သွက်ဂွံထပ်ကၠောန်သၞေဟ်ကွဳစက်တၟိ ပ္ဍဲဍုၚ်မတ်မလီု တွဵုရးဍုၚ်မန်ဂှ် နူကဵု (ပြည်နယ်ယာဉ်လုပ်ၚန်းများ ထိန်းသိမ်းကြီးကြပ်ရေးကော်မတီ- ယထက) ပ္တိုန်ထ္ၜးလဝ် ကုအလဵုအသဳတွဵုရးတုဲကီုလေဝ် ဒၞါဲလဵုဂွံသိုၚ်ရော ဒဵုလၟုဟ်ဟွံတီတိုန်စှေ်ဏီ သာ်ဝွံ ဂွံတီကေတ် နူဌာနဝန်ဇၞော် (စည်ပၚ်သာယာရေး) တွဵုရးဍုၚ်မန်ရ။
သွက်ဂွံကၠောန်ဒၞါဲကွဳစက်ဗၞိက်သ္ဂောံဇူဒီုဂှ် အတိုၚ်သ္ဂုတ်သွာတ်ကောံဓရီုပ္ညဳကမၠောန် လၟေၚ်လၟိဟ် ၉/၂၀၁၆ ပ္ဍဲဂိတုအဝ်ဂါတ် ၂၀၁၆ ဂှ်ရ နကဵုစၟတ်တ္ၚဲ ဂိတုသေပ်တေမ်ဗာ (၇) နူ(ပြည်နယ်ယာဉ်လုပ်ၚန်းများ ထိန်းသိမ်းကြီးကြပ်ရေးကော်မတီ- ယထက) ပ္တိုန်ထ္ၜးလဝ် ကုအလဵုအသဳတွဵုရးဍုၚ်မန်ရ။
ကိစ္စကၠောန်သၞေဟ်ကွဳစက်တၟိဏံ ဌာနဝန်ဇၞော် (စည်ပၚ်သာယာရေး) တွဵုရးမန် ဟွံတီလဝ်ဏီရ၊ ပ္ဍဲသၞေဟ်ကွဳစက်ဗၞိက်ဇြေဂျဵုဂှ် ကွဳဖ္ဍိုက်ဗၞိက် ၜိုတ် ၁၅ ဖ္ဍိုက်ဟေၚ်ရ လုပ်ဒေါံဂွံတုဲ လၟုဟ် ကွဳဗၞိက်တံ လုပ်ကၠုၚ်ကဵုကၠံဏောၚ်တှေ် လုပ်ဒေါံဟွံရုံတုဲ ပ္ဍဲဂၠံၚ်မ္ၚးမ္ၚး ကွဳစက်တံ ဆိုအ်ထပ်ဒၟံၚ်ရ ဥူမျေအ်တိၚ် ဂး။
အတိုၚ်တၚ်သ္ဂုတ်သွာတ် ပိုဒ် (၂၀) နူကောံဓရီုအလဵုအသဳတွဵုရးမန် လၟေၚ်လၟိဟ် (၂၂/၂၀၁၆ ဂှ်မ္ဂး သွက်ဂွံဂၠာဲဂအာၚ်သၞေဟ်ကွဳစက်တၟိဂှ် ပံက်ကဵုလဝ် “ဂကောံဂၠာဲဂအာၚ်” တုဲ ကဵုဂၠာဲဒၟံၚ်ဖိုဟ်ရ၊ အခါဆဵုဂအာၚ်မ္ဂး စၟတ်သမ္တီ နလၟေၚ် အဆံၚ်ကဵုကၠာ မွဲ ၜါ ပိ (၁/၂/၃) တုဲ ကလေၚ်ဒုၚ်စဳရေၚ်ညိ ကဵုလဝ်စၞောန်နွံ ဂွံတီကေတ်ရ။
