သၟဟ်သၟန် – ဟိုတ်နူကဵုအသိၚ်အလိုန်ပဋိပက္ခမိတ္ထဳလာတုဲ ပြံၚ်ပဆုဲထောံ အခိၚ်သွဟ်လိက်ဂှ်ရ စရၚ်အံၚ်ခၟဳသၚ် တွဵုရးဍုၚ်မန်ဂှ် သၞာံဏအ် အံၚ်ဇၞးအာ (၁၃.၀၃) တၟအ်ကၠံဓဝ်တုဲ သဝ်စှေ်အာ နူကဵုအရိုဟ်သၞာံ တၟာဂလိုၚ်ရောၚ် ဂွံလ္ၚတ်ကေတ်ရ။

နူကဵုဋ္ဌာနဝန်ဇၞော်ပရေၚ်သာသနာ လလောၚ်တြးပ္တိတ်ဏာစရၚ်အံၚ် ကလေၚ်ပထမ အလဵုအသဳ တန်ဇၞော်၊ တန်ဒေါဝ် ကေုာံ တန်ဍောတ်တံ ပ္ဍဲစၟတ်တ္ၚဲ (၈ – ရ -၂၀၁၃) ဂိတုဒ္ဂိုန် (၁) မံက်ဂှ်တုဲ အတိုၚ်အလုံမွဲကၟိန်ဍုၚ်ဗၟာဝွံ တန်ဇၞော် (၉၇၂) ဇကု၊ တန်ဒေါဝ် (၂၀၃၉) ဇကု ကေုာံ တန်ဍောတ် (၃၂၀၁) ဇကု အံၚ်ဇၞးအာ ဗၞတ် (၁၂.၄၇) က္ဍိုပ်ကၠံနွံရ။

အပ္ဍဲကဵုတွဵုရးဍုၚ်မန်ဂှ် တန်ဇၞော် (၄၁) ဇကု (၄.၂) က္ဍိုပ်ကၠံ၊ တန်ဒေါဝ် (၁၆၂) ဇကု (၁၈.၂၄) က္ဍိုပ်ကၠံ ကေုာံ တန်ဍောတ် (၂၂၅) ဇကု (၁၅.၈၆) က္ဍိုပ်ကၠံ ဂွံအံၚ်ဇၞးကေတ်တုဲ တၟော်ကဵုသက္ကရာဇ် (၁၃၇၄) သၞာံတုဲကၠုၚ်တေံမ္ဂး သၚ်တွဵုရးမန် အံၚ်ဇၞးကၠုၚ်လဝ် (၃၅.၇၂) တၟအ်ကၠံ နွံကၠုၚ်လဝ်ရ။

“ အခိၚ်သွဟ်ဂှ် ဟွံဂွံသွဟ်တှေ် သၚ်တအ်ဂှ် လ္ၚဵုဂှ် ဒးဗလးဖျဴဏာ ထိၚ်လဝ်ဟွံမာန်ရပုဟ်။ ဍေံပဆုဲထောံ မွဲဂိတုပြၚ်ၚ်တုဲ စၞးဒးသွဟ် ပ္ဍဲသက္ကရာဇ် (၁၃၇၄) သၞာံဂှ် အတးလောန်တုဲ (၁၃၇၅) မှ ဂွံသွဟ်ရ။ အခိၚ်ဍေံလလောၚ်တြး ဂွံသွဟ်ဂှ်တှေ် အခိၚ်အိုတ်အာရ။ ခၟဳသၚ်ကၠုၚ်သွဟ်ဂှ်လေဝ် ၜိုတ်ကၠုၚ်သွဟ်ဓဝ်ရ။ လိက်လေဝ် ဟွံဂွံကၠောန်လဝ် ဟဂှ်ရ” သာ်ဝွံ ကျာ်ဇၞော်အ္စာ ဘဒ္ဒန္တ သဳလာစာရ ဒု-ဥက္ကဋ္ဌ ဂကောံ ရာမညဓမ္မာစရိယ ဟီုမြော်ကဵု ဌာန်ပရိုၚ်သၞံၚ်တိုၚ်ရ။

အတိုၚ်ကျာ်ဇၞော် ဘာနန္ဒဝိုန် ဍုၚ်ဇြပ်ဗု ဘဒ္ဒန္တ ခေမာနန္ဒ ဟီုမြော်မ္ဂး “ ဟိုတ်နူကဵု ဘာသာဇာတ်ရ၊ ဘာသာဇာတ်ဂှ်တှေ် ဗွဲမဂၠိုၚ်ဂှ် ဖျေံလဝ် ဗှ်လဝ် ၜိုတ်ဓမ္မတာရ။ ရဲကျအာ သၞာံဏအ်ဂှ်တှေ် စှေ်အာ ဘာသာဇာတ်ဗွဲမဂၠိုၚ်။ ရဲတန်ဇၞော်မွဲတန်ဂှ်တှေ် ဂကောံတၞဟ်ဟ်ဗွဲမဂၠိုၚ်ကီု ဂကောံရာမည ဓမ္မာစရိယကီု ဘာသာဇာတ်ဂှ် ဟွံပါ ဟွံဒးသွဟ်ပုဟ်။ တန်ဇၞော်မွဲတန်ဂှ်တှေ် ဍေံရပ်ဘာသာဇာတ်မွဲ တုဲအာအိုတ်တးရ” သာ်ဝွံ ညးဟီုလၟိၚ်ဏာရ။

နူကဵုလက်ထက်အၚ်္ဂလိက်တေံ သၚ်တအ် သွဟ်ကၠုၚ်မံၚ် နကဵုပုစ္ဆာဗဟဵု ကၟိန်ဍုၚ်ကီုလေဝ် စပ္တံနူကဵုသက္ကရာဇ် (၁၃၅၉) သၞာံဂှ် ပါ်ပရအ် ပ္တိတ်ပုစ္ဆာ ရးဒေသဇၞော် ကေုာံ တွဵုရးညးကဵုညးတုဲ ပ္ဍဲသၞာံ (၁၃၇၄) ဏအ်ရဟေၚ် ကလေၚ်စပ္တံ ပ္တိတ်ပုစ္ဆာ ဗဟဵုကၟိန်ဍုၚ်ပၠန်ရောၚ်ဂှ်လေဝ် ဂွံတီကေတ်ရ။