ဌာန်ပရိုၚ်ဗၠးၜးမန် – စပ်ကဵုပရေၚ်ဖျာဇၞော်ဇြပ်ဗု တူအာပၟတ်တုဲ ပ္ဍဲတ္ၚဲသ္ၚိသဝ်ဏံဂှ် ရပ်ဏာ ဥူသဵုတိၚ် မဒှ်က္ဍိုပ်ဖျာ မဒးတာလျိုၚ်ဂီုကၠီုရောၚ် ဂွံတီကေတ် နူညးတာလျိုၚ် ဗဒိုပ်ဗၠာဲသၟိၚ် ဍုၚ်ဇြပ်ဗုရ။
ဗီု ဖျာဇၞော်ဇြပ်ဗု တူအာပၟတ်တုဲ
ဗဒိုပ်ဗၠာဲသၟိၚ်တံ အာတ်ကေတ်လဝ်ရမာန် (အမိၚ်ဆက်ရပ်ချုက်) နူနာဲဗစာ ဍုၚ်ဇြပ်ဗုတုဲ ဆက်ရပ်ထိၚ်လဝ် ဥူသဵုတိၚ်တုဲ ပၟၚ်ဖျာဗတမ်လ္ၚဵုတံဂှ် ဂြိပ်ဒဴပဲါဓလေတ်မံၚ်ရောၚ် ဂွံတီကေတ် နူကောန်ဍုၚ်ဇြပ်ဗုတံရ။
ဖျာဇၞော်ဇြပ်ဗုဝွံ နူအခိၚ်သ္ဂာဗတမ် ဂျာန္နဝါရဳ ၁၈ စဵုစိုပ် ၁၉ အခိၚ်နူဂယး တူလေၚ်ဒှ်အာဆောံတုဲ ၚုဟ်မးကောန်ဂကူမန်တံ တိုပ်ဒေပ်လဝ်ပ္ဍဲဖျာဂှ်လေဝ် ဆောံလေၚ်အာ ဂၠိုၚ်ကဵုပြကောဋိကိုဋ်ရ။
သွက်သ္ဂောံလုပ်ဂၠာဲ ကပေါတ်သှေ်သၟေဟ် အပ္ဍဲဖျာဇကုဂှ် နူတနေံဏံ ညးမဆေၚ်စပ်တံ ကဵုလဝ်အခေါၚ်ကဵု တၠဖျာတံရ။
“အဲသွံထောံ ဖျုန်တိဂအာၚ်ဖျာအဲဂှ် ဂွံ ၃ ဠက်ဒကေဝ်၊ ဆေၚ်ဖျာသွံကပေါတ်ဓါတ်လလဳဂျပါန်ဂှ် ညးတံသွံ ဖျုန်တိဂအာၚ်ဖျာညးတံ ဂွံ ၁၅ ကိုဋ် ဂွံမိၚ်ကေတ်။ ပ္ဍဲညးတံဂှ် ကပေါတ်ဗရိုတ်၊ သကောဝ်တံ ဂၠိုၚ်မံၚ်” သာ်ဝွံ တၠဆေၚ်ဖျာမွဲတၠ ဟီုရ။
ဂွံအခေါၚ်ဂၠာဲကပှ်ကပေါတ်သၟေဟ်တုဲ လုပ်ကပှ်ကပေါတ်ဂှ်မ္ဂး အလုံဖျာမွဲ ပြေၚ်ရေၚ်ဖျေံလဝ် ကဠောံကာဗာ်ဂှ် ဂွံဆဵုကေတ်တုဲ ကပေါတ်မစံၚ်ဗဂဵုပၟတ် မထေက်ကဵုဒှ်သံသယတံဂှ်လေဝ် ဂွံဆဵုကေတ်ကီုရောၚ် တၠဆေၚ်ဖျာတံ ဟီုအိုတ်ရ။
ပ္ဍဲတ္ၚဲသ္ၚိသဝ် အခိၚ်လဒေါဝ်တ္ၚဲဂှ် သကိုပ်ဝန်ဇၞော် တွဵုရးမန် ဥူအုၚ်မျေတ် ကၠုၚ်ကျောဝ်ဒၞာဲဂအာၚ်ပၟတ်တူလဝ်ဂှ်တုဲ ဒက်ပ္တန်လဝ်ကဵု ကမ္မတဳဖျာမွဲ သွက်သ္ဂောံကလေၚ်သိုၚ်ခၞံ ဖျာတၟိယာယဳ ရ။
ဖျာဇၞော်ဇြပ်ဗုဝွံ စပတမ်နူသၞာံ ၁၉၈၄ တေံဂှ် စသိုၚ်ခၞံလဝ်တုဲ ဆောံလေၚ်အာ ဆေၚ်ကပေါတ်ဓါတ်လလဳ ၂၇၊ ဆေၚ်ထဝ် ၉၅ ဆေၚ်၊ ဆေၚ်ကပေါတ်နာနာ ၄၁ ဆေၚ်၊ ဆေၚ်ဂၠိက်ယာတ် ၂၁၅ ဆေၚ် ကေုာံ ဆေၚ်ကပေါတ်နာနာ သီုဖအိုတ် ဗဒဲါ ၆၀၀ ဆေၚ်ရ။
ဟိုတ်နူပၟတ်ယှတ်တုဲ တူအာရောၚ် ၜိုန်ရညးအုပ်ဓုပ်တံ ဟီုဂးမံၚ်ကီုလေဝ် ရုၚ်ဓါတ်လလဳ ပွိုၚ်ဍုၚ်ဇြပ်ဗုဂှ် ဟွံဒုၚ်တဲ ကယျာန်တးပဲါလဝ်ရောၚ် ဂွံတီကေတ်ရ။
0 Comments