မာံသုတ – နူဂကောံ ကံၚ်ဇြဳပရေၚ်ၜိုဟ်လလမ် KNU/KNLA မၞုံဇြဟတ် (၁၅) တၠဂှ် ပ္ဍဲဂိတုအံက်တဝ်ဗာ ၂၀ ဖျေံလွဟ် ပ္ဍဲၝောံဗဒမ်တွဵုရးမန် ဍုၚ်မတ်မလီုရောၚ် ဓမံက်ထ္ၜးလဝ် ပ္ဍဲလိက်ပရိုၚ်အလဵုအသဳ ဂိတုအံက်တဝ်ဗာ ၂၁ ရ။
နူဂကောံ ကံၚ်ဇြဳပရေၚ်ၜိုဟ်လလမ် KNU/KNLA သကိုပ်ဗိုလ် သဝ်အေဝ်ထူ ဍိုက်က္ဍိုပ်တုဲ ဖျေံလွဟ် ကုဝန်ဇၞော်ပရေၚ်ဂီုကၠီု ကေုာံ ပရေၚ်ကေၚ်ကာပယျဵု သကိုပ်ဗိုလ်ဇၞော် ဌေမျေအ်အံၚ်ရောၚ်။
“ဣဏံဂှ် ညးဍုၚ်ကွာန်မန်တံ အာရီုစိုတ်ဂွံပြး ဝေၚ်ပရေၚ်စိုတ်ဓါတ်ဏောၚ်။ မုလေဝ် တၟေၚ်ကၠုၚ် ဟွံသေၚ်ပုဟ်” သာ်ဝွံ ကမ္မတဳဗဟဵုတြေံ ဗော်ဍုၚ်မန်တၟိ မွဲတၠ ဟီုရ။
ပ္ဍဲအခန်ကၞာ ဖျေံလွဟ်ဂှ် သကိုပ်ဝန်ဇၞော် တွဵုရးဍုၚ်မန် ဥူအုၚ်မျေအ် ကေုာံ ဝန်ဇၞော်တွဵုရးဂမၠိုၚ်၊ ညးတာလျိုၚ် ကဆံၚ်တွဵုရး၊ ခရိုၚ်၊ ပွိုၚ်ဍုၚ်ဂမၠိုၚ် ကေုာံ မိမညးဍုၚ်ကွာန်တံ တိုန်စိုပ်ရောၚ်ဂှ် လိက်ပရိုၚ်ဂှ် ချူဓမံက်လဝ်ရ။
အတိုၚ်လိက်ပရိုၚ်ဂှ် ချူဓမံက်လဝ်မ္ဂး ညးဖျေံလွဟ်မွဲမွဲတၠ ဂွံအထံက်အပၚ် သြန်မွဲကိုဋ်၊ သ္ၚုမွဲရိုက်၊ ကၠေၚ်မွဲပသာရောၚ် ဂွံတီကေတ်ရ။
“ယၟုသဝ်အေဝ်ထူဂှ် ယၟုပ္ဍဲ KPF အခိၚ်ကၠာတေံဏောၚ်၊ ပ္ဍဲကံၚ်ဇြဳပရေၚ်ၜိုဟ်လလမ်ဂှ် ဟွံကေၚ်မိၚ် ယၟုဏံပုဟ်” သာ်ဝွံ အေဝ်ဒဳတာ ဌာန်ပရိုၚ်ကရေၚ် KIC ဟီုရ။
တုပ်တဴသာ်ဂှ်ကီု သကိုပ်ဒပ်ပါ် နူတမ်ဒပ် (၇၀၉) မၞုံသၟဝ် ကံၚ်ဇြဳပရေၚ်ၜိုဟ်လလမ် KNU/KNLA ဍိုက်က္ဍိုပ်တုဲ ဇြဟတ် ၂၅ တၠဂှ် ပ္ဍဲဂိတုဂျုန် ၁၃ ဖျေံလွဟ် ပ္ဍဲၝောံဗဒမ်သြၚ်လောန် မၞုံပ္ဍဲဍုၚ်ကျာ်မြဟ်ရောၚ်ဂှ် လိက်ပရိုၚ်အလဵုအသဳ ချူဓမံက်ကၠုၚ်လဝ်နွံရ။
အလဵုအသဳဗၟာဂှ် မွဲလပါ်တေံ ဒုၚ်တၠုၚ်ပြၚ်ဂလာန် ပရေၚ်ၜိုဟ်လလမ် ကုဒပ်ပၞာန်ရပ်လွဟ် ကောန်ဍုၚ်အရၚ်တုဲ မွဲလပါ်ဂှ် ထပက်မံၚ်ပၞာန်ရ။ သအာၚ်နူဂှ်ပၠန် ဆက်ကၠောန်သ္ပမံၚ် ပေဲါဖျေံလွဟ်ရ။
ပ္ဍဲတ္ၚဲအဒိုတ် တုဲကၠုၚ်ဏံဂှ် ညးစၞးအလဵုအသဳဗၟာ ကေုာံ ညးစၞး ဗော်သွးကရေၚ် (KNU) ၜါလပါ်တံ ကၠတ်ဆဵုဂဗတက်ကျာ ပ္ဍဲမာဲဆံက် ဍုၚ်သေံရောၚ် ပရိုၚ်ပြးမံၚ်ကီုလေဝ် လပါ် KNU ဟွံသ္ပဒတန်ရ။
သအာၚ်နူဂှ်ပၠန် ပ္ဍဲဂိတုအံက်တဝ်ဗာ ၆ ဂှ် ညးစၞး ဗော်ဍုၚ်မန်တၟိ ကေုာံ ညးစၞးအလဵုအသဳတွဵုရးမန်တံ ဆဵုဂဗတက်ကျာ ပ္ဍဲဍုၚ်ရေဝ်ကီုလေဝ် ဟွံဆဵုညာတ်ကေတ် ပရေၚ်တဴတက်ဏီရ။