Categories
ပရိုၚ်

အပ္ဍဲကဵုတွဵုရးမန် ရုၚ်စက်တိအၚ်္ဂဒဵု ဒးနွံထေက်ရောၚ် ဝန်ဇၞော်တွဵုရးဟီု

ဒဵုသွက်ဂွံပတိတ်တိအၚ်္ဂဒဵု(internet)
ဒဵုသွက်ဂွံပတိတ်တိအၚ်္ဂဒဵု(internet)
မာံပိုန် – ဆေၚ်ကဵုလၟေၚ်ကမၠောန် သ္ဂောံဓမံက်အာရုပ်ရဴ ကိုန်စဳဇန် ရုၚ်စက်တိအၚ်္ဂဒဵု (ဘိလပ်မြေစက်ရုံ) မာန်တုဲ ပ္ဍဲစၟတ်တ္ၚဲ ၁၅-၁-၂၀၁၄ ဂှ် နူကဵုဂကောံဝန်ဇၞော် အလဵုအသဳတွဵုရးမန်တအ် ကော်ဆဵုဂဗ ကုညးတၠတိ နူကဵုကွာန်ၚာၚ်၊ ကံပၞဟ် မၞုံဒေသပွိုၚ်ဍုၚ်ကျာ်မြဟ်တအ်ရောၚ် ဂွံတီကေတ်ရ။

“လ္ပာ်ကမ္ပဏဳကၠောန်ရုၚ်စက်တိဗဳလာတ် PACIFIC LINK တအ် တိသွက်ဍေံတအ် ဂွံဒးရာန် နွံမံၚ်မၞိဟ် အကွက် ၁၁ တၠဏီဂှ်ရ ညးတအ် ကော်ဆဵုဂဗလဝ်၊ ရံၚ်ကဵုဂုဏ်ဖဵုတွဵုရး ဍုၚ်ကွာန်တုဲတှေ် အတိုၚ်မပညဳလဝ်ၚုဟ် ညံၚ်ဂွံသွံကဵု ကမ္ပဏဳမာန်ဂှ် နူကဵုဂကောံအလဵုအသဳတွဵုရးတံမွဲက္ဆံၚ် ကၠုၚ်စိုပ်အာတ်မိက်ဒုၚ်ဂုဏ် လ္တူရဲတၠတိတအ်ဂှ်ရောၚ်” သာ်ဝွံ ညးမဂွံတိုန်စိုပ်လဝ် ပ္ဍဲပေဲါဆဵုဂဗဂှ် မွဲတၠ ဟီုကဵုသၞံၚ်တိုၚ်ရ။

ပေဲါဆဵုဂဗဂှ်ဝွံ ကၠောန်သ္ပဏာ အပ္ဍဲၝောံခန်ၜိုပ်ထဝ် ဍုၚ်ကျာ်မြဟ် တွဵုရးဍုၚ်မန်တုဲ ဝန်ဇၞော်ပရေၚ်ဂီုကၠီု ကေုာံ ပယျဵု တွဵုရးမန် သ္ကိုပ်ဗိုလ်ဇၞော် ဋ္ဌေမျေအ်အံၚ်၊ ဝန်ဇၞော်ဓါတ်ပၟတ်လလဳ နာဲလွဳအံၚ် ကေုာံ ဋ္ဌာနအလဵုအသဳဆေၚ်စပ် ပွိုၚ် ဍုၚ်ကျာ်မြဟ်တအ် တိုန်စိုပ်ကီုရ။

“ရုၚ်စက်ကၠောန်ပ္တိတ်တိဗဳလာတ် ဒှ်ကၠုၚ်မ္ဂး ညးဍုၚ်ကွာန်တအ် ဂွံသုၚ်စောဲတိဗဳလာတ် ကပေါတ်ခိုဟ်ဟ် သီုကဵု ၚုဟ်ဒးဒးရောၚ်၊ ရံၚ်ကဵုဂုဏ်ဖဵုတံဏံတုဲ အပ္ဍဲတွဵုရးမန်ဂှ် ရုၚ်စက်တိဗဳလာတ်ဏအ် ဒးနွံထေက်ရောၚ်” သာ်ဝွံ ဝန် ဇၞော်ပၟတ်လလဳ နာဲလွဳအံၚ် ဟီုကဵုညးဒေသတၠတိဗ္ၚတအ် ပ္ဍဲတ္ၚဲဂှ်ရ။