“နူ ယထက ပ္တိုန်ထ္ၜးကဵုဂကောံအလဵုအသဳ ဟု်ီဂှ် ပ္တိုန်ထ္ၜး သွက်ဂွံထပ်သိုၚ်ကၠောန်တိုန် သၞေဟ်ကွဳစက်တၟိမွဲ အကွက်ကွဳဗၞိက်တံဂွံဇူဒီုရ။ ညံၚ်သ္ဂောံဂွံဂအာၚ်ဂှ် နူဂကောံဇြဳပေန်ပွိုၚ်ဍုၚ် ပ္ဍဲတိဂကောံဇကုပိုၚ်ဂှ်ရ ဗီုဒးရးဂှ် ဖန်ဇန်တုဲ ပ္ဍဲအံက်တဝ်ဗာ ၁၁ ဂှ် ကလေၚ်ပ္တိုန်ထ္ၜးလဝ်ကဵု ဂကောံအလဵုအသဳ တွဵုရးမန်ရ” သာ်ဝွံ ဥုဖုၚ်မျာတ်တူ သ္ကိုပ်ပရေၚ်အုပ်ဓုပ်ခရိုၚ်၊ ဌာနက္ဍိုက်ပ်ပရေၚ်အုပ်ဓုပ်နာနာ ခရိုၚ်မတ်မလီု မဒှ်ညးက္ဍိုပ် ဂကောံဂၠာဲသ္ၚဳဂအာၚ်ဂှ် ဟီုရ။
ကၠာကၠာတေံ ပ္ဍဲသၞေဟ်ကွဳစက်ဇြေဂျဵုဏံ ဒၞါဲကွဳစက်ဗၞိက်တံဒေါံဇူဂှ် လုပ်ကဵုတိတ် လၟိဟ်ဍေံဒးဖ္စပ်မံၚ်ရ၊ ဗွဲကြဴဏံ လၟိဟ်ကပေါတ်ဗၞိက် အာကၠုၚ်ဂၠိုၚ်ကွေံကွေံတုဲ ကွဳစက်ဗၞိက်တံ လုပ်တိတ်ဇူဒီု ဟွံရုံဂပ်ရ၊ ဒှ်သာ်ဂှ်ရ စိုပ်ကၠုၚ်အဆံၚ် ဒးဖန်ဂအာၚ်သၞေဟ်တၟိမွဲရ၊ ယဝ်ကၠောန်တၟိတှေ် ပ္ဍဲတိ လုပ်အဝေါၚ် ဂကောံဇြဳပေန်ဂှ်ရ ဖန်ထေက်ရောၚ် ညးဆက်ဟီုရ။
ပ္ဍဲအရှာံသၞေဟ်ကွဳစက်ဇြေဂျဵု ဒၞါဲကွဳစက်ဗၞိက်ဂွံဒေါံဂှ် ဖန်သိုၚ်ထောံရုၚ် အရၚ်ဂွံကြိုၚ်စွံကပေါတ်ဗၞိက်လေဝ် နွံကၠုၚ်တုဲ ဒၞါဲဂှ်က္ဍန်စှေ်အာ ကွဳဗၞိက်တံ လုပ်ဟွံအိုတ်၊ ကွဳဗၞိက်တံ ဒးတိတ်ဇူဒေါံ ပ္ဍဲသ္ကဲသ္ကဲဂၠံၚ် ဗွဲမ္ၚး အကြာ အရာပ် တံတုဲ က္တဵုဒှ်ပြသၞာကဵုရဲတၠသ္ၚိတံလေဝ်နွံ၊ ပရေၚ်ကွဳယာန်ဇီုတေက်တံလေဝ်နွံကၠုၚ်တုဲ သွက်ဂွံထပ် ကၠောန် သၞေဟ်ကွဳစက်ဗၞိက်ဂှ် နူ ယထက တွဵုရးဍုၚ်မန် မ္ဒးပ္တိုန်ထ္ၜးကဵု ဂကောံအလဵုအသဳ တွဵုရးဍုၚ်မန်ရောၚ် ဂွံတီ ကေတ်ရ။