နာဲသာၚ် – ပ္ဍဲကဵုစၟတ်တ္ၚဲ ၁၉ ဂိတုဒဳဇြေမ်ပါ အတိုၚ်မွဲတ္ၚဲဂှ် နူကဵုဗော်သွးသေံမည် ကော်ဘိက်လဝ်တုဲ မန်ဍုၚ်သေံ နူဒေသလပ်ပူရဳ ဆက်ကၠုၚ်ဒေသဍုၚ်ၜၚ်ကံက် နူဂှ်စဵုကဵုပယျဵုဝၚ်က – ကျာ်ပိ ညးဍုၚ်ကွာန် ဗၞတ် (၂၀၀၀) တၠတအ် တိုန်စိုပ်သဘၚ်သ္ပကုသဵု ကဵုဒါန်စဝ်ရုပ် ကျာ်ဇၞော်အာစာတၠဝၚ်ကကီုရ။
ပ္ဍဲကဵုဍုၚ်သေံဝွံ မဇဂကူမန်ဍုၚ်သေံ ဂြိပ်ဒဴဘဲပၞာန်ဗၟာတအ် ဗတိုက်သီကေတ် ဍုၚ်မန်ဟံသာဝတဳတုဲ ပြးဇးဒၟံၚ် ပ္ဍဲကဵုအကြာကွာန်ဂမၠိုၚ် နွံတန်တဴဒၟံၚ် ပ္ဍဲကဵု ၃၇ ခရိုၚ် ပ္ဍဲကဵုဍုၚ်သေံတုဲ ညးဍုၚ်ကွာန်မန် ဍုၚ်သေံ နူကွာန် နွံပ္ဍဲခရိုၚ် ၂၀ ခရိုၚ်တအ် တိုန်စိုပ်ကၠုၚ်ရ။
“ညးဍုၚ်ကွာန်ဂကူမန် ဍုၚ်သေံပိုဲတအ်ဂှ် ပြးဇးဒၟံၚ် ဂၠိုၚ်ကဵုခရိုၚ်ကီုလေဝ် ပိုဲတအ်ဖအိုတ် ရှေ်သှေ် သာသနာဗုဒ္ဓ ရှေ်သှေ် ကျာ်ဇၞော်အာစာတၠဝၚ်က ဥတ္တမတုဲ တ္ၚဲဏအ် ပိုဲတအ် စိုပ်ကၠုၚ် ပ္ဍဲကဵုဖလာတ် ဗော်သွးသေံမည်ဂှ် နွံကဵုမ္ၚဵုရ” ရဴဝွံ နာဲကိတ္တိ ဥက္ကဌ သၟတ်ဝုတ်ဗၠာဲမည် ဍုၚ်ၜၚ်ကံက် မြော်ဏာဂလာန်ကီုရ။
အတိုၚ်အစဳအဇန် ဗော်သွးသေံမည်တအ်မ္ဂး နကဵုညးတအ် သွက်ဂွံသိုၚ်ခၞံအာ ရုပ်ထဝ်ကျာ်ဇၞော်အာစာတၠဝၚ်က သၟးဟွံသေၚ်၊ သွက်ဍာ်ဇမၠိၚ်မ္ဂး နကဵုညးတအ် သွက်ဂွံသိုၚ်ခၞံအာ “ဥဒျာန်ယေန်သၞာၚ်မန် အဘိတ္ထုပ္ပတ္တိရာဇဝၚ်” နွံရောၚ် လလောၚ်ပ္တိတ်လဝ် ပ္ဍဲကဵုလိက်လလောၚ်တရး နွံရ။
ပ္ဍဲကဵုဥဒျာန်ညးတအ်မ္ဂး သွက်ဂွံသိုၚ်ခၞံအာ ကျာ်စေတဳလ္ဂုၚ်၊ ကၟာဍာ်ဒၞာဲၜိုပ်ၜါ ဇူဒီု၊ သီုကဵုရုပ်ကျာ်ဇၞော်အာစာတၠဝၚ်က၊ တိုက်ထ္ၜးဝၚ်မန်အိုဿီုတအ်ရ။ ကာလသိုၚ်ခၞံသာ်ဏံ တုဲမ္ဂး ဝၚ်မန်ဍုၚ်သေံအိုဿီုတအ်ဂှ် သှေ်ဇးအာ ပ္ဍဲကဵုဝၚ်ဍုၚ်သေံဝွံရောၚ်။
ညးတအ်သိုၚ်ခၞံဥဒျာန်ဏံတုဲမ္ဂး ဂကူမန်ကီု ဂကူသေံကီု ဂကူဍုၚ်သအာၚ်တအ်ကီု လုပ်ဗဵုဝေၚ်ဥဒျာန်ဏအ် ဂွံတုဲ တီကၠိုဟ်ဝၚ်ပရူဥဒျာန်ဏံဝွံတုဲ သီုကဵုတီကၠုၚ် ပရူဂကူမန်တအ်ရောၚ် ညးတအ်ရန်တၟအ်လဝ် သာ်ဝွံရ။
“ပိုဲတအ် ရန်တၟအ်လဝ်ဂှ်တှေ် ကောန်စဴ ကောန်စေက်ဂကူမန်တအ် ဂွံတီပရူမန် ဝၚ်မန်တုဲ ညံၚ်ဟွံဂွံဝိုတ်ကၠေံ ဂကူမန်ရောၚ်” ရဴဝွံ နာဲအောန် မဒှ်ညးအုပ်ကာနာနာ ဗော်သွးသေံမည် လဴထ္ၜးရ။
ပ္ဍဲကဵုသဘၚ်စဝ်ရုပ် ကျာ်ဇၞော်အာစာတၠဝၚ်ကမ္ဂး ဂကူမန်တအ်သၟးဟွံသေၚ် ဂကောံကွိၚ်ကွိုက်နာနာ၊ ဂကောံကွိၚ်ကွိုက်မန် ဟံသာဝတဳ နူဌာန်ဒတန်ယေန်သၞာၚ်မန် ဍုၚ်ဝၚ်က၊ ဂကောံကွိၚ်ကွိုက်မန်သေံ နူပရထုံဌာနဳ၊ ဂကောံဟံသာရာမာန် နူဍုၚ်လပ်ပူရဳ၊ နူဂကောံယေန်သၞာၚ် ကွာန်ကအ် ဒေသနဃောန်ပရထုံတအ် ကၠုၚ်စိုပ်ကဵုဇြဟတ်အိုတ်ရ။
ဥက္ကဌ သဘၚ်ကၞာ စဝ်ရုပ်ကျာ်ဇၞော်အာစာတၠ ဝၚ်က သကိုပ်ပၞာန် “ပါန်ထာဝိတ်ကေဝ်ရေန်” ဂှ် ပံက်ဏာသဘၚ်ကၞာ ပ္ဍဲအခိၚ် ၂းဝဝ နာဍဳ တ္ၚဲစေၚ်တုဲ ဖဍောတ်မ္ၚဵု ဗှ်ဗၞုဟ်အိန်ဒေဝတဴ ကော်ဘိက်ကဠော်ပၟၚ်အိုဿီု ဖျေံစဝ်ထဝ် ရုပ်ကျာ်ဇၞော်အာစာတၠရ။ ဂကူမန်အိုဿီုလေဝ် စဵုကဵု ၄းဝဝ နာဍဳ မၚ်ဒၟံၚ် ပ္ဍဲကဵုဖလာတ်ဗော်သွးသေံမည်ဝွံရ။
0 Comments