မာံသုတ – ဂိတုဂျောန် ၂၉ အခိၚ်နူဂယးပြဟ် ၜိုတ်ပယျာံသ္ဂာဗ္တံလောန်ဂှ် ပ္ဍဲဍုၚ်ဇြပ်ဗု ဗ္ဒာဲကရပ်သ္ၚိသ္ကိုပ်အုပ်ဓုပ်ပွိုၚ်ဍုၚ် ဗုမ်ခတိုဟ်အာမွဲမရောၚ် သာ်ဝွံ ရဲဍုၚ်ဇြပ်ဗုတံ ဟီုလဴရ။

ရမျှာၚ်ဗုမ်ခတိုဟ်ဇၞော်ကဵုဇြဟတ်ဂှ် အလုံဍုၚ်ဇြပ်ဗုမွဲ မိၚ်အာဖအိုတ်ဂှ် ညးတံဟီုရ။

လဒေါဝ်ဍုၚ်ဇြပ်ဗု ( ဗီု - ဌာန်ပရိုၚ်ဗၠးၜးမန်)

“ရဲအရပ်အံၚ်သာယျာပိုဲဏံလေဝ် မိၚ်ထတ်မံၚ်ဟဂှ်ရ၊ တိညံၚ်ကဵုချဳ” သာ်ဝွံ ညးဂွံမိၚ်လဝ်ရမျှာၚ် ဗုမ်ခတိုဟ် သၟတ်ဗြဴမွဲတၠ ဟီုလဴရ။

ဟိုတ်နူဗုမ်ခတိုဟ်အာသာ်ဏံတုဲ ကၟာၚ်ဍိုတ်ဗ္ဒာဲကရပ်သ္ၚိသ္ကိုပ်အုပ်ဓုပ်ဍုၚ်ဂှ် လီုလာ်အာရောၚ် သာ်ဝွံ မၞိဟ်ရေၚ်တၠုၚ်ဒၟံၚ်ကမၠောန် (စရဖ) မွဲတၠ ဟီုရ။

“ဒၞာဲဗုမ်ဏံခတိုဟ်ကဵု သ္ၚိဇမၠိၚ်ရုၚ် (စရဖ) ဂှ် ခြာဒၟံၚ်ကၟာၚ်ဍိုတ်မွဲရ၊ ခြာညးကအ်ၜိုတ် ၁၀၀ ဂိုက်ပြၚ်ၚ်ဓဝ်” သာ်ဝွံ ညးတေံဆက်ဟီုလဴရ။

စပ်ကဵုပရေၚ်ဗုမ်ခတိုဟ်လဝ်ဏံတုဲ ညးလဵု၊ ဂကောံလဵု တၠတဲလဵုရောဟီုဂှ် ဖျေံသ္ဂုတ်သွာတ်ချိၚ်ဆဟွံမာန်ဏီ ဂွံတီရ။ ဂကောံလဵုကၠောန်လဝ်ပွဏံဂှ်လေဝ် ဟွံဒုၚ်ဝန်အိုတ်ရ။

တုပ်ကဵုပရောဏံကီု သၞာံတုဲကၠုၚ်တေံ ၂၀၁၀၊ ဂိတုမေ ရ အခိၚ်ဗ္တံဂှ်လေဝ် ဗ္ဒာဲကရပ်ဒပ်ဗၠာဲသၟိၚ်ပလိက် ဍုၚ်ဇြပ်ဗု ဗုမ်ကေၚ်ခတိုဟ်ကၠုၚ်မွဲမကီုဂှ် ဒဵုကဵုလၟုဟ်ဂၠာဲတၠတဲဟွံဂွံဏီရ။ လောန်ကၠုၚ်ဂိတုမေ ၁၄ ဏံလေဝ် ပ္ဍဲရုၚ်ဆက်စၠောံဖုၚ် ဍုၚ်မုဟ်ဍုၚ်ဂှ် ဒပ်ရပ်လွဟ်မန်မွဲဂကောံ လုပ်ခတိုဟ်လဝ် ဗုမ်မွဲမကီုရ။

ဂိတုဂျောန် ၃၀ (တ္ၚဲဏံ) စွံလက်ကရဴအိုတ်တုဲ ရဲဂကောံရပ်လွဟ် မၞုံအပ္ဍဲပွိုၚ်ဍုၚ်ဇြပ်ဗုတံ လွဟ်နွံပ္ဍဲတဲမ္ဂး ညံၚ်ဂွံအာပအပ်ကေုာံ ရဲလွဟ်ဟၟဲတံပၠန်လေဝ် ညံၚ်ဂွံအာထပက်ၝောံတဲ ဒၞာဲရုၚ်အလဵုအသဳဆေၚ်စပ် တံရောၚ် သာ်ဝွံပ္ဍဲကဵုကွာန်လ္ၚဵုလ္ၚဵု ဆဝ်ဗ္ၚုဟ်လဝ်နကဵုစက်သၠဲရမျာၚ်တံဂှ် ဆက်စပ်ဒၟံၚ်ကဵု ပရေၚ်ဗုမ်ခတိုဟ်ဏံကီုဟာ ညးလ္ၚဵုဒှ်သၠေဟ်ပၟာအိုတ်ရ။

တ္ၚဲဂျောန် ၂၉ ဏံဂှ် ဒှ်တ္ၚဲဒေါအ်ပန်ပှော် ဗော်ဍုၚ်မန်တၟိကဵု အလဵုအသဳပၞာန်ကၠာတေံ ပေၚ်စိုပ်အာ ၁၇ သၞာံကီုလေဝ် လၟုဟ်ဟိုတ်နူပရေၚ်ဒေါအ်ပန်ပှော်လီုလာ်အာဂှ် ဟွံဒှ်ကၠောန်သ္ပသဘၚ်ကၞာနာနာရ။

တၚ်သမ္တီ။ ။ မာံသုတဝွံ ဒှ်သၟာပရိုၚ်ဗၠးၜးတုဲ ချူပလံၚ်ကဵုမံၚ်ပရိုၚ်ကဵု ဌာန်ပရိုၚ်ဗၠးၜးမန်ရ။