လွဳဝၚ် – အလဵုအသဳဗၟာတံ ထပက်မံၚ်ပၞာန် ဒပ်ပၞာန်သေံဇၞော် (သၟဝ်ကျာ) တေံမ္ဂး ပၟတ်ပၞာန်အပ္ဍဲဍုၚ် ကတဵုဒှ် ကၠောံထၞာန်အာမာန်ဏောၚ် ကေၚ်ကာဗဟဵု ဗော်ဍုၚ်မန်တၟိ မွဲတၠ ဟီုရ။

ကောန်သ္ဂံၚ် ဒပ်ပၞာန်ဗၠးၜး ကောန်ဂကူမန် ဃောပၠဒပ် ပ္ဍဲတ္ၚဲကောန်ဂကူမန် မရနုက်ကဵု (၆၄) မကၠောန်ဗဒှ် ပ္ဍဲကွာန်ပၞၚ်ဗိုန် (ဗီု-ဌာန်ပရိုၚ် ဗၠးၜးမန်)

“သွက်ဂွံပံက်မုက်ပၞာန် ပ္ဍဲတွဵုရးမန်ဂှ် ပိုဲတုပ်လဝ်စိုတ် နွံမံၚ်၊ ယဝ်ရပိုဲ ပံက်မုက်ပၞာန်တှေ် ပေဲါဗတိုက် အပ္ဍဲဍုၚ်ဂှ် ကၠောံထၞာန်အာ အလုံဍုၚ်ဗၟာမွဲဏောၚ်” သာ်ဝွံ ကေၚ်ကာဗဟဵု ဟွံမိက်ဓမံက်ယၟုဂှ် ဟီုရ။

ပေဲါဗတိုက် က္တဵုဒှ်ကၠုၚ်မ္ဂး ဗွဲမပြဟ် ဂွံကလေၚ်ပၠိုတ်အာဂှ် ဟွံလောဲသွာဂှ်ရ မိက်ဂွံအာတ်မိက်ဏာ အလဵုအသဳပၞာန် ညံၚ်ဂွံဒေါံထောံ ထပက်ဒၟံၚ်ပၞာန်ကဵု ဒပ်ပၞာန်သေံဇၞော် ဒိုဟ်သၟဝ်ကျာဂှ်ရောၚ် ညးဆက်ဟီုရ။

ဒပ်ပၞာန်အလဵုအသဳဗၟာတံ စပံက်ဒၟံၚ်မုက်ပၞာန် ပ္ဍဲကဵုတွဵုရး သေံဇၞော် ဒိုဟ်သၟဝ်ကျာတေံ စနူဂိတုမာတ်ချ် တုဲကၠုၚ်ဏံရ။

ဒပ်ပၞာန်သေံဇၞော် သၟဝ်ကျာဂှ် ပ္ဍဲသၞာံ ၁၉၈၉ ဂိတုသေပ်တေမ်ပါတေံ ဒေံါကၠုၚ်ပန်ပှော်ကဵု အလဵုအသဳပၞာန်ဗၟာတုဲ ပ္ဍဲသၞာံတုဲကၠုၚ်ဏံဂှ် ဒေံါပန်ပှော်လီုကၠုၚ် ညံၚ်ရဴဗော်ဍုၚ်မန်တၟိကီုရ။ လၟုဟ်ဝွံ ဒပ်ပၞာန်သေံဇၞော် သၟဝ်ကျာဂှ် ပ္ဍဲဒပ်ပၞာန်ပံၚ်ကောံ ကောန်ဍုၚ်အရၚ်ဂှ်လေဝ် ပါလုပ်မံၚ် မွဲဂကောံကီုရ။

“ဒပ်ပၞာန်မွဲမွဲ ဒးဒုၚ်ဍဵုဍိုက် ဒးဒုၚ်ဗတိုက်မံၚ်ဂှ် နကဵုဒပ်ပိုဲတံ ကျောဝ်ဗဵုဒၟံၚ်သၟး၊ မုလေဝ်ဟွံကဵုအရီုအဗၚ်ဂှ် ဍေံဒှ်ကမၠောန်ပုဟ်” သာ်ဝွံ ကေၚ်ကာဗဟဵုဂှ် ဆက်ဟီုရ။

ယဝ်ရဒပ်ပၞာန် အလဵုအသဳတံ လုပ်ကၠုပ် ပ္ဍဲတိဍာ်ဗော်မ္ဂး သာ်လဵုဂွံဒုၚ်ဒဝ် တဝ်စၞေဟ်အာဂှ်လေဝ် ပ္ဍဲကောံဓရီု ကမ္မတဳဗဟဵု ဗော်ဍုၚ်မန်တၟိ မကၠောန်ဗဒှ် ပ္ဍဲဂိတုအေဗရာ ပထမသတ္တဟ ပ္ဍဲကၞောတ်ၜဳရေဝ် ဌာန်ဂအုပ်ဗဟဵုဂှ်လေဝ် သဳကၠဳကၠုၚ်လဝ် နွံရ။

ဟိုတ်နူ ပရေၚ်တုပ်စိုတ် ဒေါံပန်ပှော် လီုအာတုဲဂှ်ရ မွဲတ္ၚဲမ္ဂး ဒပ်ပၞာန်အလဵုအသဳတံ ဒးကၠုၚ်ဗတိုက်ညးတံတွဵုဏောဝ်ဂှ် က္ဍိုပ်သ္ကိုပ်ဗော်ဍုၚ်မန်တၟိတံ စၟဳညာတ်ကေတ်လဝ်ရ။