မာံသုတ – ညးစၞး အလဵုအသဳတွဵုရးမန် ကေုာံ ဗော်ဍုၚ်မန်တၟိ ၜါလပါ် ပ္ဍဲဂိတုအံက်တဝ်ဗာ ၆ အခိၚ်နူဂယး ၉ နာဍဳဂှ် ဗွဲပဏာမ စသဳကၠဳ ပ္ဍဲဗွိုၚ်တမ်ဒပ် ခလရ ၆၁ ဍုၚ်ရေဝ်တုဲ အခိၚ်တ္ၚဲစေၚ်ဂှ် တုဲဒှ်အာရောၚ် ဂွံတီကေတ်ရ။

ဍုၚ်ရေဝ်

“သွက်ဂွံပတိုန်ကဵု အလဵုအသဳဂှ် နူဗော်ပိုဲ ဖျေံလဝ်မူဍေံတုဲဒၟံၚ်ရ။ ကာလဆဵုဂဗ တက်ကျာလေဝ် ပတိုန်ထ္ၜး ဂလာန်ဏံရ။ နူလပါ်အလဵုအသဳတေံ မုကလေၚ်ဟီုနၚ်ဂှ် ညးစၞးပိုဲ ဟွံကလေၚ်စိုပ် ဗဟဵုတှေ် ပတိုန်ထ္ၜးဏောၚ်” သာ်ဝွံ ညးမၞုံအခေါၚ်ဟီုဂး ဗော်ဍုၚ်မန်တၟိ နာဲဟံသာဗိုန်ခိုၚ် ဟီုရ။

နူလပါ်ဗော်ဍုၚ်မန်တၟိ ကေၚ်ကာဗဟဵု နာဲတၠညး က္ဍိုက်က္ဍိုပ်တုဲ နဒဒှ်ကောန်ဂကောံ ညးမဒှ်ကမ္မတဳဗဟဵု သကိုပ်တမ်ဒပ် လၟိဟ် (၇) ဒု-သကိုပ်ဗိုလ်ဇၞော် ဟံသာ ကေုာံ ညးအုပ်ကာ ခရိုၚ်ထဝဲါ နာဲဗညာလဴတံ ပါလုပ်ရောၚ် ဂွံတီကေတ် နူဗော်ဍုၚ်မန်တၟိရ။

လပါ်အလဵုအသဳ တွဵုရးမန်ဂှ် ဝန်ဇၞော်ပရေၚ်ဂီုကၠီု ကေုာံ ပရေၚ်ကေၚ်ကာပယျဵု သကိုပ်ဗိုလ်ဇၞော် ဌေမျေအ်အံၚ် ကေုာံ ညးတာလျိုၚ် နူဌာန်ဂအုပ်ပၞာန် ရးဒိုဟ်အဂၞဲ ၜါတၠလေဝ် ပါလုပ်ရောၚ် ဂွံတီကေတ်ရ။

ညးစၞးဗော်ဍုၚ်မန်တၟိတံဂှ် နူ ပ္ဍဲဂိတုအံက်တဝ်ဗာ ၆ အခိၚ်သဝ်တ္ၚဲဂှ် ကလေၚ်တိုန်ကၠုၚ် ဌာန်ဂအုပ်ဗဟဵု နကဵုဂၠုၚ်စက်အိုတ်ရောၚ် ဂွံတီကေတ်ရ။

နကဵုဗော်ဍုၚ်မန်တၟိ နူကောံဓရီုကာတၟေၚ် ကမ္မတဳဗဟဵု ဂိတုတုဲကၠုၚ်တေံ သွက်ဂွံသဳကၠဳ ပရေၚ်ၜိုဟ်လလမ် အလုံဍုၚ်မွဲ နကဵု UNFC ဂှ် ဖျေံလဝ်မူတုဲရောၚ် ဂွံတီကေတ်ရ။

“ဗော်ဍုၚ်မန်တၟိဂှ် ဒှ်မံၚ်ကောန်ဂကောံ UNFC တုဲ ဒေံါပန်ပှော်ဒှ်ဒှ်၊ သဳကၠဳပရေၚ်ၜိုဟ်လလမ်ဒှ်ဒှ် ဒးသဳကၠဳကဵု ဒပ်ပံၚ်ကောံထေက်ဏောၚ်၊ သဳကၠဳကဵု ဒပ်ပံၚ်ကောံတှေ် အံၚ်ဇၞးမာန်ဏောၚ်။ သဳကၠဳကဵု ဗော်ဇကု မွဲဓဝ်တှေ် သဳကၠဳကဆံၚ်တုပ် ဒှ်ကၠုၚ်ဟွံမာန်ပုဟ်” သာ်ဝွံ သကိုပ်ဗိုလ်ဇၞော်တြေံ ဗော်ဍုၚ်မန်တၟိ နာဲကောတၠရတ် ဟီုရ။

ပ္ဍဲကံၚ်ဇြဳ ဖိတ်ဒရေဝ်ညဳသၟဟ်ကောန်ဍုၚ်အရၚ် UNFC ဒက်ပ္တန်လဝ် ပ္ဍဲဂိတုဖေဖဝ်ဝါရဳ သၞာံဏံဂှ် ဗော်သွးကောန်ဂကူကရေၚ် KNU၊ ဗော်ဍုၚ်မန်တၟိ NMSP၊ မုခ်ဒပ်ကောန်ဂကူချေန် CNF၊ ဂကောံသၠးပွးကောန်ဂကူကချေၚ် KIO၊ ဗော်တဴတက်ကောန်ဂကူကရေၚ်ဍာဲ KNPP ကေုာံ ဗော်တဴတက်ဍုၚ်သေံဇၞော် SSPP တံ ပါလုပ်အိုတ်ရ။

သအာၚ်နူဂှ်ပၠန် ပ္ဍဲဂကောံဆက်စပ်တံဂှ် ဂကောံကောန်ဂကူပအိုဝ်ဗၠးၜး PNLO ၊ မုခ်ဒပ်ဗၠးၜးတွဵုရးပလံၚ် PSLF၊ ကံၚ်ဇြဳကောန်ဂကူဍုၚ်ရခေၚ် ANC၊ သမဂ္ဂဒဳမဝ်ကရိတ်တေတ်ဠာဟူ LDU၊ ဂကောံကောန်ဂကူ “ဝ” WNO ကေုာံ ဂကောံကောန်ဂကူကချေၚ် KNO တံပါလုပ်ရ။