ညးတိုန်စိုပ်အသေအဟာန်(GS)
တုဲကၠုၚ်ဂိတုဂျာန္နဝါရဳ (၁၈)၊ သၞာံ (၂၀၁၃) ဂှ် ကၠောန်ဗဒှ် ပေဲါသောၚ်ကလး စပ်ကဵုသၞောဝ် (၂၀၀၈) ပ္ဍဲဍုၚ်ဘာအၚ် ဒၞာဲဖလာတ် (အောၚ်သံလွၚ်) ဂှ် ဒဝ်သု ဟီုဂးဏာ သာ်ဝွံရ။
“သၟတ်တံဂှ် သွက်ဂွံဒှ်က္ဍိုပ်သ္ကိုပ်တုဲ ကၠောန်မံၚ်ပရေၚ်ဍုၚ်ကွာန်ဟာ။ မိက်ဂွံယိုက်ဂၠေၚ်ဝန် ကၟိန်ဍုၚ်တုဲ ကၠောန်ပရေၚ်ဍုၚ်ကွာန်ဟာ။ မိက်ဂွံသၟာန်ဏာ ဗွဲကိုပ်ကၠာရ” သာ်ဝွံ ညးပတိတ်ဏာပုစ္ဆာ ကုသၟတ်တံရ။ အတိုၚ်လညာတ်ပရေၚ်ဍုၚ်ကွာန်ညးမ္ဂး ကမၠောန်ဒှ်ဟွံမာန်ဂှ် ဟွံမွဲရ။
လိက်စံၚ်မစၟတ်သမ္တီလဝ် သၞောဝ် (၂၀၀၈) ဂှ်လေဝ် ယဝ်ရညးဍုၚ်ကွာန်တံ ဆန္ဒနွံမ္ဂး ပလေဝ်ချူမာန်မံၚ်ရောၚ် ဒဝ်သု ဆက်ဟီုရ။
“ပ္ဍဲစရာဲသမ္မတ ကေုာံ ဒု – သမ္မတတအ် မပိုၚ်ခြာလဝ် အာယုက် (၄၅) သၞာံဂှ် ညံၚ်ရဴကၟာတ်လဝ်ဍာန်အနာဂတ် သွက်သၟတ်တံကီုရောၚ်” ဂှ်လေဝ် အ္စာကၞေဟ် (မိုးစက်အိမ်) နူကဵုပွိုၚ်ဍုၚ်လှာဒကှ် ဟီုပ္တိတ်လညာတ်ရ။
သၟတ်တံဂှ် ဒးဒုၚ်အုပ်ဓလီုလဝ် သၟဝ်ဓယံက်ပရေၚ်ဍုၚ်ကွာန် တၟာဂလိုၚ်ရ။ ဗော်ပရေၚ်ဍုၚ်ကွာန်တံလေဝ် ကာလပၟိက်နွံမ္ဂး စကာမံၚ်သၟတ်တံ နကဵုဗျူဟာဇၞော်ဇၞော်ရ။ ၜိုန်ဂှ်လေဝ် သွက်ဂွံဖန်ဇန်ကဵုဒၞာဲ ကုသၟတ်တံဂှ် ဝိုတ်မံၚ်သတိရောၚ် ဂးရ။
“ပေဲါရုဲမာဲ (၂၀၁၅) ဂှ် ရန်တၟအ်ကဵုဖျုန် ကုသၟတ်တၞောဝ်တၟိတံရ၊ မွဲအခေတ်ကဵု မွဲအခေတ်၊ မွဲအဆက်ကဵု မွဲအဆက် လညာတ်ပရေၚ်ဍုၚ်ကွာန် (မူဝါဒဗော်) သှ်ၜေက်ပ္ဍဲဇကုမှ ဂွံဆက်တရဴ ဒဵုစိုပ်တိုၚ်ပ္ကဴမာန်ဏောၚ်” သာ်ဝွံ ညးမကေၚ်ဒးလဝ်ထံၚ် သၟာပရေၚ်ဍုၚ်ကွာန်မန် တၠဂုဏ်ဃောသက ဟီုလၟိၚ်ကဵုကသပ်ရ။
ဝၚ်အတိက်ဒးဒုၚ်ဍဵုဍိုက် ကၟာတ်လဒဵုလဝ်တံဂှ် ၜိုတ်သၠးအခေါၚ်မာန် သၠးအခေါၚ်ကေုာံရေၚ်သ္ကအ်ညိ။ ပ္ဍဲဂၠံၚ်တရဴအနာဂတ်ဂှ် ညံၚ်ဂွံတိတ်ဗၠးနူသၞိၚ်အတိက် ဒးဂံါကွာ်အာ ဗွဲမညဳသၟဟ်ထေက်ရောၚ် ဒဝ်သု ဆက်ဟီုလဝ် ပ္ဍဲတ္ၚဲဂှ်နွံရ။
