အာကာ၊ ဌာန်ပရိုၚ်ဗၠးၜးမန်

ဒါယကာ ဒုၚ်ပလံၚ်မံၚ် တၠဂုဏ်ဥက္ကံသ ညးမဒးဒုၚ်ရပ်လဝ် သီုလိက်ဒစဵုဒစး ပေဲါရုဲမာဲ ၂၀၁၀ ဂှ် ကလေၚ်ဗၠးတိတ်ကၠုၚ် နူဒးဒုၚ်ရပ်ရ။

ညးမဗၠးတိတ်ကၠုၚ် နာဲမန်ကျာ်သြဳ မၞုံအာယုက် ၂၇ ဝွံ ပ္ဍဲဂိတုဂျာန္နဝါရဳ ၁၁ သၞာံဏံဂှ် ဒးဒုၚ်ရပ် ပ္ဍဲသ္ၚိညး မၞုံပ္ဍဲကွာန်မုဟ်ဒုန် ပွိုၚ်ဍုၚ်ၜါသွာၚ်တုဲ ပ္ဍဲဂိတုမေ တတိယသတ္တဟဏံ ကလေၚ်ဗၠးကၠုၚ်ရောၚ်။

“ကလေၚ်ဗၠးကၠုၚ် ၜိုတ်မွဲအပါတ်ပြၚ်ရ၊ ဗၠးကၠုၚ် ဂွံၜိုတ်ပိတ္ၚဲဂှ် သ္ပထောံခမဳ ပ္ဍဲဘာပလိုၚ်အိန် ကွာန်မုဟ်ဒုန်ဏံ၊ လၟုဟ်လေဝ် နွံမံၚ်ပ္ဍဲဘာဖိုဟ်” သာ်ဝွံ ညးမၞုံဇရေၚ်သ္ၚိညးမွဲတၠ ဟီုလဴထ္ၜးရ။

တၠဂုဏ်ဥက္ကံသ (ဂုဏ်ဇြဝ်လာတ်) ကေုာံ မန်ကျာ်သြဳတံဂှ် ဒှ်ကောန်ကွာန်မွဲကွာန် ဒှ်သကအ်ရဲ နူဍောတ်ဍောတ်တေံတုဲ ဟိုတ်နူကေၚ်ပလံၚ်လဝ် ဒၞာဲတၠဂုဏ်အာဂှ်ရ တၠဂုဏ်ဂှ် ဒးဒုၚ်ရပ်တုဲ လအ်ပန်တ္ၚဲဂှ် ဒးဒုၚ်ရပ်အာကီုရ။

ကြဴနူဒးဒုၚ်ရပ်တုဲဂှ် ဒးဒုၚ်စၟဳစၟတ်ရပ်ထိၚ်လဝ် ပ္ဍဲထံၚ်အၚ်စိၚ် ပွိုၚ်ပန်ဂိတုပြၚ်ရ။

ပ္ဍဲဂိတုဂျာန္နဝါရဳ ရ ဂှ် ဗၠာဲသၟိၚ်တံ ရပ်ထိၚ်ထောံ တၠဂုဏ်ဥက္ကံသ ပ္ဍဲအရာပ်ခိုၚ်ကၠိုက် ဍုၚ်ဇြပ်ဗုတုဲ စဵုကဵုအခိၚ်လၟုဟ် ရပ်ထိၚ်လဝ် ပ္ဍဲထံၚ်အၚ်စိၚ်ဏီဖိုဟ်ရ။

လၟုဟ် ပတိုန်လဝ်အမှု ကုညး နကဵုအမှု ပလီုပလာ်ကၠေံ လျုၚ်ပတှေ် လတူကၟိန်ဍုၚ်၊ အမှု တက်ပၠောလိက် ဟွံလုပ်သၞောဝ်၊ အမှု အဳလက်ထရဝ်နေတ်တံရ။

တၠဂုဏ်ဥက္ကံသ မၞုံအာယုက်၂၈ သၞာံဝွံ ဒှ်အာစာလိက်ဍောတ် ပ္ဍဲတိုက်လိက်ပရိယတ္တိအံၚ်ဇၞး ကွာန်နာၚ်လှုၚ် ပွိုၚ်ဍုၚ်မုဟ်ဍုၚ်တုဲ သ္ပဒတဴကၠုၚ် ပ္ဍဲဘာဂှ် ဂွံၜိုတ်မသုန်သၞာံတုဲရ။