံတအ် သ္ဂောံဇၞော်မောဝ် ဖေါအ်ဗြေဝ်ကီု၊ သ္ဂောံဂွံအခေါၚ်အဝဵုညးကဵုညးကီုဂှ် ပၟိက်ဇၞော်ကွေံကွေံရောၚ် ပတှေ်ကေတ်တုဲ ပ္ဋဲဂိတုမေ ၃၀ ဂှ် ဂကောံမှာဇန်မန် ဗၞတ် (၁၀) ဂကောံ မၞုံအပ္ဍဲတွဵုရးဍုၚ်မန်တအ် ပံၚ်တောဲတုဲ ဒက်ပ္တန်ဂကောံ နကဵုယၟု ‘ဂကောံပံၚ် တောဲဖောအ်ဗြေဝ် ပ္ၚံက်ၜဳမုဟ်တၟံ’ (The Gulf of Martaban Development Consortium-GMDC) မွဲရ။
“ဂကောံချဳဒရာၚ်မံၚ် ပရေၚ်ဖေါအ်ဗြေဝ်မၞိဟ်တံဂှ် နွံဂၠိုၚ်မံၚ်တုဲ ပိုဲစန်ပကောံထောံ ဗီုဏအ်တှေ် ဍေံဒှ်ကၠုၚ်ဒြဟတ် ကောံကောံမွဲရ။ ပိုဲဂှ် ဒုၚ်စ ဆ (၁၀) ဂကောံဏအ်ရ ဟွံသေၚ်၊ ဂကောံတၞဟ်ဟ် သှေ်မံၚ်ဏီတအ်ဂှ်လေဝ် ပိုဲဒုၚ်တဲပၠန်ဏောၚ်” နာဲဂံၚ်လွဳ နွံကဵုအခေါၚ်ဟီုဂး ဂကောံပံၚ်တောဲဖောအ်ဗြေဝ် ပ္ၚံက်ၜဳမုဟ်တၟံ ဟီုထ်ၜးရ။
ရန်တၟံဂကောံဂှ် နကဵုဒြဟတ်ကောံကောံမွဲ သွက်ဂွံပ္တန်အာ ဗော်မၞိဟ် မၜိုဟ်သြိုဟ်သာယာ သီုမၞုံကဵု ပွဗဗွဲဓဝ်ပေၚ်ၚ် ကေုာံ ပရေၚ်ဇၞော်မောဝ် ဖေါအ်ဗြေဝ် အပ္ဍဲဒေသမန်ဂှ် ရၚ်တၠုၚ်ကေတ်အာသဇိုၚ်ဝန်ဏောၚ် ဂးလဝ် ပ္ဍဲလိက်လလောၚ်တရး ဂှ်ရ။
သၟတ်နွံ ပ္ဍဲဒေသမန်ဏအ် အစောံစရာဲ ဍာ်ဒကေဝ် သဝ်ဒၟံၚ်တုဲ သွက်ဂွံသမၠုၚ်ပ္တိုန် အစောံစရာဲ ဍေံတအ်ဂှ် ရၚ်တၠုၚ်အာဏောၚ်၊ သဘာဝ နွံဗွဲပွဳပွူပိုဲတအ်ဂှ်လေဝ် လီုလာ်သုန်ဂြာံ ဂၠိုၚ်တိုန်မံၚ်တုဲ သွက်ဂွံထိၚ်ဒဝ်မၚ်မွဲအာ သဘာဝ ဗွဲဝုတ်ဒိုဟ် ပွဳပွူ ပိုဲဂှ်လေဝ် ကၠောန်အာကီုဏောၚ် နာဲဂံၚ်လွဳ ဂးရ။
“ဂကောံဏအ်ဂှ် ဒုၚ်သဇိုၚ်ကဵုဂကူတုဲဒက်လဝ်ဟွံသေၚ်ရ။ ဒုၚ်သဇိုၚ်ကဵု ဒေသ ပ္ၚံက်က်ၜဳမုဟ်တၟံတုဲဒက်လဝ်ရ။ ပြဟ်ဟ်ဏအ် မန်တအ်ရ ပက္ဍိုပ်ကၠောန်မံၚ်ကၠာ။ အာဂတနူဏအ်တှေ် ဂကူလဵုဟွံရုဲ နွံပ္ဍဲဒေသဏအ်ဍာံတှေ် တံၚ်တဲတုဲ ကၠောန်အာညဳညဳဏောၚ်” ဂှ်လေဝ် နာဲဂံၚ်လွဳ ဂးရ။
ဂကောံဝွံ ပံက်စွံလဝ် ဂကောံတိုၚ် မပါလုပ် (၅) တၠတုဲ ကမၠောန်သွက်ဂွံဒှ်ဗဗွဲဓဝ်ကီု၊ ကမၠောန် သွက်ဂွံဇၞော်မောဝ် တန်ကြန်အာ ဗွဲအဓာန်ဂတတေံကီု၊ သွက်ဂွံပ္တန်ဗဒှ်အာ ဗော်မၞိဟ် မၞုံကဵုဓဝ်ၜိုဟ်လလံ မၜိုဟ်သြိုဟ် သာယာကီု က္ဍိုက်ပ်ရၚ်တၠုၚ်အာဏောၚ် ဂးရ။
ပ္ဍဲဂကောံပံၚ် တောဲဖောအ်ဗြေဝ် ပ္ၚံက်ၜဳမုဟ်တၟံဏအ်ဂှ် ဗော်သွးနာဲယှိုဲကျေန်၊ ဂကောံညးဗြဴမန် MWO ၊ ဂကောံကဵုပညာသၟတ်မန် MYEO၊ ဂကောံစေတနာ ပရေၚ်ဖောအ်ဗြေဝ် CETANA၊ ဂကောံဖောအ်ဗြေဝ် ပရေၚ်မၞိဟ် ဒေသမန် MSDN၊ သမဂ္ဂသၟာဂူယာဝါဗ္ၚ တွဵုရးဍုၚ်မန် AFUM ၊ ဂကောံရီုဗၚ် ကွးဘာမန် တက္ကသိုလ်ဂမၠိုၚ် MUSWA၊ ဂကောံစဳပျး ဖောအ်ဗြေဝ် မဟာဇန် JCSDO၊ ဂကောံမဂ္ဂဒူ (ဝါ) ဂကောံဖောအ်ဗြေဝ်ဍုၚ်ကွာန် ရးဒေသမန် MACDO ၊ ဌာန်ဒ္တန် ဒက်ပ္တန်အခေါၚ်အရာမၞိဟ် ပ္ဍဲဍုၚ်မန် HURFOM တအ် ပါလုပ်အိုတ်ရ။