နာဲမာန် – ဇၟာပ်ဇာတ်မန်၊ ဇၟာပ်ဂဳတမန်တံဂှ် ပ္ဍဲသၞာံဏံ လၟိဟ်ဗ္တံဂွံတိတ်ဂှ် အောန်ကွေံကွေံတုဲ အခိၚ်ဇူသၟးနွံဂၠိုၚ်ရောၚ် ရဲဇာတ်၊ ရဲဂဳတတံ ဟီုထ္ၜးရ။
အတိုၚ်ညးက္ဍိုက်ပ်ဂကောံဂဳတမန် ဒါရိုက်တာ နာဲဇာတိနာဲ ဟီုမ္ဂး “ ဇၟာပ်ဇာတ်ကီု ဂဳတမန်ကီု ဂွံတိတ် အောန်မံၚ်ဖအိုတ်ရ၊ ဂွံတိတ်ဗ္တံအောန်ဂှ် ဟိုတ်နူအစောန်စရာဲ သၟာသုခုမမန်ဇကု သဝ်အာကီုရောၚ်” သာ်ဝွံ နာဲဇာတိနာဲ ဟီုရ။
ဇာတ်မန်၊ ဂဳတမန်ဝွံ ကာလအခိၚ်ဇာတ်မန်ဒယှ် မန်ချေဝ်သိုဝ် နွံဒၟံၚ်ဂှ် ဂကောံဇာတ်မန်ဂမၠိုၚ် ဗီုညးကဵုညး ဒယှ်ပြာကတ်ဒၟံၚ်တုဲ စနူအခိၚ်လိုက်ဝှ်တုဲ ဗ္တံဂွံဇူ နွံအောန်ကွေံကွေံရောၚ်ဂှ် အခိၚ်ညးက္တဵုဟရိုၚ် နာဲပံက် ချောန် နွံဒၟံၚ်ဂှ် ညးကေၚ်လဴလဝ်ကီုရ။
အခိၚ်လၟုဟ်ဂှ် ဇာတ်မန်၊ ဂဳတမန် ဂွံတိတ်ဗ္တံအောန်ဒဵုဂလိုၚ်လဵုတှေ် ပ္ဍဲတ္ၚဲကောန်ဂကူမန်မှဂှ် အရိုဟ်ဟ်သၞာံ တှေ် ကွာန်မန်လ္ၚဵု၊ ဒေသမန်လ္ၚဵု သဘၚ်တ္ၚဲကောန်ဂကူမန် ကေတ်ဇာတ်မန်ဟွံဂွိုအ် ဒးကေတ်ဇာတ်ဗၟာ၊ ပ္ဍဲတ္ၚဲကောန်ဂကူမန်ဂှ်လေဝ် ကေၚ်နွံကၠုၚ်၊ တ္ၚဲဏံ ဗီုဂှ်ဟွံသေၚ်ရ ပ္ဍဲသဘၚ်တ္ၚဲကောန်ဂကူမန်ဂှ် ဇာတ်မန် သှေ်အာ ဒၞာဲလှေ်ဟွံမွဲလေဝ် နွံမံၚ်ရောၚ်ဂှ် ညးက္တဵုဟရိုၚ် ဇာတ်ရတ်ပေၚ် နာဲသဝ်ရဳ ဟီုလဴထ္ၜးရ။
“လၟုဟ်မှ ဇာတ်ပိုဲ ဂွံလှေ်လဝ် (၂၁) ဗ္တံညိကွေံ၊ ဆဂး ဂွံလဝ်စရၚ်ဖအိုတ်ဂှ် ၜိုတ်လၟုဟ်တှေ် (၆၀) ဗ္တံပြၚ်ညိ၊ သၞာံတုဲကၠုၚ်တေံတှေ် ပ္ဍဲစရၚ်ပိုဲ ဂွံလှေ် (၉၅) ဗ္တံ၊ တော်ကဵုသၞာံအာဏံတှေ် ဗ္တံယအ်အာ တၟာဂလိုၚ်နွံရောၚ်” သာ်ဝွံ နာဲသဝ်ရဳ ဆက်လဴရ။
