မာံတဵုလွဳ – ဟိုတ်နူကဵု ရဲရာန် မဗၜိုတ် နူတွဵုရးမန်၊ တွဵုရးသေံဇၞော် (ယှာန်) တံ ဂၠိုၚ်လောန်တုဲ အပ္ဍဲတွဵုရးမန်ဏံ ဒှ်တိုန်အခက်အခုဲ သွက်သ္ဂောံတဵု မဗၜိုတ်ဆက်မတ်အိုတ်ရ။

(ဗီု-www.telemontgroup.com)

“ဗီုပိုဲကဵုပိုဲ တဵုလွဳမံၚ် အပ္ဍဲတွဵုရးဍုၚ်မန်ပိုဲဏံတှေ် မဗၜိုတ်ပိုဲတံဂှ် ရုမ်ဂပ်မံၚ်ရ၊ ဆဂး နူဒေသ တွဵုရးသေံတေံ ကၠုၚ်ရာန်မံၚ် ဟဂှ်တှေ် ပ္ဍဲဒေသပိုဲ မဗၜိုတ် ဟွံရုမ်ဂပ်ပုဟ်” သာ်ဝွံ မာန်နေဂျာ ဌာနတဵုလွဳ အလဵုအသဳမွဲတၠ ဟီုရ။

ညးယိုက်ဂၠေၚ်မံၚ် တာလျိုၚ် ပ္ဍဲကၠအ် ပလောမ်မဗၜိုတ် အလဵုအသဳမွဲတၠ “ရေႊဥယျာဉ် ရာဘာပျိုးခြံ” မၞုံဇရေၚ် ကွာန်ကွိက်ဝါန် ပွိုၚ်ဍုၚ်မုဟ်ဍုၚ် ဟီုလဴနၚ်ဂှ် ပ္ဍဲဂိတုဏံ နူတွဵုရးသေံ ကၠုၚ်ရာန်လဝ် မဗၜိုတ်ဆက်မတ် ပ္ဍဲကၠအ်ညးတံ တၞံၜိုတ်မွဲဠက်ပြၚ်တုဲ သီုနူကၠအ်တၞဟ်ဟ်မ္ဂး တၞံၜိုတ်မွဲကိုဋ်ပြၚ်ၚ် နွံကီုရ။

တၠကၠအ်ပလောမ် မဗၜိုတ်ဆက်မတ် မၞုံပ္ဍဲကွာန်မယျာန် ပွိုၚ်ဍုၚ်မုဟ်ဍုၚ် မွဲတၠဂှ်လေဝ် “ရဲတွဵုရးသေံတံ ကၠုၚ်ရာန်ဏာ မဗၜိုတ်အဲ ၅၀၀၀ ကီု” သာ်ဝွံ ဟီုရ။

အပ္ဍဲတွဵုရးဍုၚ်မန်မ္ဂး ပွိုၚ်ဍုၚ်မုဟ်ဍုၚ်ဂှ် ကၠောန်ပတိတ် မဗၜိုတ်ဆက်မတ် ဂၠိုၚ်အိုတ်တုဲ ပ္ဍဲပွိုၚ်ဍုၚ်ဇြပ်ဗု၊ ပွိုၚ်ဍုၚ်ရေဝ် ကေုာံ ပွိုၚ်ဍုၚ်ကျာ်မြဟ်တံလေဝ် တဵုပလောမ်ပတိတ်မံၚ်ကီုရ။

အပ္ဍဲတွဵုရးဍုၚ်မန်မ္ဂး ဌာနသုတေသန ကၠောန်ပတိတ် မဗၜိုတ်ဂကူ နွံဒၟံၚ်တုဲ နူဂှ်မွဲကဆံၚ် ဆက်တြးကဵုမံၚ် တၠကၠအ်တံရောၚ်၊ တၠကၠအ်တံလေဝ် ကလေၚ်တဵုပလောမ်တုဲ ပရးသွံပတိတ်မံၚ် မွဲကဆံၚ်ပၠန်ရောၚ် သာ်ဝွံ တၠကၠအ်ဗၜိုတ် ဍုၚ်မုဟ်ဍုၚ်မွဲတၠ ဟီုရ။

အပ္ဍဲဂိတုမေမံက် လောန်ကၠုၚ်ဏံ မဆက်မတ် (PB-260) မွဲတၞံ နူ ၃၅၀ ဒကေဝ်ဂှ် ပ္ဍဲဂိတုဂျုန်ဏံ စိုပ်အာ ၄၀၀ ဒကေဝ်တုဲ မဆက်မတ် (PBM-24) မွဲတၞံ နူ ၃၀၀ ဒကေဝ်ဂှ် စိုပ်အာ ၃၅၀ ဒကေဝ်ရ။

ကၠာတေံ ညးမဒှ်ကၠုၚ် သ္ကိုပ်ဌာန်ဂအုပ်ပၞာန် ရးဒိုဟ်ဨသာန် သ္ကိုပ်ပၞာန်မျေအ်လှာၚ် (လၟုဟ်ညးဒှ်ဒၟံၚ် ဝန်ဇၞော်ကၟိန်ဍုၚ် ဆေၚ်စပ်ကဵု ပရေၚ်တဵုလွဳ ကေုာံ ကၟိုန်ဍာ်နာနာ) ဂှ် သွက်ဂွံတဵုလွဳဗၜိုတ် အပ္ဍဲဒေသတွဵုရးသေံ သကုတ်ဗၟံက်၊ သကုတ်သၟဝ်ကျာဂှ် ဖျေံကၠုၚ်အဇဳဇန် နွံတုဲ လၟုဟ်အလဵုအသဳတွဵုရးသေံ ဆက်ဓမံက်မံၚ် ရုပ်ရဴရောၚ် ညးတဵုခၜိုတ် နူဒေသကျိုၚ်တောမ် (ကျိုၚ်းတုံ) တွဵုရးသေံ မွဲတၠ ဟီုရ။

ပၞောဝ်ကဵုအလုံဍုၚ်ဗၟာမွဲ တဵုလဝ်တၞံဗၜိုတ် ဨက ၁၀ ကိုဋ်ပြၚ် နွံဒၟံၚ်ဂှ် အပ္ဍဲတွဵုရးဍုၚ်မန် မၞုံ ၄၅၀ ၀၀၀ ဨကပြၚ်တုဲ ကွာတ်ဂွံမံၚ် ဨက၂၇၀ ၀၀၀ ပြၚ်ရောၚ် ဂွံတီကေတ် နူစရၚ်အလဵုအသဳတံရ။

အပ္ဍဲတွဵုရးဍုၚ်မန်မ္ဂး မဗၜိုတ်ဂကူ ဆက်မတ်၊ ပလောမ်မ ၜိုတ် ၅၀ ကိုဋ် နွံမာန်ရောၚ် မာန်နေဂျာ ပရေၚ်တဵုလွဳမွဲတၠ တော်ဆလဝ် နွံရ။