ခတ္တာနန် – ပ္ဍဲဂိတုနဝ်ဝေမ်ပါဏံမ္ဂး ပ္ဍဲဍုၚ်လ္ဂုၚ် ကၠောန်ဗဒှ်ပေဲါဗှ်လိက်ခၞံ သုတေသန “ဂကူပျူကေုာံ ဍုၚ်ပျူ” ရောၚ် မဒှ်တုဲ နူတနိတေံ ကောန်ဂကူမန်တံ ပလံၚ်ဗစိုပ်ဏာ လိက်ဒစဵုဒစးရ။

လိက်ဒစဵုဒစးဂှ်ဝွံ ပလံၚ်ဗစိုပ်လဝ် ကုသမတ ဥူတိၚ်သိၚ်၊ သကိုပ်ဝန်ဇၞော် တွဵုရးမန် ဥူအုၚ်မျေတ် ကေုာံ ဥက္ကဋ္ဌ ကမ္မတဳကၠောန်ဗဒှ် ပေဲါဗှ်လိက်ခၞံသုတေသန ဒံက်တာချေတ်ဇြာန်ဝေန်တံရောၚ် ဂွံတီကေတ်ရ။

“ဍုၚ်သုဝဏ္ဏဘုံ (သဓီု) မန်ပိုဲဂှ် ဂြဲပၠုပ်ဏာ အပ္ဍဲဍုၚ်ပျူတုဲ ချူဆာဲလဝ်ဂှ် ပိုဲဒစဵုဒစး။ ဝၚ်ဂကူမန် နွံမံၚ်ပြာပြာကဋ်ကဋ်ဂှ် ညံၚ်ဂွံအေဲဇြအာ အစဳအဇန်နွံနွံ ကၠောန်သ္ပမံၚ်ဏောၚ်။ ပေဲါဗှ်လိက်ခၞံဏံဂှ် မန်ပိုဲ ညိလေဝ် ဟွံသ္ပသမ္တီပုဟ်” သာ်ဝွံ နာဲတေန်အံၚ် မဒှ်ဒု-ဥက္ကဋ္ဌ ဗော်ဒဳမဝ်ကရေသဳမန် ဟီုရ။

ကျာ်ဇၞော်အာစာ ၁၁ ဇကု၊ ဗော်ဍုၚ်မန်တၟိ၊ ဗော်ဒဳမဵုကရေဇြဳ အလုံရးမန်၊ ဗော်ဒဳမဝ်ကရေသဳမန်၊ ဂကောံလိက်ပတ်ယေန်သၞာၚ် ဒေသနာနာ၊ ဂကောံညးဗြဴမန် မိစောဗု ကေုာံ တၠပညာလိက်ပတ်မန် သီုဖအိုတ် ၃၇ တၠ ပါလုပ်တုဲ နူတနိတေံ ဒက်ပ္တန်ကၠုၚ် ဂကောံသုတေသနဝၚ်မန် ပ္ဍဲဇြပ်သဘၚ်ဓဝ်မန် ဍုၚ်မတ်မလီုတုဲ ချူပလံၚ်ဗစိုပ်ဏာ လိက်ဒစဵုဒစးသာ်ဂှ်ရ။

ပ္ဍဲလိက်ဒစဵုဒစးဝွံ တၚ်နၚ် ပါ ရ တၚ်တုဲ စပ်လိက်ပရိုၚ်ဗၟာ မချူလဝ် နကဵုက္ဍိုပ်လိက် “ကၠောန်ဗဒှ် ပေဲါဗှ်လိက်ခၞံဝၚ် ကၟိန်ဍုၚ်ပျူတြေံ” ဂှ်မ္ဂး “သၠဲတိဍာ် ဂကူပျူ အပ္ဍဲကၟိန်ဍုၚ်ဗၟာဏံ မံၚ်တန်တဴကၠုၚ်ဂှ် မၞုံၜိုတ်သၠဲတိဍာ်ဍုၚ်ဗၟာလၟုဟ်တုဲ ပ္တန်ကၠုၚ်ဍုၚ် မပ္တံကဵု တကံၚ်၊ ဟာန်လေန်၊ ဗဳသၞု၊ သရေခေတ္တရာ၊ ဓညဝတဳ၊ သုဝဏ္ဏဘုံ (သဓီု) တုဲ သ္ပဒတဴမံၚ်စံၚ်ကၠုၚ်အိုတ်ရောၚ်” ပွမချူလဝ် သာ်ဝွံဂှ် သ္ပအဓိက ဒစဵုဒစးလဝ်ရောၚ် ဂွံတီကေတ်ရ။

“ဗီုလဵုဍေံတံ ဂြဲပၠုပ်ရောတှေ် ပျူလေဝ် ဗၟာ၊ ဗၟာလေဝ် ပျူ။ ဍုၚ်ယခေၚ် ဓညဝတဳ၊ ဍုၚ်သဓီု သုဝဏ္ဏဘုံတံဂှ် ဂကူပျူတံ ဖျေံသဇိုၚ်မံၚ်စံၚ်ကၠုၚ်ကၠာအိုတ်။ ဟိုတ်ဂှ်ရ ပ္ဍဲဒေသတံဂှ် ဗၟာတံ စိုပ်ကၠုၚ်ကၠာအိုတ် ဍေံတံ မိက်ဂွံဂွံအဓိပ္ပါယ်ဂှ်တုဲ ဖန်ဗဒှ်မံၚ်ဏောၚ်” သာ်ဝွံ နာဲမိုၚ်တဝ် မဒှ်သကိုပ်စၞောန်ပ္ညုၚ်(တြေံ) ဌာနထိၚ်ဒဝ်တၚ်သမ္တီကောန်ဂကူဂှ် ဟီုရ။

ပွမချူဟီု သာ်ဝွံတံဂှ် ဇီုကပိုက်ကဵု ပရေၚ်ညဳသၟဟ် ကောန်ဍုၚ်အရၚ်တုဲ ဗၠေၚ်မံၚ်ကဵု သဇိုၚ်သၞောဝ်ဒက်ပ္တန်ဍုၚ်ရောၚ်ဂှ်လေဝ် ညးဆက်ဟီုရ။

ပ္ဍဲကာလဒက်ပ္တန် ဂကောံသုတေသနဝၚ်မန် ပ္ဍဲဂိတုအံက်တဝ်ပါ ၂၉ ဏံဂှ်မ္ဂး ရုဲစှ်လဝ် နာဲမိုၚ်တဝ် နဒဒှ်ဥက္ကဋ္ဌတုဲ နဒဒှ် ညးအုပ်ကာဂှ် ရုဲစှ်လဝ် နာဲခေန်မိုၚ်လေဝ် (သကိုပ်တိုက်ထ္ၜးပျးတြေံ တွဵုရးမန်) တံအိုတ်ရ။

သအာၚ်နူဂှ်ပၠန် အမာတ်ကၠတ်ထဝ်မန် မစိုပ်ဍုၚ်နေဗျဳဒဝ်တံဂှ်လေဝ် ပရေၚ်ချူဆာဲလဝ် ပ္ဍဲလိက်ပရိုၚ်အလဵုအသဳဏံဂှ် သွက်ဂွံသၟာန်သၟုက်အာ ဌာနဝန်ဇၞော်ယေန်သၞာၚ်ဂှ် ပလေဝ်ပလေတ်မံၚ်အိုတ်ရောၚ်ဂှ် ဂွံတီကေတ်ရ။