ဒပ်ပၞာန်အလဵုအသဳ မချဳဓရာၚ်မံၚ်ပွဳပွူဌာန်ဂအုပ်ခရိုၚ်မတ်မလီု တမ်ဒပ်လၟိဟ် ၁ တံဂှ် ဟွံဂွံရုပ်ဖျဴဖၟိုတ်ဏီတုဲ ဒဵုကဵုစိုပ်ဂိတုအဝ်ဂါတ် ၃၁ ဏံ ဆက်နွံဒၟံၚ် အပ္ဍဲကွာန်ဝါကၠောၚ်ဂှ်ဖိုဟ်ရောၚ် ညးဒေသတံ ဟီုအိုတ်ရ။
သ္ပဟိုတ်ကဵုဗော်ဍုၚ်မန်တၟိ ကၠောန်အသေအဟာန် တ္ၚဲပၠန်ဂတးမန် ရ၀ ဝါ နကဵုကရောၚ်ပၞာန် သီုဖံက်ပန်လွဟ်ဂှ်တုဲ နူကဵုဂိတုအဝ်ဂါတ် ၈ တေံ ကရောၚ်ဒပ်ပၞာန်အလဵုအသဳ ဇြဟတ်လၟိဟ်ကဵုကၠံတံ စပ္တံလုပ်စိုပ်ကၠုၚ် ပ္ဍဲတိဍာ်ဗော် ဍုၚ်မန်တၟိ သြဇာတဴ အကြာမန် မၞုံပွဳပွူဌာန်ဂအုပ်ခရိုၚ်မတ်မလီုဂှ်ရ။
ကရောၚ်ဒပ်ပၞာန် မသှေ်ဒၟံၚ် အပ္ဍဲဘာလေံကျာ် ကွာန်ဒဵုထောၚ် လၟိဟ်ဗၞတ် ၃၀ တၠတံဂှ်ဝွံ ကိုပ်ကၠာနူဟွံဂွံရုပ်စဴဏီ ထ္ၜးဟိုတ်ကဵု သွက်ဂွံတီတိဍာ်ဒေသလှာဒကှ်ဂးတုဲ ချဳဓရာၚ်အာကၠုၚ်ဒၟံၚ် အကြာကွာန်မန် မၞုံပွဳပွူ ဌာန်ဂအုပ်ခ ရိုၚ်မတ်မလီု ဗော်ဍုၚ်မန်တၟိ မပ္တံကဵုကုန်ဗ္ဒဝ်၊ ကျာ်ဒ္စိတ်၊ ဝေသာလဳပလိုတ် ကေုာံ တၟံဂအုံတံနွံကၠုၚ်လဝ်ရ။
“ဍေံကျာလဝ်ကဵု မၞိဟ်ဇၞော်ပိုဲဂှ် ဒပ်ဍေံဏံဂှ် ဍေံဖါဂွံရုပ်ဖျဴ သိုက်က်နွံမံၚ် ဍေံဟီုလဝ်ဟဂှ်” သာ်ဝွံ ကေၚ်ကာခရိုၚ်နာဲ အံၚ်ဇၞးဂှ် ဆက်ဟီုပၠန်ရ။
စပ်ကဵုကိစ္စဒပ်ပၞာန်အလဵုအသဳတံ ချဳဓရာၚ်ဒၟံၚ် အပ္ဍဲဒေသလှာဒကှ် ခရိုၚ်မတ်မလီုဝွံဂှ် ဂကောံညးစၞးဗော်ဍုၚ်မန်တၟိ ဒုဥက္ကဌ ဗဟဵု နာဲဟံသာက္ဍိုက်ပ် ကဵု ညးစၞးဒပ်ပၞာန်အလဵုအသဳ (ကစထ-စစ်ဆၚ်ရေးအထူးအဖွဲ႕) လၟိဟ် (၄) က္ဍိုက်ပ်တံ ဂွံဆဵုဂဗသဳကၠဳလဝ်နွံတုဲရ။
ဒပ်ပၞာန်အလဵုအသဳတံ ဖအောန်ဖျေံကဵုကၠုၚ်မံၚ်ဇြဟတ်ကၠာလေဝ် ပွမဆက်ချဳဓရာၚ်နွံဒၟံၚ် အပ္ဍဲဒေသလှာဒကှ် ပွဳပွူခရိုၚ်မတ်မလီု တ္ၚဲဍာ်ဇမၠိၚ်သာ်ဏံဂှ် ညးဍုၚ်ကွာန်ဒေသတံ ဒှ်မံၚ်ဓဝိၚ်အိုတ်ဖိုဟ်ရ။
“ရဲဒေသဏံဂှ် ဟွံဆဵုမံၚ်ကယျိုၚ်ပၞာန်အလဵုအသဳတံ တၟာလအ်ရ၊ လၟုဟ်ဒးဆဵုမံၚ်ကောန်ပၞာန်ဍေံ ဂေတ်အာ ဂေတ်ကၠုၚ်မံၚ် ဗီုဏံဏောၚ်တှေ် စိုတ်တေံဂှ် ဒှ်မံၚ်ဓဝိၚ်ရ၊ အာကၠုၚ်စလေဝ် ထောံသ္ၚိဟွံၜိုဟ်ပုဟ်” သာ်ဝွံ ညးဒေသကွာန်ၜံက်ခၠဵုမွဲတၠ ဟီုရ။
ဗော်ဍုၚ်မန်တၟိဝွံ ပ္ဍဲသၞာံ ၁၉၉၅ ဂှ် တုပ်စိုတ်ဒေံါလဝ်ပန်ပှော်ကုအလဵုအသဳ ဗွဲကိုပ်ကၠာတုဲ ကာလစိုပ်သၞာံ ၂၀၁၀ ဂှ် ဒေံါပန်ပှော်လီုအာကၠာလေဝ် ရမျာၚ်လွဟ်ဟွံဗြုမွဲတဲရ၊ ဆဂး ကာလစိုပ်သၞာံ ၂၀၁၂ ဂှ် က္လေၚ်ဂွံတၚ်တုပ်စိုတ် ဒေံါပန်ပှော်ကုအလဵုအသဳ အဆံၚ်တွဵုရး၊ အဆံၚ်ကၟိန်ဍုၚ်တုဲ စဵုကဵုအခိၚ်တ္ၚဲဏံ ပ္ဍဲလိက်ကသုက်တုပ်စိုတ်ဒေံါပန် ပှော်အလုံဍုၚ် အေန်ဇြဳအေ (NCA) ဂှ် ဟွံဂွံထ္ပက်လဝ်စၟတ်တဲဏီရ။
အတိုၚ်လိက်ကသုက်တုပ်စိုတ် ဒေံါပန်ပှော် အလဵုအသဳ သမ္မတတိၚ်သိၚ် ကဵု ဗော်ဍုၚ်မန်တၟိတံ ချုက်လဝ် အဆံၚ်တွဵုရး၊ အဆံၚ်ကၟိန်ဍုၚ် ပ္ဍဲသၞာံ ၂၀၁၂ တေံဂှ်မ္ဂး ကွာန်ကွိက်ခွိ ဒၞါဲစၞောန်ဗီုတိ( S-701 317) အပ္ဍဲပွိုၚ်ဍုၚ်လှာ ဒကှ်ဂှ် တုပ်လဝ်စိုတ် နဒဒှ်ဒ္တန်ဒပ် တံဒပ်လၟိဟ်(၁) ခရိုၚ်မတ်မလီု ဗော်ဍုၚ်မန်တၟိရောၚ် ဂွံတီကေတ်ရ။