ပ္ဍဲဒပ်ပံၚ်ကောံ UNFC နွံကဵုဂကောံရပ်လွဟ်ကောန်ဍုၚ်အရၚ် ရ ဂကောံ ဟွံဂွံထ္ပက်စၟတ်တဲ NCA ဏီဂှ် ဂကောံကချေၚ် KIO/KIA ပ္တိုန်လဝ်လိက် သွက်ဂွံနုက်တိတ် နူ UNFC ဣရဂှ် ဂွံတီကေတ်ရ။
“ပ္တိုန်လဝ်လိက်နုက်တိတ်ဂှ် ဍာံဍာံရ။ ဆ္ဂး နူ UNFC မုလေဝ်ဂွိုအ်သ္ဂုတ်သွာတ်ဏီတှေ် ဂွံဟီုထ္ၜးပေၚ်ၚ်ဂှ် ဟီုဟွံမာန်ဏီပုဟ်။ ဂ္ဇအ်ကောံဓရီုတုဲမှ လဴထ္ၜးပေၚ်ၚ်မာန်ဏောၚ်” သာ်ဝွံ ညးတာလျိုၚ်မွဲတၠ ဟွံမိက်ဓမံက်ယၟု နူ UNFC ဟီုရ။
ဒပ်ပံၚ်ကောံ UNFC လၟုဟ်ဏံဝွံ ဒက်ပ္တန်လဝ် နကဵုဗော်ပၠန်ဂတးရပ်လွဟ်ဂမၠိုၚ် မပ္တံ ဂကောံဒဳမဝ်ကရေတ်တေတ်ဠာဟူ LDU၊ ဂကောံဝ WNO ၊ ကံၚ်ဇြဳကောန်ဂကူရခေၚ် ANC ၊ ဗော်ပရေၚ်တောတက် ကရေၚ်ဍာဲ KNPP ၊ ဗော်ဍုၚ်မန်တၟိ NMSP ၊ ဗော်ပရေၚ်တောတက်ရးသေံ SSPP/SSA ၊ ဂကောံကချေၚ် KIO တံရ။
ဗော်ပရေၚ်တောတက်ရးသေံ SSPP/SSA လေဝ် ပ္တိုန်လဝ်လိက် နုက်တိတ် နူ UNFC ကီုဏောၚ် ၜိုန်ဂွံလဝ်ပရိုၚ် ချိုတ်ပၠိုတ်ဖိုဟ်ကီုလေဝ် သ္ပဒ္တန်ဟွံဂွံဏီရ။
“အဲလေဝ် မိၚ်မံၚ်ကီုရ၊ ဆ ဟွံဆဵုလိက်ဏီပုဟ်။ ဗော် SSPP ပိုဲ ဟွံနုက်တိတ်ပုဟ်ဂှ် အဲဂံၚ်ဟီု။ ဟွံတိတ်ပုဟ်လေဝ်နဝ်။ အဲဂံၚ်ဟီုဂှ် ဗော် SSPP ပိုဲ ဟွံနုက်တိတ်ဏီပုဟ်။ ဗော် SSPP ဂှ် မံၚ်ဒၟံၚ်သၟဝ် အလာံ UNFC ဖိုဟ်ရ၊ ၜို်တ်ဏံရ” သာ်ဝွံ သ္ကိုပ်ပၞာန်သာၚ်ထူ နူဗော် SSPP/SSA ဟီုဂးလဝ်ကဵု ဌာန်ပရိုၚ် RFA ရ။
အဃောဂိတုအေဗရဴ နူ ၁၅ ဒဵုကဵု ၁၉ ဂှ် ကၠောန်ကၠုၚ်လဝ် ကောံဓရီုမုက်ဇဳ က္ဍိုပ်သ္ကိုပ် ဂကောံပၠန်ဂတးရပ်လွဟ် အလန်စတုတ္ထ ပ္ဍဲဍုၚ်ပါန်ခါမ် ဒေသတိဍာ် ဒပ်ဝ UWSA တုဲ ပံက်လဝ် “ကမ္မတဳပ္ညဳပ္ညပ်သဳကၠဳပရေၚ်ဍုၚ်ကွာန်ကၟိန်ဍုၚ်” ဂှ် ဗော် KIO/KIA ကဵု SSPP/SSA လေဝ် ပါလုပ်ဒၟံၚ် နဒဒှ်ကောန်ဂကောံကီုရောၚ် ဂွံတီကေတ်ရ။
