မိလျးထဝ် – ပ္ဍဲဂိတု အေဗရာ ၂၉ ဏံ ပယျာံနူဂယးဂှ် တ္ၚဲဥက္ကဌ ဗော်ပၠတရဴ ဍုၚ်မန် နာဲအံၚ်ထောန် စုတိအာ ပေၚ် (၄၁) သၞာံတုဲ ညးမဒှ် ကောန်ဇာတ် နာဲတေန်အံၚ် ကေုာံ ကောဒေံဂမၠိုၚ် ဖါပ်သၚ်ကဵုဒါန် ပ္ဍဲကျာ်စာၚ်ဍေဝ် ကွာန်ပ္ၚ ဒၞာဲမစွံလဝ် ဒၠိုၚ်ဇုတ်ညးရ။
နာဲအံၚ်ထောန်ဝွံ လောန်ကၠုၚ်မွဲအခိၚ်တေံ ကေတ်ကၠုၚ်လဝ်တာလျိုၚ် ဥက္ကဌ ဗော်ပၠတရဴ ဍုၚ်မန်ရ။ ညးဝွံ ဒှ်က္ဍိုပ်သ္ကိုပ်မွဲတၠ လုပ်ကၠုၚ်လဝ် ပေဲါဗတိုက်ရပ်လွဟ် သွက်အခေါၚ်ဗၠးၜး ညးဍုၚ်ကွာန်ဂကူမန်ရ။
ရန်တၟံ ညံၚ်ကောန်ဂကူမန်တံ ဟွံဂွံဝိုတ်ကၠေံ က္ဍိုပ်သ္ကိုပ်မန် ကေၚ်ဒတုဲကၠုၚ်လဝ်ဖဵု သွက်ကောန်ဂကူမန် မွဲအခိၚ်တေံဂှ်တုဲ ကၠောန်ကၠုၚ်ဒၟံၚ် တ္ၚဲညးစုတိအာ ဇၟာပ်ပ်သၞာံရ။ သၞာံဏံဂှ် ရဲကွာန်ပ္ၚ ကေုာံ ညးဍုၚ်ကွာန်မန် နူဒေသနာနာ လၟိဟ် (၂၀၀) တၠ တိုန်စိုပ်သဘၚ်ကၞာ ဖါပ်သၚ်ရ။
“မန်တံ ဒကးတိတ်မ္ဂး ဆလအ်မှ ဟွံဂွံပေဲါအံၚ်ဇၞးပုဟ်၊ ဍုၚ်မန် နွံကဵုအဝဵု ညံၚ်ဂွံမံက်ဂတဝ်ကၠုၚ်ဂှ် ဒှ်တာလျိုၚ် ကောန်ဂကူမန်တံ ဒးဂစာန်ကေတ်ကေတ်ရ” သာ်ဝွံ ညးကေၚ်ဟီုဗ္ကန်ကၠုၚ်လဝ်ကဵု ကောန်ဂကူမန်တံ နွံရောၚ်ဂှ် ညးမဒှ်ကောန်တြံု မရနုက်ကဵု တတိယ နာဲတေန်အံၚ် ကလေၚ်လဴထ္ၜးကဵု အတိုၚ်အရေဝ်ဗ္ကန် အပါညးရ။
“ဟိုတ်နူချပ်ဂွံ ဂလာန်ဗကာန် အပါတုဲ အဃောဗော်မန်ၜါဗော် ဒကးမံၚ် ပ္ဍဲသက္ကရာဇ် ၁၉၈၇ ဂှ် ပိုဲတိတ်ပၠန်ဂတးတှေ် ခိုဟ်ဏောၚ် ချပ်ဂွံတုဲ ပိုဲတိတ်အာဂြိပ်ရ” သာ်ဝွံ နာဲတေန်အံၚ် ဟီုရ။
“ပ္ဍဲတ္ၚဲဏံ ဍုၚ်မန် မကလိဂွံလဝ်ဂှ် ဒှ်ဒၟံၚ်ဍုၚ်မန် ဟၟဲကဵုအဝဵု ဟွံသေၚ်ရ၊ ဂကူမန်တံဂှ် ကတိုၚ်ကတိုၚ်ကၟဟ်ကၟဟ် ဒးကၠောန်အာ ဒးပံၚ်တောဲအာကဵု ဂကူဘဝတုပ်တံမှ တၚ်ရန်တၟအ် ဍုၚ်မန် နွံကဵုအဝဵုဂှ် ကလိဂွံကၠုၚ်မာန်ဏောၚ်” သာ်ဝွံ နာဲတေန်အံၚ် ဆက်ဟီုရ။
နာဲအံၚ်ထောန်ဝွံ မဒှ်ဇာတိကွာန်ပ္ၚ သ္ပမ္ၚဵုထပ်တဲကဵု မိဨသိၚ် ဇာတိကွာန်ကၠအ်သတ်တုဲ ကလိဂွံလဝ် ကောန်ဇာတ် (၁၂) တၠကီုရ။
ပ္ဍဲသက္ကရာဇ်ခရေတ် ၁၉၇၀ ဂိတုအေဗရာ၂၉ ဂှ် ဥက္ကဌ ဗော်ပၠတရဴဍုၚ်မန် နာဲအံၚ်ထောန် ကလိဂွံအာယုက် (၅၇) ဂှ် စုတိအာ ပ္ဍဲသ္ၚိညး လ္တူဍုၚ်မတ်မလီုရ။