မာံသုတ – ညးစၞးဗော်အလုံဒေသရးမန် AMDP ၂ တၠတံ တ္ၚဲယးဂိတုဂျူလာၚ် ၂၇ မ္ဂး သွက်ဂွံအာဆဵုကု ဂကောံကဝ်မယှေန်ပေါဲရုဲစှ်မာဲပ္ဍဲနေဗျဳတဝ်တေံဂှ် တ္ၚဲဏံစတိတ်အာတရဴရ သာ်ဝွံ ဥက္ကဌဗော် နာဲဇၞူမန် ဟီုရ။

နကဵုညးစၞးဗော်ဏံဂှ် ရုဲစှ်ဏာလဝ် ဥက္ကဌ နာဲဇၞူမန်ကေုာံ ညးလုပ်ဂကောံကေၚ်ကာနာဲလှခိုၚ် ၂ တၠရောၚ်ဂွံတီရ။

“ညးတံကော်ဘိက်လဝ် ပ္ဍဲကဵု ၃၇ ဂှ်တှေ် မွဲဗော် ၂ တၠ၊ နကဵုကဝ်မယှေန်ဂှ် မုသာ်လဵုဟီုဂးကၠုၚ်ရောဂှ် ဟွံဂွံတီဏံပုဟ်၊ ဆေၚ်စပ်ကဵုတၚ်ဍိုန်လျ ပေါဲရုဲမာဲတုဲကၠုၚ်ဏံ နကဵုဗော်ပိုဲသွက်ဂွံပတိုန်ထ္ၜးချူလဝ် လိခ်ကၞပ်နွံ” သာ်ဝွံနာဲဇၞူမန် ဆက်ဟီုရ။

ကာလပေါဲရုဲမာဲ ၂၀၁၀ လောန်ကၠုၚ်တေံဂှ် နဒဒှ်ညးစၞးကၠတ်ထဝ်ညးဍုၚ်ကွာန် နာဲဇၞူမန် ၜိုန်ရလုပ်ပြိုၚ်မာဲ ပ္ဍဲပွိုၚ်ဍုၚ်ကျာ်မြဟ်ကီုလေဝ် ဟိုတ်နူဂကောံကဝ်မယှေန်မာဲတံ ကၠောန်ပွပပ်ပဳပရေၚ်ဒစးစုတ်မာဲဒှ်ကၠုၚ်တုဲ ညးဒးဒုၚ်ကျအာမာဲရ။ ပ္ဍဲဒေသမာဲပွိုၚ်ဍုၚ်ကျာ်မြဟ်မ္ဂး ညးစၞး “ဗော်ကျဖောအ်”ဂှ် နကဵုမာဲဒစးစုတ်လဝ်ညိညဟေၚ် ကေတ်ကၠုၚ်ဇၞးကု ဥက္ကဌဗော်မန်ရ။

နကဵုစၟတ်တ္ၚဲဂိတုဂျူလာၚ် ၁၈ ဂကောံကဝ်မယှေန်ပေါဲရုဲစှ်မာဲနေဗျဳတဝ်တေံ ကော်ဘိက်လဝ်ဗော်လုပ်ပြိုၚ်လဝ်မာဲမွဲဗော်မ္ဂးညးစၞး ၂ တၠ နဒဒှ်ဥက္ကဌ(ဝါ) ညးအုပ်ကာ(ဝါ) ဂကောံကေၚ်ကာတံဟေၚ် ဒးကၠုၚ်တိုန်စိုပ် အခိၚ်နူဂယး ၁၀ နာဍဳ၊ ပ္ဍဲကဵုဂိတုဂျူလာၚ် ၂၇ ဂှ်ရောၚ်ဂွံတီရ။

ဆဂး ဆေၚ်စပ်ကဵုမုကိစ္စတုဲ ဒးကော်ဘိက်ကောံဓရီုဏံဂှ် ကၠးကၠးမးမး ချူပတိတ်လဝ်ဟၟဲရ။ နကဵုဗော်မန် AMDP ဂှ်လေဝ် အခေါၚ်အရာပတိုန်ထ္ၜးပ္ဍဲကဵုကောံဓရီုနွံ/ ဟၟဲဂှ် ဟွံဂွံတီကီုရ။

“ကာလပိုဲကလေၚ်ကၠုၚ်မ္ဂး သွက်ဂွံကော်ကောံဓရီုကမ္မတဳဗဟဵုဗော်ပိုဲနွံရ၊ အမာတ်မန်ပိုဲလ္ၚဵုဒှ်အာဝန်ဇၞော်တံ ကဵုအခိၚ်ကဵုပရေၚ်ဗော်ပိုဲဟွံမာန်ဒှ်မံၚ်ဂှ်လေဝ် ဒးဂါၠဲအာသွဟ်ကီုရောၚ်” သာ်ဝွံ နာဲဇၞူမန် ဟီုရ။

ပ္ဍဲပေါဲရုဲစှ်မာဲသၞာံ၂၀၁၀ တုဲကၠုၚ်ဏံ ဗော်မန် AMDP လုပ်ပြိုၚ်ကၠုၚ်မာဲ ၃၄ တၠဂှ် ဂွံကၠုၚ်ဇၞး ၁၆ တၠရ။

အမာတ်ဗော်မန် AMDP တံဂှ် ပ္ဍဲတွဵုရးဍုၚ်မန် ၂ တၠကေုာံ ပ္ဍဲကဵုတွဵုရးဍုၚ်ကရေၚ် ၂ တၠ နကဵုဝန်ဇၞော်ပါလုပ်မံၚ်ပ္ဍဲဂကောံအလဵုအသဳလၟုဟ်တံရ။

ပ္ဍဲဂကောံအလဵုအသဳကၟိုန်ဍုၚ်ကေုာံ တွဵုရး၊ ဒေသရးဇၞော်တံမ္ဂး ဗော်ကျဖေါအ်သၟးကေတ်လဝ်ဒၞာဲ ဟွံသေၚ်ကီု သီုကဵုအမာတ်ရဲဗော်ဒစဵုဒစးတံလေဝ်ပါလုပ်ဒၟံၚ်ကီုတုဲ လညာတ်သွက်ဂွံဒစဵုဒစးလ္တူအလဵုအသဳသ္ဂောံအောန်စှေ်ကၠုၚ်ဂှ် ဖန်ဇန်လဝ်ရောၚ် သာ်ဝွံတၠပညာပရေၚ်ဍုၚ်ကွာန်ခါတ်လဝ်အကာဲနွံရ။

ညံၚ်ဗော်ကျဖေါအ်ဂွံဇၞးမာဲ ပ္ဍဲကဵုပေါဲရုဲစှ်မာဲတုဲကၠုၚ်ဏံဂှ် နကဵုကဝ်မယှေန်ရုဲစှ်မာဲတံ ပကောံပကေဝ်ကဵုလဝ် မာဲဒစးဒုၚ်စုတ်ကဵုလဝ်ဗွဲမဂၠိုၚ်ရောၚ် သာ်ဝွံ ပ္ဍဲလိခ်ဒုၚ်စဳရေၚ်ညးမၚ်လ္ၚတ်ရံၚ်ပရေၚ်စုတ်မာဲဍုၚ်တံ ဒုၚ်စဳရေၚ်ကၠုၚ်လဝ်နွံရ။