မိလျးထဝ် – ကြဴနူပေဲါဗတိုက် အပ္ဍဲဍုၚ်တုဲ သၟာပရေၚ်ပိုန်ဒြပ်လ္တူဍုၚ်ကျာ်ပိတံ က္တဵုဒှ်ဒၟံၚ်ဓဝိၚ်တုဲ ဆေၚ်ဖျာဇၞော်ဇၞော်တံဂှ် ပံက်ဒၟံၚ်ဖျာ မွဲဗဂါပ်ဓဝ်ရ ဂွံတီကေတ်တုဲ သၟာကမၠောန်တအ် အတိုၚ်အဓမ္မတာကၠောန်မံၚ်ကမၠောန်ရောၚ် သၟာဗၞိက်လတ္တူဍုၚ်ကျာ်ပိတံ ကဵုနၚ်ပရိုၚ်ရ။
ဆေၚ်ဖျာ မသွံဒၟံၚ်ပ္ဍဲဖျာဇၞော် ဆေၚ်ဖျာဍောတ်တ် မပ္တံ ဖျာသၞေဝ် ကေုာံ ဖျာမြေက်၊ ကသိုဏ်၊ ကၠေၚ်တံဂှ် ကလေၚ်ပံက်ဒၟံၚ် ဗီုကၠာတေံရ။ ဆဂး ဆေၚ်ဖျာထဝ် ကေုာံ ဆေၚ်ဖျာ မၞံုၚုဟ်မးဂၠိုၚ်ၚ်တံဂှ် သွံဒၟံၚ်ဗဂါပ်နူဂယးသၟးတုဲ ဗဂါပ်သဝ်တ္ၚဲဂှ် ကၟာတ်ထောံအိုတ်ရ။
“ဆေၚ်ဖျာထဝ်တံတှေ် ဟွံပံက်ဟဂှ်ရ၊ ဖျာဇၞော်ဇၞော် မပ္တံ ဆေၚ်ပဠောံတံဂှ် ပံက်မွဲဗဂါပ်ဓဝ်ရ၊ ဖျာပိုဲဂှ် ၚုဟ်မးဍေံလေဝ် ဟွံဂၠိုၚ်ကွေံကွေံရတှေ် ပံက်မံၚ်ဗီုတြေံတေံဖိုဟ်လေဝ်” သာ်ဝွံ တၠဆေၚ်ဖျာသွံသ္ၚု ပ္ဍဲဖျာဇၞော် အရာပ် (၃) ဂှ် ဟီုရ။
အခိၚ်ဗ္တံမ္ဂး ကောန်ပၞာန် ကီု (စရဖ) တံကီု ကေတ်မံၚ်ဂီုကၠီု အကြာအရာပ်တံဂှ်လေဝ် ဂွံဆဵုကေတ်မံၚ်ရ သာ်ဝွံ ညးဆက်ဟီုရ။
သၟာကမၠောန်လ္တူဍုၚ်ကျာ်ပိ မကၠောန်ဒၟံၚ်ကမၠောန် လ္ပာ်ကျာ်ပိကုန်သေံတံဂှ် အာကၠုၚ်ကၠောန်ကမၠောန်ရုၚ်စက် အတိုၚ်တြေံတေံအိုတ်ရ။ သၟာကမၠောန်လၟိဟ် (၄၀၀၀) ပြၚ် နူကဵုဍုၚ်ကျာ်ပိဂှ် အခိၚ်နူဂယး တိုန်ကၠုၚ် ကၠောန်ကမၠောန် ရုၚ်စက် ဇိၚ်စက်၊ ဂၞောပ်တအ်နွံရောၚ်။ ဆဂး ရဲတၠကၠအ်တံဂှ် ဟွံဂံၚ်အာကမၠောန်ဏီဖိုဟ်ရောၚ် သာ်ဝွံ သၟာကမၠောန်လ္တူဍုၚ်ကျာ်ပိ မွဲတၠ ဟီုရ။
“ယဝ်ခါရပေဲါဗတိုက်ကလေၚ် က္တဵုဒှ်ပၠန်ဟီုရ ညးဍုၚ်ကွာန်လ္တူဍုၚ်ကျာ်ပိတံကီု သၟာပရေၚ်ပိုန်ဒြပ်တံကီု၊ သၟာကမၠောန်တံကီု ဒးဂြိပ်ဒဴဘဲပၞာန်တှေ် က္တဵုဒှ်ကၠုၚ်အခက်အခုဲတၟာဂလိုၚ်ရ” သာ်ဝွံ ညးတၠပရေၚ်ပိုန်ဒြပ်လ္တူဍုၚ်ကျာ်ပိမွဲတၠ ပါ်ပဲါလဝ်ရ။
ဟိုတ်အကာဲအရာ ဒပ်ပၞာန်အလဵုအသဳ (စရဖ) တံကဵု ဒပ်ပၞာန်ကရေၚ်တံ ဟွံပြေပြံၚ်ဏီဂှ်ရ သၟာကူသွံရာန် လ္ပာ်ဒေသပယျဵုတံဂှ် အာကၠုၚ်ဒညဒၟံၚ်တုဲ ကပေါတ်စၞစတံဂှ် ၚုဟ်တိုန်ကၠုၚ်ကီုရရောၚ်။
ပ္ဍဲဂိတု ဂျူန် ၁၄ လောန်ကၠုၚ်တေံဂှ် ၜိုတ်အခိၚ်လဒေါဝ်တ္ၚဲ ဒပ်ဟွံတီယၟုမွဲဒပ် ပန်ကဵုလွဟ်ဇၞော် (RPG) ပ္ဍဲသ္ၚိနာဲ အောၚ်တေန်ဝေန် တၠဆေၚ်ဖျာထဝ် လ္တူဍုၚ်ကျာ်ပိ မၞံုကြာပ်မံၚ်ကဵု ရုၚ် (စရဖ) ဂှ်ရ၊ ပ္ဍဲဂိတုဂျူန် ၁၁ ဂှ် ဒပ်ပၞာန်အလဵုအသဳတံကဵု ဒပ်ပၞာန်ကရေၚ် ကေအန်ယူ အပံၚ်ဒပ်ပၞာန်ဒဳကေဘဳအေ ဒှ်ပေဲါဗတိုက် ပ္ဍဲကွာန်ဒေသ မကသ ရ။