စၠန်ထဝ် – အတိုၚ်အလဵုအသဳလၟုဟ် လလောၚ်ပတိတ်လဝ်မ္ဂး ပ္ဍဲဝှ်ပေၚ်ဏံ သၠးကဵုဒုဟ်ဒဏ် ကုကောန်ထံၚ် (၆၃၅၉) တၠတုဲ ပ္ဍဲဂှ် ကောန်ထံၚ်ပရေၚ်ဍုၚ်ကွာန်မန်လေဝ် ပါကၠုၚ်မာန်ရောၚ်ဂှ် မသကောံဒေံညးတံ စၟဳပတှေ်မံၚ်အိုတ်ရ။
- ထံၚ်ဍုၚ်မတ်မလီု
ညးဒးဒုၚ်မံၚ် ထံၚ်မွဲအာယုက် နာဲယက္ခ၊ နာဲဆီဂကူ၊ ညးဒးဒုၚ်မံၚ် ထံၚ်အာယုက်ဇမၠိၚ် ကွးဘာ ၈၈ နာဲမေန်ဇေယျ၊ ဒစဵုဒစး ပေဲါရုဲမာဲ ၂၀၁၀ တုဲ ညးဒးဒုၚ်မံၚ်ထံၚ် ၁၅ သၞာံ တၠဂုဏ်ဥက္ကံသ ကော် ဂုဏ်ဇြဝ်လာတ် မဒှ်ကောန်ထံၚ် ပရေၚ်ဍုၚ်ကွာန်မန်တံ ကလေၚ်ဗၠးကၠုၚ်မာန်ရောၚ်ဂှ် စၟဳလဝ်အိုတ်ရ။
“ဂုဏ်ဇြဝ်လာတ်ဂှ် သွက်ဂွံဗၠး နွံပေၚ်ပေၚ်ဏောၚ်။ မုဟိုတ်ရောတှေ် ညးဂှ် ပရေၚ်တၞဟ်ဟ် ဟွံပါမွဲသာ် ဒစဵုဒစး ပေဲါရုဲမာဲ သက်သက်တုဲ ဒးကၠုၚ်ထံၚ်ဏောၚ် ဟီုတှေ် ညးဗၠးမာန်ဏောၚ် အဲပတှေ်လဝ်ပေၚ်ပေၚ်ရ” သာ်ဝွံ ကောန်ကောကောန်ဒေံညး မွဲတၠ ဟီုရ။
ၜိုန်ဂှ်လေဝ် နာဲယက္ခ ကေုာံ နာဲဆီဂကူတံဂှ် အလဵုအသဳပၞာန်ကၠာတေံ လီစၞာဲတုဲ ရပ်လဝ်ညးတံ သီလွဟ်ဂှ်ရ အလဵုအသဳတၟိဏံ သွက်ဂွံသၠးကဵုဒုဟ်ဒဏ်ဂှ် အခေါၚ်အောန်မံၚ်ရောၚ်ဂှ် ညးလျိုၚ် ဆက်ဆောံဍုၚ်သအာၚ် ဗော်ဍုၚ်မန်တၟိ နာဲဟံသာဗိုန်ခိုၚ် ဟီုရ။
“စၟဳဂှ် စၟဳမံၚ်ရ။ ဟွံဗလးကဵုကီုလေဝ် ဖအောန်ဖျေံဒုဟ်ဒဏ်ဏော် ထေၚ်ကေတ်ရ။ ဣဏံဂှ် စေတနာအလဵုအသဳတၟိဏံ ဍာံ ဟွံဍာံ မၚ်ကလၚ်ကေတ် မွဲလစုတ်တှေ် တီကၠးကၠုၚ်ဏောၚ်။ လဟီုသက်သက်ဟာ၊ ကၠောန်ကွေံကွေံဟာဂှ် ဒးမံၚ်ကျောဝ်မံၚ်ဏီ” သာ်ဝွံ နာဲဟံသာဗိုန်ခိုၚ် ဟီုရ။
နာဲယက္ခ၊ နာဲဆီဂကူတံဂှ် နကဵုအမှု ချပ်ဇန် ပုန်ပၠန်ကၟိန်ဍုၚ် အလဵုအသဳပၞာန်ဗၟာကၠာတေံ လီစၞာဲ ရပ်လဝ်ညးတံ ပ္ဍဲဂိတုဂျူလာၚ် ၁၇၊ သၞာံ ၂၀၀၃ တုဲ ပ္ဍဲဂိတုနဝ်ဝေမ်ဗာ ၂၈၊ သၞာံ ၂၀၀၃ ဂှ် ဒးဒုၚ်ဖျေံအမိၚ်ဂစိုတ်ကီုလေဝ် ဟိုတ်နူကလေၚ်ခၠေဝ်သှ်အမှုတုဲ ဖအောန်ဖျေံဒုဟ်ဒဏ် ထံၚ်မွဲအာယုက်ရ။
တၠဂုဏ်ဥက္ကံသဂှ် နကဵုအမှု ဓါတ်လလဳ အဳလက်ထရဝ်နေတ်၊ အမှု တက်တြးလိက် ဟွံလုပ်သၞောဝ်၊ အမှုပလာပ်ပထုဲ ကၟိန်ဍုၚ်တန်ကြန် ပ္ဍဲဂိတုသေပ်တေမ်ဗာ ၂၇၊ သၞာံ ၂၀၁၀ ဂှ် ဒးဒုၚ်ဖျေံဒုဟ်ဒဏ်ထံၚ် ၁၅ သၞာံရ။
အလဵုအသဳတၟိတိုန်တုဲ ပွမလလောၚ် အခေါၚ်သၠးဒုဟ်ဒဏ်လၟုဟ်ဂှ် ဒှ်အလန် ဒုတိယရ။ အတိုၚ်အခေါၚ်သၠးဒုဟ်ဒဏ် အလန်ပထမ ဂိတုမေ ၁၇၊ သၞာံ ၂၀၁၁ ဂှ်မ္ဂး ကောန်ထံၚ် (၁၄ ၆၀၀) တံ ဂွံအခေါၚ် ဗၠးဒုဟ်တုဲ ကောန်ထံၚ်ဒးအမိၚ်ဂစိုတ် (၃၄၈) တၠတံလေဝ် ဂွံအခေါၚ်ပြံၚ်လှာဲ ထံၚ်မွဲအာယုက်ရ။
ၜိုန်ဂှ်လေဝ် ပ္ဍဲဍုၚ်ဗၟာဂှ် ကောန်ထံၚ်သၟာပရေၚ်ဍုၚ်ကွာန် မၞုံ ၂၂၀၀ ပြၚ်ရောၚ် ဂကောံအခေါၚ်သၠးဒုဟ်ဒဏ် ဍုၚ်ဂမၠိုၚ် ဖျေံသဇိုၚ် ပ္ဍဲဍုၚ်လာန်ဒါန် ဓမံက်ထ္ၜးလဝ်ရ။
0 Comments