မိကျေဝ်ဂေါဝ် – လ္တူ ကံၚ်ဇြဳ ဖိတ်ဒရေဝ် ကောန်ဍုၚ်အရၚ် ညဳသာ (UNFC) ဒက်ပတန် ဒပ်ပၞာန် ကၟိန်ဍုၚ်ဖိတ်ဒရေဝ်ဂှ် နကဵုဗော်ဒဳမဝ်ကရေသဳ ကောန်ဂကူမန် ဒုၚ်တၠုၚ်ထံက်အာဂလာန်ရောၚ် ဗော်မန်ဒဳမဝ် ဟီုရ။

နာဲၚိုဲသိၚ် ဒု-ဥက္ကဌ ဗော်ဒဳမဝ်ကရေသဳ ကောန်ဂကူမန် ဗီုဟီုတွံဒၟံၚ်ဂလာန် ပ္ဍဲတန်ဗတောန် လှေ် ဒယှေ် တိၚ်တိုက် အခိုက်ကၞာမန် (ဗီု-ဌာန်ပရိုၚ်ဗၠးၜးမန်)

“ဒပ်ပၞာန် ကၟိန်ဍုၚ်ဖိတ်ဒရေဝ်ဂှ် ဒက်ပ္တန်ထေက်မံၚ် တၟာလအ်ရ၊ ဆဂး ဟွံဒှ်ကၠုၚ်ပုဟ်၊ ဒက်ပကောံမာန် ဗီုလၟုဟ်ဏံဂှ် ခိုဟ်သြန်ကွေံရ” သာ်ဝွံ ဒု-ဥက္ကဌ ဗော်ဒဳမဝ်ကရေသဳ ကောန်ဂကူမန် နာဲၚိုဲသိၚ် ဟီုဂးရ။

“သွက်ဂွံစဵုဒၞာ ပရေၚ်တန်တဴမံၚ်စံၚ် ကောန်ဍုၚ်အရၚ် ညးဍုၚ်ကွာန်တံကီု ဂွံဒက်ပ္တန် ကၟိန်ဍုၚ်ဖိတ်ဒရေဝ်မာန်ကီု ရန်တၟံတုဲ ဒက်ပ္တန်ကၠုၚ်လဝ် ဒပ်ပၞာန် ကၟိန်ဍုၚ်ဖိတ်ဒရေဝ်ရောၚ်” လတူ UNFC လလောၚ်ပတိတ်လဝ်ပရိုၚ် ပ္ဍဲကောံဓရီု တုဲဒှ်အာ ပ္ဍဲဂိတုမေ ၁၄ တေံဂှ်တုဲ ဗော်မန်ဒဳမဝ် ဟီုဂးဏာ သာ်ဂှ်ရ။

ဗွဲမၜိုဟ်လလမ် သွက်ဂွံဒှ်အာ ပရေၚ်ပြံၚ်လှာဲဍုၚ်မာန် ကောန်ဍုၚ်အရၚ်ဂမၠိုၚ် ပံၚ်ကောံတုဲ ပတိုန်လိခ် အာတ်မိက်ကၠုၚ် ကုညးအုပ်ကာနာနာ ကုလသမဂ္ဂ ဂၠိုၚ်ကဵုအလန်ကီုလေဝ် ဒဵုလၟုဟ် ရုပ်ရဴဟွံမံက်ကၠုၚ်ဏီရောၚ်ဂှ် နာဲၚိုဲသိၚ် ဟီုရ။

“ပရေၚ်ပြံၚ်လှာဲဍုၚ်ဂှ် ၜိုဟ်ၜိုဟ်သြိုဟ်သြိုဟ် ဟွံက္တဵုဒှ်ကၠုၚ်တှေ် ကာလဒးဗတိုက်ကေတ်ထေက်လေဝ် ဒးဗတိုက်အာရဏောၚ်” သာ်ဝွံ ညးဟီုရ။

ဗော်ဒဳမဝ်ကရေသဳ ကောန်ဂကူမန်ဂှ် နကဵုယၟု “မန်ဒဳမဝ်” ညးတီဂၠိုၚ်ရ။ ပ္ဍဲပေါဲရုဲမာဲ သၞာံ ၁၉၉၀ တေံဂှ် ဂွံကၠုၚ်ညးစၞးကၠတ်ထဝ် ၅ တၠတုဲ ဒးဒုၚ်ပလီုကၠေံဗော် ပ္ဍဲသၞာံ ၁၉၉၂ တေံရ။