ပ္ဍဲကောံဓရီုမုက်ဇဳဂှ်ဝွံ ညးစၞး ၂၇ တၠ နူဒပ်ပၞာန်ရခေၚ် (ULA/AA)၊ ဂကောံပရေၚ်ဗၠးၜးကချေၚ် (KIO/KIA)၊ ဒပ်ကဝ်က (MNTJP/MNDAA) ၊ ဒပ်ပၞာန်တအၚ် (ပလံၚ်) (PSLF/TNLA)၊ ဗော်သေံ (SSPP/SSA)၊ ဂကောံမာၚ်ဠာ (PSC/NDAA)၊ ဗော်ပရေၚ်ညဳသၟဟ်ရးဝ (UWSP/UWSA) တံ တိုန်စိုပ်လဝ်ရ။
ပ္ဍဲကောံဓရီုဂှ်ဝွံ ဖျေံလဝ်သ္ဂုတ်သွာတ် ဟွံဗက်ဂၠံၚ် NCA ရဂးတုဲ အခက်ခုဲနွံဒၟံၚ် ပ္ဍဲကမၠောန်ၜိုဟ်လလံ ကၟိန်ဍုၚ်လၟုဟ်ဏံ ဗီုလဵုဂွံတတ်ထပါ်အာရောဂှ် ချူလဝ်လိက်ကၞပ်မွဲတုဲ ပလံၚ်ဗ္စိုပ်လဝ် ကုအလဵုအသဳဗၟာ ရ။
“NCA ဂှ် ဒှ်လိက်ကသုက် တုပ်စိုတ်ပရေၚ်ဒေံါပန်ပှော် အလုံမွဲဍုၚ်ဏောၚ်၊ အဓိကဂှ် သွက်ဂွံဒေံါပန်ပှော်ရ၊ ဆ္ဂး သွက်ဂွံဒေံါပန်ပှော်ဂှ် ပ္ညဳဟွံစှေ်ဗီု ခက်ခုဲလအ်လမံၚ်ကွေံကွေံတုဲ လိက်ကသုက်ဒေံါပန်ပှော် ဟွံသေၚ်ကဵု နဲ NCA ဏံ ဓမံက်ရုပ်ရဴတုဲ ဆက်ဂစာန်အာ မွဲဗီုပၠန်ဏောၚ်ဂှ် သ္ကိုပ်ပၞာန် ဂမ်မဝ် နူ KIO/KIA ဟီုကၠုၚ်လဝ် ပ္ဍဲကောံဓရီု ဂိတုမေ ၅ ဏံရ” ဂှ်လေဝ် ဂွံတီလဝ် နူညးမွဲတၠ မကၠုၚ်နူဗွိုၚ်ပရိုၚ်သဇိုၚ် KIO/KIA ရ။
UNFC ဂှ် ဆက်အာ အတိုၚ်ဂၠံၚ် NCA ရ ဒှ်တုဲ တၚ် ၉ တၚ် ညးတံပ္တိုန်ထ္ၜးလဝ်ဂှ် အလဵုအသဳ ဒုၚ်တဲမ္ဂး ထ္ပက်စၟတ်တဲကီုဏောၚ်၊ တုဲပၠန် ဂိတုမေ အကြာ ၁၄ ကဵု ၁၈ ဂှ်လေဝ် သွက်ဂွံဆဵုဂဗသဳကၠဳ ကေုာံကမ္မယှေန် ပရေၚ်ၜိုဟ်လလံ အလဵုအသဳနွံမံၚ်ကီုဏောၚ် ဂွံတီလဝ်ရ။