လ္ပာ်ညးမဒှ်တၠတိဗ္ၚတအ်ပၠန်လေဝ် ၜိုတ်ထေက်တန်ကဵု ၚုဟ်မးတိဇကုဂှ် ပညဳကဵုကမ္ပဏဳတအ် ညံၚ်ဂွံပြေပြံၚ်တုဲ အာတ်မိက်ပ္တန်အာၚုဟ်ညိဂှ်လေဝ် ညးဆက်ဟီုရ။

သွက်ဂွံဗၟံက်ရုပ်ရဴကမၠောန်ကိုန်စဳဇန် ရုၚ်စက်တိအၚ်္ဂဒဵုဂှ် တိဗ္ၚဂူယာ ညးဍုၚ်ကွာန်ဒေသ ပွိုၚ်ဍုၚ်ကျာ်မြဟ်တအ် လၟိဟ်ဂၠိုၚ်ကဵုဨက ဒးဒုၚ်ဘပဠ ဒးသွံရာန်ဏာလဝ် နနဲအဓမ္မနွံသၟးဟွံက ညးဍုၚ်ကွာန်ဒေသ တၠတိလ္ၚဵုတအ် သီုဟွံက္လိဂွံၚုဟ်လေဲ တိဇကုမွဲသာ် ဒးဒုၚ်ဆောံလေၚ်လဝ်လေဝ် နွံကၠုၚ်ရောၚ် လဂွံကဵုတၚ်နၚ် ဂကောံချဳဒရာၚ် စပ်ကဵုပရေၚ်သီတိ ဒေသပွိုၚ်ဍုၚ်ကျာ်မြဟ်တအ် ပကောံလဝ်ဂှ်ရ။

“ညးကၠောန်တဴကမၠောန် ညံၚ်ကိုန်စဳဇန် ရုၚ်စက်တိဗဳလာတ် သ္ဂောံလီုလာ်တအ်မ္ဂး ပ္ဍဲကဵုသၞောဝ်ဥပဒေ ဟွံသၠးလဝ် အခေါၚ်ရ၊ ကာလကၠောန်သ္ပသွံရာန် ပရေၚ်တိဗ္ၚ သွက်ကိုန်စဳဇန် ရုၚ်စက်တိဗဳလာတ်မ္ဂး ရံၚ်သွက်ဂုဏ်ဖဵု လ္ပာ်တၠတိ တအ် ဂၠိုၚ်ၚ်ညိ” ဂှ်လေဝ် ဝန်ဇၞော်ပရေၚ်ဂီုကၠီုတွဵုရးမန် သ္ကိုပ်ဗိုလ်ဇၞော် ဋ္ဌေမျေအ်အံၚ် ဟီုဂးလဝ် ပ္ဍဲပေဲါဆဵုဂဗဂှ် နွံ ကီုရ။

ရုၚ်စက်တိအၚ်္ဂဒဵု စဳဇန်သွက်ဂွံသိုၚ်ခၞံအာ အပ္ဍဲကဵုပွိုၚ်ဍုၚ်ကျာ်မြဟ် ပွဳပွူဒဵုတၟံသာဲ (ဒဵုကွာန်ၚာၚ်) ဂှ်ဝွံ နူ Siam Cement Group (SCG) ဍုၚ်သေံ ကေတ်တာလျိုၚ် ဖၟိုတ်သြန် နကဵုဒဝ်ဠာအမေရိကာန် (၄၀၀) ပြကောဋိကိုဋ်တုဲ ၜိုတ်အခိၚ်လ္ဒောဝ်သၞာံ ၂၀၁၆ တေံမ္ဂး စဗဂေတ်တဴရုၚ်စက်ဂှ်မာန်ဏောၚ် SCG တအ် ဗျာံရန်လဝ်ရ။

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.