မိစၠန်ထဝ်။    ။စိုပ်ကၠုၚ်ရာသဳဗြဲကီုလေဝ် ပ္ဍဲတွဵုရးဍုၚ်မန် ပွိုၚ်ဍုၚ်လ္ၚဵုတံဂှ် ဗြဲဟွံဂူ ဍာ်ဟွံမွဲတုဲ သၟာဗ္ၚတံ ဂွံတဵုသြောံဂှ် ဒှ်မံၚ်အခက်အခုဲအိုတ်ရ။

ပ္ဍဲပွိုၚ်ဍုၚ်ရေဝ်၊ ပွိုၚ်ဍုၚ်ပါ်လၟိုၚ် ကေုာံ ပွိုၚ်ဍုၚ်ဇြပ်ဗုတံဂှ် ဗြဲဟွံဂူဏီရောၚ် ဂွံတီကေတ် နူကဵုသၟာဗ္ၚတံရ။

“မၚ်မံၚ်ဗြဲဂှ် သြောံမလေဝ် ဟွံဂွံတုၚ်ဏီပုဟ်၊ လၟုဟ်ဒးပၠုပ်ဍာ် နူကဵုကြုၚ်၊ သၞာံတုဲကၠုၚ်တေံတှေ် အခိၚ်ဏံ ကြပ်ကဵုပတမ်သြောံရ၊ ဗြဲဟွံဂူဂှ် ဒှ်ဒဒိုက်ကွေံကွေံ၊ တိပိုဲဂှ် ကြပ်မံၚ်ကဵုဍာ်ကြုၚ်တှေ် ပၠုပ်ကေတ်ဍာ် ဂွံမံၚ်၊ တိလ္ၚဵုဂှ်တှေ် ဍာ်ညိလေဝ် ဟွံမွဲပုဟ်” သာ်ဝွံ သၟာဗ္ၚ နူကဵုပွိုၚ်ဍုၚ်လၟိုၚ်မွဲတၠ ဟီုရ။

သၟာဗ္ၚမွဲတၠပၠန်ဂှ်လေဝ် ဟိုတ်နူဗြဲဟွံဂူတုဲ ဂွံတဵုသြောံဇၞော်ဂှ် အခိၚ်လဇုဲအာရရောၚ် ဟီုရ။

သြောံဇၞော်ဂှ် အာယုက်ဍေံ မၞုံ ၁၅၀ တ္ၚဲပြၚ်တုဲ အာယုက်ဂၠိၚ်နူကဵု သြောံတၞဟ်ဟ်တံဏီရောၚ်။ တုဲပၠန် ဗြဲဒးခိုဟ်တုဲ ဒးတဵုဒၞာဲ ဍာ်ဇြိုဟ်ဇြိုဟ်ဂှ်ရောၚ်။

သၞာံဏံမ္ဂး ဗြဲအိုတ်ပြဟ်မာန်မံၚ်ရောၚ်ဂှ် နူကဵုဂကောံ ဌာနဗြဲကျာ အလဵုအသဳ (မိုးလေဝသဌာန) တံ လလောၚ်လဝ်ရောၚ် သၞာဲဒါတဵုလွဳအလဵုအသဳ နူကဵုခရိုၚ်သဓီုမွဲတၠ ဟီုရ။

အခိၚ်ဒးတဵုသြောံဂှ် ဟွံဂွံတဵုသြောံမ္ဂး သြောံတိတ်အောန်မာန်တုဲ သၞာံဂတတေံမ္ဂး ၚုဟ်သြောံတံ က္ဍၚ်တိုန်မာန်မံၚ်ရောၚ် သၟာဗ္ၚတံ ဟီုမံၚ်အိုတ်ရ။

ပ္ဍဲတွဵုးရးဍုၚ်မန် မပ္တံကဵု ပွိုၚ်ဍုၚ်မုဟ်ဍုၚ်၊ ပွိုၚ်ဍုၚ်မတ်မလီု၊ ပွိုၚ်ဍုၚ်ပံၚ် ကေုာံ ပွိုၚ်ဍုၚ်ၜါသွာၚ်တံဂှ် ဗြဲဂူခိုဟ်ဒၟံၚ်ကီုလေဝ် ဗြဲလဇုဲ နူသၞာံအာတေံ ၜိုတ်မွဲဂိတုဏီရောၚ် ရဲဒေသတံ ဟီုရ။

“ပ္ဍဲကအ်ပိုဲဂှ် ဗြဲဂူခိုဟ်ကွေံကွေံ၊ ဂိတုဏံ ကၠာဟွံဂွံအိုတ်တှေ် စပတမ်ရဏောဝ်၊ ဆဂး တော်ကဵုသၞာံအာတေံတှေ် သၞာံဏံဂှ် တဵုသြောံလဇုဲမံၚ်” သာ်ဝွံ သၟာဗ္ၚ နူပွိုၚ်ဍုၚ်ၜါသွာၚ် (တ္ကအ်ခၟိုၚ်) မွဲတၠ ဟီုရ။

ပ္ဍဲတွဵုရးဍုၚ်မန်ဂှ် တိဝါဗ္ၚ မၞုံၜိုတ် ၁၀ ကိုဋ် ဨကတုဲ တွဵုရးဍုၚ်မန်ဂှ်ဝွံ ပ္ဍဲကၟိန်ဍုၚ်ဗၟာ သြောံတိတ်ဂၠိုၚ်အိုတ် မၞုံပ္ဍဲမဂၞန် ရ ရောၚ် ဂွံတီကေတ် အတိုၚ်လိက်စရၚ် (မြေစာရၚ်းဦးစီးဌာန) သၞာံ ၂၀၀၅ ဂှ်ရ။