ဌာန်ပရိုၚ်ဗၠးၜးမန် – ဂလာန်ကောလာဟလ ဗော်ဍုၚ်မန်တၟိ အာတ်မိက် မိက်ဂွံသဳကၠဳ ပရေၚ်ၜိုဟ်လလမ် ကုသကိုပ်ဝန်ဇၞော် တွဵုရးမန် ဥူအုၚ်မျေအ်ဂှ် ဟွံဍာံပြရောၚ် ဗော်ဍုၚ်မန်တၟိ ကယျာန်တးပဲါရ။
ဥက္ကဌဇၞော် ဗော်ဍုၚ်မန်တၟိ နာဲထဝ်မန် ဃောဟီုဂလာန် ပ္ဍဲတ္ၚဲကောန်ဂကူမန် မရနုက်ကဵု ၆၃ ဝါ မကၠောန်ဗဒှ် ပ္ဍဲပွဳပွုဗဟဵု ( ဗီု-ဌာန်ပရိုၚ်ဗၠးၜးမန်)
ဥက္ကဌ ဗော်ဍုၚ်မန်တၟိ နာဲထဝ်မန် ချူပလံၚ်ဗစိုပ်လဝ်လိက် ကုသကိုပ်ဝန်ဇၞော် ဥူအုၚ်မျေအ် သွက်သ္ဂောံသဳကၠဳ ပရေၚ်ၜိုဟ်လလမ်ရောၚ်ဂှ် သကိုပ်ဝန်ဇၞော် ဥူအုၚ်မျေအ် ဟီုဂးကဵု ကောန်ဂကောံ ဗော်ဒဳမဝ်ကရေဇြဳ အလုံရးမန် လ္ၚဵုတံရောၚ် ဗွိုၚ်ဗော်ဒဳမဝ်ကရေဇြဳ အလုံရးမန် ဟီုရ။
“ဥက္ကဌဇၞော်ပိုဲ ဂွံသဳကၠဳ ပရေၚ်ၜိုဟ်လလမ်ကဵု ညး (ဥူအုၚ်မျေအ်) ဂှ် ဟလဵုပလေဝ် ဒှ်ဟွံမာန်ပုဟ် အဲဂံၚ်ဟီု။ ပိုဲဒေံါကၠုၚ်ပန်ပှော် ၁၅ သၞာံပြၚ်တုဲရ။ စိုပ်အခိၚ်ဏံမှ သွက်ဂွံသဳကၠဳ ဟွံမွဲရပုဟ်” သာ်ဝွံ ညးအုပ်ကာနာနာ ဗော်ဍုၚ်မန်တၟိ ဟီုရ။
ဗော်ဍုၚ်မန်တၟိဂှ် ပ္ဍဲသၞာံ ၁၉၉၅ တေံ ဒေံါပန်ပှော်ကဵု အလဵုအသဳပၞာန်ဗၟာတုဲ ပ္ဍဲသၞာံ ၂၀၁၀ ဂှ် တၚ်တုပ်စိုတ် ဒေံါပန်ပှော် လီုလာ်ကၠုၚ်ရ။
စဂွံဒက်ပတန်လဝ် အလဵုအသဳတၟိတုဲ နကဵုညး ဂွံသဳကၠဳ ပရေၚ်ၜိုဟ်လလမ်ဂှ် ပြဟ်မံၚ်ဏီရောၚ်၊ အနာဂတ်ဂတတေံ ချပ်အာ သွက်သ္ဂောံသဳကၠဳ ပရေၚ်ၜိုဟ်လလမ်ပၠန်ရောၚ်ဂှ် ဥူအုၚ်မျေအ် ဟီုလဝ်ကီုရောၚ် ကောန်ဂကောံ ဗော်ဒဳမဝ်ကရေဇြဳ အလုံရးမန် မွဲတၠ ဟီုရ။
“ညး (ဥူအုၚ်မျေအ်) ဟီုလဝ်ကဵု ကောန်ဂကောံပိုဲ ဗီုဂှ်။ ဗွဲတၟေၚ်တှေ် လပါ်ပွိုၚ်ဍုၚ်မုဟ်ဍုၚ် ဂွံမိၚ်ဂၠိုၚ်” သာ်ဝွံ ကောန်ဂကောံဂှ် ဟီုရ။
ဥက္ကဌ ဗော်ဒဳမဝ်ကရေဇြဳ အလုံရးမန် နာဲဇၞူမန် ကော် နာဲၚိုဲတိၚ်လေဝ် “ မံၚ်ပ္ဍဲဍုၚ်တှေ် ခိုဟ်နူမံၚ် ပ္ဍဲဂြိုပ်ဏီ၊ ယဝ်ရ ဗော်ဍုၚ်မန်တၟိ ကၠုၚ်မံၚ် ပ္ဍဲဍုၚ်တှေ် ကဵုဒၞာဲခိုဟ်ခိုဟ်ဏောၚ်၊ ကဵုကမၠောန်ပရေၚ်ပိုန်ဒြပ် ခိုဟ်ခိုဟ်ဏောၚ်” သာ်ဝွံ အတိုၚ်ညး ဂွံမိၚ်လဝ် ဂလာန်ဥူအုၚ်မျေအ် မွဲကဆံၚ်ဂှ် ညးကလေၚ်လဴထ္ၜးရ။
ဗော်ဍုၚ်မန်တၟိဂှ် အလဵုညးတံ မွဲဂကောံဓဝ် တက်ကျာသဳကၠဳ ပရေၚ်ၜိုဟ်လလမ်ကဵု အလဵုအသဳတၟိဏံ ဟွံသေၚ်တုဲ ယဝ်ရဒးသဳကၠဳလေဝ် သဳကၠဳ နကဵုကံၚ်ဇြဳ ဖိတ်ဒရေဝ် ကောန်ဂကူ ကောန်ဍုၚ်အရၚ်ညဳသာ (UNFC) ရောၚ် ဟီုရ။
UNFC ဂှ် လောန်ကၠုၚ် ပ္ဍဲဂိတုဖေဖဝ်ဝါရဳ ၁၆ ဏံ ဒက်ပ္တန်ကၠုၚ်လဝ် နကဵုဂကောံရပ်လွဟ် ကောန်အရၚ် ၁၂ ဂကောံ မတွံဂး ဂကောံဗၠးၜးကချေၚ် KIO၊ ဗော်သွး ကောန်ဂကူကချေၚ် KNO၊ ဗော်သွး ကောန်ဂကူကရေၚ် KNU၊ ဗော်ဍုၚ်မန်တၟိ NMSP၊ ဗော်တဴတက် ကောန်ဂကူကရေၚ်ဍာဲ KNPP၊ ဗော်ပၠတရဴဗၠးၜး တွဵုရးပလံၚ် PSLF၊ သမဂ္ဂ ဒဳမဝ်ကရိတ်တေတ် ဠာဟူ LDU၊ ဗော်ညဳသာ ကောန်ဂကူရခေၚ် NUPA၊ ဗော်တဴတက် ဍုၚ်သေံ (ယျှာန်) SSPP၊ ဂကောံ ဗၠးၜး ကောန်ဂကူပအိုဝ် PNLO၊ ဗော်ဂဥုပ်ကောန်ဂကူ ‘’ဝ” WNO၊ ဗော်ပၠတရဴ ကောန်ဂကူချေၚ် CNF တံရ။