အကြာကောန်ဍုၚ်အရၚ်တံကဵု အလဵုအသဳ ပြသၞာပရေၚ်ဍုၚ်ကွာန် က္တဵုဒှ်ကၠုၚ်ဒၟံၚ်တံဂှ် နနဲပရေၚ်ပၞာန် သောၚ်ကလးအာမာန် ဟွံသေၚ်တုဲ နနဲပရေၚ်ဍုၚ်ကွာန်ဟေၚ် မိက်ဂွံသောၚ်ကလးအာရောၚ်၊ ၜိုန်ဂှ်လေဝ် နနဲကဲဏံပၠန် အလဵုအသဳတံ ဟွံဒုၚ်တဲတုဲ သောၚ်ကလးအာ နကဵုပရေၚ်ပၞာန်မ္ဂးလေဝ် သွက်ဂွံစဵုဒၞာအာ ညးဍုၚ်ကွာန် ကေုာံ တိဍာ်ဇကုတံဂှ် ကမၠောန်ဒးကၠောန်ထေက် ကၠောန်အာရောၚ် သာ်ဝွံ ညးအုပ်ကာနာနာ UNFC နာဲဟံသာ ဟီုဂးလဝ်ရ။

“ဇၟာပ်ဂကောံကောန်ဍုၚ်အရၚ် မၞုံကဵုဒပ်ပၞာန်ရပ်လွဟ် သီုဖအိုတ် ညံၚ်ဂွံပါလုပ် ပ္ဍဲဒပ်ပၞာန် ကၟိန်ဍုၚ်ဖိတ်ဒရေဝ်တုဲ ဗွဲမကိတ်ညဳကဵုဒေသ ချဳဒရာၚ်အာ ပရေၚ်ပၞာန်ရောၚ်” သာ်ဝွံ နာဲဟံသာ ဟီုရ။

ပြဟ်ဟ်ဏံ ပ္ဍဲဗော်ပၠတရဴ ဗၠးၜး တွဵုရးပလံၚ် PSLF ကေုာံ ဗော်ညဳသာ ကောန်ဂကူရခေၚ် NUPA တံဂှ် ဒပ်ပၞာန်ဗိုန်န်ကၟောန်န် ဟွံမွဲဏီရောၚ် ဂွံတီရ။

သ္ကိုပ်က္ဍိုက်ပ်ပၞာန် ဗော်သွး ကောန်ဂကူကရေၚ် (ကေအေန်ယူ) သ္ကိုပ်ပၞာန်ဇၞော် မူတူသေဖိုဝ်ဂှ် လၟုဟ် ဒှ်မံၚ် ညးတာလျိုၚ် ဌာနပရေၚ်စဵုဒၞာ ဒပ်ပၞာန်ကၟိန်ဍုၚ်ဖိတ်ဒရေဝ်ရ။ အပ္ဍဲဂကောံ က္ဍိုက်ပ်ပၞာန်ဂှ် နူဒပ်ပၞာန် မပါလုပ်ဂကောံ သ္ကိုပ်က္ဍိုက်ပ်ပၞာန် (ဝါ) ဒု-သ္ကိုပ်က္ဍိုက်ပ်ပၞာန် မွဲမွဲတၠ ပါလုပ်ရောၚ် ဂွံတီကေတ်ရ။

ပ္ဍဲ UNFC ဂှ် လောန်ကၠုၚ် ပ္ဍဲဂိတုဖေဖဝ်ဝါရဳ ၁၆ ဏံ ဒက်ပ္တန်ကၠုၚ်လဝ် နကဵုဂကောံရပ်လွဟ် ကောန်အရၚ် ၁၂ ဂကောံ မတွံဂး ဂကောံဗၠးၜးကချေၚ် KIO၊ ဗော်သွး ကောန်ဂကူကချေၚ် KNO၊ ဗော်သွး ကောန်ဂကူကရေၚ် KNU၊ ဗော်ဍုၚ်မန်တၟိ NMSP၊ ဗော်တဴတက် ကောန်ဂကူကရေၚ်ဍာဲ KNPP၊ ဗော်ပၠတရဴဗၠးၜး တွဵုရးပလံၚ် PSLF၊ သမဂ္ဂ ဒဳမဝ်ကရိတ်တေတ် ဠာဟူ LDU၊ ဗော်ညဳသာ ကောန်ဂကူရခေၚ် NUPA၊ ဗော်တဴတက် ဍုၚ်သေံ (ယျှာန်) SSPP၊ ဂကောံ ဗၠးၜး ကောန်ဂကူပအိုဝ် PNLO၊ ဗော်ဂဥုပ်ကောန်ဂကူ ‘’ဝ” WNO၊ ဗော်ပၠတရဴ ကောန်ဂကူချေၚ် CNF တံရ။