ဇာတ်မန် သီုဖအိုတ်ဂှ် နွံ (၉) ဇာတ်ရ။ အပ္ဍဲဂှ် ဇာတ်ရတ်ပေၚ်၊ ဇာတ်ဆာန်ညဳဆာန်၊ သၟိၚ်ဟံသာ၊ လျးတိုၚ်ပ္ကဴ၊ မၞိက်သြန်၊ သဘာဝ၊ သိုက်အံၚ်၊ ဟံသာထဝ် ကဵု ဇာတ်အမ်သဝ်တုဲ ဂဳတမန်ဂှ် ဂကောံဂဳတမန် ကဵု ဂကောံဇြဟတ်ဂဳတတံဂှ် မံက်ပြာကတ်ဒၟံၚ်ရ။
ဇာတ်မန်ဝွံ ၚုဟ်မးဒးလိၚ်မွဲဗ္တံဂှ် မၞုံအကြာ (၁၃-၁၅) ကိုဋ်တုဲ ယဝ်လိၚ်ၜါဗ္တံမ္ဂး အကြာ (၂၂) ကိုဋ် ဒးလိၚ်ရ၊ “ ဇာတ်မန်၊ ဂဳတမန် ဂွံတိတ်ဗ္တံအောန် သၞာံဏံဂှ် သဘၚ်ဇၞော်လေဝ် အောန်မံၚ်မွဲတၚ်ကီု၊ တုဲတှေ် ဇာတ်ဗၟာတံလေဝ် စပ္တံနူ ကယျိုၚ်ကယျဝ် ကပေါတ်ကညောတ်တံကီု ဍေံတံ ဂစာန်ဗက်ကၠုၚ် ဗီုပေဲါမန်ပိုဲကီုနွံ၊ အဵုဂှ်ရ သဘၚ်လ္ၚဵုဂှ်တှေ် ညးတံတော်ကေတ် လိၚ်ပေဲါဗၟာဂှ် ၚုဟ်မးသက်သာ နူပေဲါမန်တၟာဂလိုၚ်တှေ် ညးတံလိၚ်ပေဲါဗၟာ၊ ဗီုဏံလေဝ်နွံ” သာ်ဝွံ နာဲသဝ်ရဳ ထံက်ထ္ၜးရ။
ဇာတ်မန်၊ ဂဳတမန်ပိုဲဂှ် အာဒၟံၚ်ၜိုတ်ဓမ္မတာဓဝ်ရရောၚ်၊ ပရေၚ်ပြံၚ်လှာဲ မုလေဝ် ဟွံပြံၚ်ပုဟ်၊ ဥပမာဍေံတှေ် အစောန်စရာဲပ္ဍဲကဵုသၟာအနုသုခုမမန်တံ မပ္တံကဵုကွတ်တိၚ်တက်ကီု ကွတ်ဒယှေ်ကီု ကဆံၚ်သဝ်မံၚ်၊ ဗီုကဵုရဲဒယှေ်ဒွက် ရဲပ္တိတ်ကဝး ဟီုတှေ် ဒယှေ်ပ္တိတ်ကဝးတုဲတှေ် တုဲရ၊ ရန်တၟံဇကုမိက်ဂွံပ္တိတ်ကဝးဂှ်တုဲတှေ် ဂတဂှ် မုလေဝ်ဆက်ဂစာန်အာ ဟွံမွဲပုဟ်၊ ရဲဇာတ်လေဝ် အဲညာတ်ဗီုဂှ်ရ ပညာအနုသုခုမဍာံဍာံ မုလေဝ် ဟွံမွဲပုဟ်၊ သၞာံဏံလေဝ် ဗီုဂှ်ရ၊ ယးသၞာံလေဝ် ဗီုဂှ်ရ၊ မုလေဝ်ပရေၚ်ပြံၚ်လှာဲ ဟွံမွဲတုဲတှေ် ပ္ဍဲကဵုဇာတ်ဂကူညးတၞဟ်၊ ဂဳတဂကူညးတၞဟ်ဂှ် ဍေံတံကၠောန်ကၠုၚ် ပရေၚ်ပြံၚ်လှာဲမာန်ကၠုၚ်၊ အဲမိက်ဂွံဟီုဂှ် ကွတ်ပညာ၊ ဍာ်ဒကေဝ် ပ္ဍဲကဵုစရာဲသုခုမမန်ပိုဲ ညံၚ်ဂွံပေၚ်ကဵုဍာ်ဒကေဝ်ဂှ် ဆက်တုဲ ဒးဂစာန်ထေက်ရောၚ် နဒဒှ်ဗီုဏံ နာဲဇာတိနာဲ ထံက်ထ္ၜးရ။
