ဟံၚ်ဍုၚ်၊ စၠန်ထဝ်– ပ္ဍဲဂိတုမေ ၁၄ တေံဂှ် ရဲရပ်လွဟ်မွဲဂကောံ လုပ်ပန်ဖံက်ဖတိုဟ်ဏာ ရုၚ်ဆက်စၠောံဖုၚ် ကရပ်ဍုၚ်မုဟ်ဍုၚ် က္တဵုဒှ်ကၠုၚ်တုဲ နကဵုသၠုၚ်လဝ်ကဆံၚ်ပရေၚ်ဂီုကၠီုဂှ် ထပ်ပံက်တိုန်သၞေဟ်ကၚ်တၟိ ဒၞာဲဇိုၚ်ဂၠံၚ်ကွဳစက် ဍုၚ်မတ်မလီု-ဇြပ်ဗုရ။
သၞေဟ်ကၚ်စၟဳစၟတ် ပ္ဍဲရော်ဂို ပွိုၚ်ဍုၚ်မန်မလီု
ဇိုၚ်ဂၠံၚ်ကွဳစက် ပ္ဍဲကရပ်ကွာန်ဝၚ်ဒုန်၊ ပွိုၚ်ဍုၚ်မုဟ်ဍုၚ်ဂှ်မွဲဒၞာဲ အကြာမုဟ်ဍုၚ်ကဵု မတ်မလီုဂှ်မွဲဒၞာဲ စနူဂိတုဂျောန် ၁၃ လောန်ကၠုၚ်ဏံတုဲ ရဲဒပ်ပၞာန်ဓါတ်လလဳကေုာံ အေန်ဂျေန်ဏဳယျာကွတ်စက်(လစရ) မၞုံပါၚ်ဂၠံၚ်မုဟ်ဍုၚ် တိတ်အာလပါ် သၞေဟ်ဂၠုၚ်ၜါသွာၚ်ဂှ် ကၠုၚ်ဖျေံလဝ်ဒၞာဲရ။
“ရဲဒပ်လစရတံကၠုၚ်ဖျေံဒၞာဲဏံဂှ် သွက်ဂွံသ္ပပရေၚ်စၟဳစၟတ်ဟေၚ်ရ၊ ဒေသဏံဂှ် ဆေၚ်မံၚ်ကဵုညးတံဏောၚ်” သာ်ဝွံ ရဲအဆက်နွံကဵုဒပ်မၚ်ကွာန် ကောန်ကွာန်ဝၚ်ဒုန်မွဲတၠ ဟီုလဴရ။
ၜိုန်ရပံက်လဝ်သၞေဟ်ကၚ်တံဏံကီုလေဝ် လ္တူရဲအာတရဴတံဂှ် သၟာန်သၟုဟ်စၟဳစၟတ်ဒၟံၚ်ဟၟဲဏီရောၚ် သာ်ဝွံရဲကေၚ်တတ်ကၠောံ သၞေဟ်ကၚ်တံ ဟီုလဴရ။
အတိုၚ်လဟီုရဲဆဵုနတဲနဇိုၚ်တံမ္ဂး တၠတဲဖံက်ဖတိုဟ်လဝ် ရုၚ်ဆက်စၠောံဖုၚ် ကရပ်ဍုၚ်မုဟ်ဍုၚ်ဂှ် ဒှ်ရဲဒပ်ပၞာန်သၠးပွးကောန်ဍုၚ်မန်(MPLA) ရောၚ်ဂးလဝ်တုဲ အပ္ဍဲဂှ် ကောန်ဒပ်ပလိက်ဗၠာသၟိၚ်မွဲတၠချိုတ်အာ သီုရဲရုၚ်ဖုၚ်တံလေဝ် ဒးအာလဝ်ဝပ် နွံကီုရ။
သၞေဟ်ကၚ်ထပ်ပံက်လဝ်တၟိတၟိတံဏံဂှ် သွက်ဂွံကံက်စအကံက်လေဝ်ဒှ်မာန်ရောၚ် သာ်ဝွံ ရဲအာတရဴ နူမတ်မလီု၊ မုဟ်ဍုၚ်တံ ချိၚ်ဆဟီုဂးဒၟံၚ်ရ။
