ပ္ဍဲအရာဓမံက်ရုပ်ရဴပရေၚ်ကမၠောန်မ္ဂး ညံၚ်ဂွံဒှ်ဗွဲမကၠးဖ္ဍးမာန်ကီု၊ ဗီုပြၚ်တၚ်ဒုၚ်လျိုၚ်ကမ္ပဏဳကီု၊ ပရေၚ်ကမ္ပဏဳ ဒးကၠောန်ထေက်တံ ဗွဲမကၠးဖ္ဍး ညံၚ်ဂွံရေၚ်တၠုၚ်ကဵုမာန်ဂှ် ညးတာလျိုၚ် နူကဵုဌာနက္ဍိုက်ပ် ပရေၚ်ဖောအ်ဗြေဝ်တဴတက်ဒေသတွဵုရးဍုၚ်မန် ဟီုဂးကဵု ကမ္ပဏဳ (၃) အံၚ်ဇၞးလဝ်တေန်ဒါ မၞုံအပ္ဍဲပွိုၚ်ဍုၚ်မတ်မလီုတံရောၚ် ဂွံတီကေတ်ရ။
နူကဵုဌာနက္ဍိုက်ပ် ပရေၚ်ဖောအ်ဗြေဝ်တဴတက်ဒေသ တွဵုရးဍုၚ်မန် ဒုညးစၞောန်ပညုၚ် ဥုအံၚ်လွေန်ဂှ် “သၞာံဏံ ပ္ဍဲကဵုပွိုၚ်ဍုၚ်မတ်မလီုဏံတှေ် ဆေၚ်စပ်ကဵုဂၠံၚ် ဒဒန် ကေုာံ ဍာ်တံဂှ် ကမ္ပဏဳလဵု ဒးတာလျိုၚ်ကၠောန်တံဂှ် ဆဵုဂဗညးသ္ကအ်တုဲ အခိၚ်လဵု စဓမံက်ရုပ်ရဴ ပရေၚ်ကမၠောန်၊ အိုတ်မူစိ၊ တၚ်ဒုၚ်လျိုၚ် ဗီုလဵုနွံ၊ လီုလာ်အာဏောၚ်တှေ် ဗီုလဵုကေတ်ကဵုတာလျိုၚ်ဂှ် ပိုဲတံကော်ဆဵုဂဗကဵု ကမ္ပဏဳ အံၚ်ဇၞးလဝ်တေန်ဒါ တံရ” သာ်ဝွံ ညးဟီုရ။
သွက်သၞာံဘဏ္ဍာ ၂၀၁၆-၂၀၁၇ ဂှ် နူကဵုဌာနပရေၚ်ဖောအ်ဗြေဝ် တွဵုရးဍုၚ်မန်တံ ကော်လဝ် (တၚ်ဒါ) ကုကုမ္ပဏဳ ဂမၠိုၚ်တုဲ နကဵုပွိုၚ်ဍုၚ်မတ်မလီုဝွံ ကမ္ပဏဳ (ဇာနည်လျှမ်း) ၊ ကမ္ပဏဳ (စမ်းရေ) ၊ ကမ္ပဏဳ Myanmar Heavy Track Trading တံအံၚ်လဝ် (တၚ်ဒါ) တုဲ သွက်ဂွံကၠောန်ဂၠံၚ် တိသမ္မထိုက် (ကွန်ကရစ်)ကီု၊ သွက်ဂွံခဲါ ပလိုၚ်အဝဳ စိ ၄ ပလိုၚ် ကေုာံ ကမၠောန်ပ္တိုန်ဍာ်ၜဳ ၁၊ ဒဒန်ကောန်ဂရေတ်မွဲတံဂှ် လၟိဟ်သြန်ဖအိုတ် (၁၃၁.၉၁ ) ပြကောဋိကိုဋ်နွံ ရောၚ်။
နူကဵုဒါရိုက်တာကမ္ပဏဳ (စမ်းရေ) ဒါရိုက်တာ (ဦးမျိုးသီဟကျော်) ဂှ် “ကမၠောန်ကမ္ပဏဳပိုဲဒးကၠောန်ထေက်တံဂှ်တှ်ေ ညံၚ်ဂွံဒှ်ခိုဟ်အိုတ်ဂှ် ကၠောန်အာကဵုဏောၚ်၊ ပံၚ်တောဲကဵု ဌာနဆေၚ်စပ်တံ၊ ညးဒေသဆေၚ်စပ်တံတုဲ ထၟံက်အာရုပ် ရဴ ပရေၚ်ကမၠောန်ဏောၚ်” သာ်ဝွံ ညးဟီုရ။
ပ္ဍဲကဵုပွိုၚ်ဍုၚ်မတ်မလီုဝွံ ကွာန်မယံၚ် (မုရောၚ်း)၊ ကွာန်ကအ်ပံက် (ကော့ပေါက်)၊ ကွာန်မြာၚ် (မရမ်း)၊ ကွာန် (မရမ်းကွၚ်း) ၊ ကွာန်ကအ်တောံ (ကော့တွန်)၊ ကွာန် (ကော့ရ) တံဂှ် နူကဵုကုမ္ပဏဳ အံၚ်လဝ် (တၚ်ဒါ) တံ ကေတ်တာလျိုၚ်တုဲ ပ္ဍဲကဵု ဂိတုမာတ်တေံ ညံၚ်ဂွံတုဲဒှ်ဖအိုတ်ဂှ် ဒးရေၚ်တၠုၚ်ကဵုရောၚ် ဂွံတီကေတ်ရ။
တုဲကၠုၚ် ဂိတုဨပရဴ စၟတ်တ္ၚဲ ၂၆ ဂှ် နကဵု သြန်ဂအုံ ဌာနက္ဍိုက်ပ် ပရေၚ်ဖောအ်ဗြေဝ် တဴတက် ဒေသတွဵုရးဍုၚ်မန်ဝွံ ဂၠံၚ်သမ္မထိုက် (၁၄/၄.၇၈) တိုၚ်၊ ဂၠံၚ်ကာတ္တရာ (၁၃/၁.၄) တိုၚ်၊ ဂၠံၚ်လးတၟံ(၄/၄) တိုၚ်၊ဂၠံၚ်လးတိ (၂/၀.၂၈) မိုၚ်၊ ဒဒန်ကောန်ဂရေတ် ၁၁ တၞုၚ် ၄၃၉ ပေ၊ ဒဒန်ဆု မွဲတၞုၚ် ၄၀ ပေ၊ ကမၠိုၚ်ဍာ ၁၂ ၊ ကမၠိုၚ်ဒမျိုဟ် ၂၀၊ ကမၠိုၚ်ၜံက်ကဵုတဲ ၁၂၊ ကၟာဍာ် ၈၊ ဍာ်စောဝ် ၁၃ ဒၞာဲ၊ တၞဟ်တၞဟ် (၂၂) တံ သွက်ဂွံကၠောန်ဖောအ်ဗြေဝ်ဒေသဂှ် ကော်ဘိက်လဝ် (တၚ်ဒါ) ကုမ္ပဏဳ မၞံုတွဵုရးဍုၚ်မန်ရောၚ် ဂွံတီကေတ်ရ။