သၟဟ်သၟန် – နူကဵုဂကောံသုတေသနကၟိန်ဍုၚ်တံ ၜံက်ခဲါမံၚ် ဒေသပွဳပွူ ပွိုၚ်ဍုၚ်ၜဳကလေၚ် ကွာန်ဝၚ်ကကဵု ကွာန် (အရက်သည်မရွာ) ဂှ်ဝွံ ပ္ဍဲကဵုဂိတုဖေဖဝ်ဝါရဳမံက်ဏအ် ဗီုပြၚ်ကၟာၚ်ဍုၚ်ကဵု ဒၞာဲဒပ်ကၚ် ဍုၚ်သုဝဏ္ဏဘုမ္မိတြေံတံဂှ် ဂွံဆဵုကေတ် ဗွဲမပြာကတ်ရောၚ် ဂွံတီကေတ်နူကဵုဂကောံသုသေသနဂှ်ရ။
“ကၟာၚ်ဍုၚ်သုဝဏ္ဏဘုမ္မိဂှ် သၟဝ်ဇိုၚ်ဒဵုကေလာသဂှ် နွံၜါဒၞာဲရ။ ဒၞာဲကွာန်ဝၚ်ကဂှ်မွဲ၊ ဒၞာဲကွာန်ဒေသ (အရက်သည်မရွာ) ဂှ်မွဲဒၞာဲရ။ ပ္ဍဲကဵုကွာန်ဝၚ်ကဂှ် ပွဳပွူဗဳသဳ (၃) ဗွဝ်ကၠံသၞာံတေံ သောဏထေရ်၊ ဥတ္တရထေရ်ကၠုၚ်လဝ် ဍုၚ်သုဝဏ္ဏဘုမ္မိဏောၚ် သွက်ဒးစၟတ်ဂၠိုၚ်ဏောၚ်။ ဒၞာဲဂှ်ဇၞော်သၠဲမံၚ် ကၟာၚ်ဍုၚ်လေဝ် ဇၞော်မံၚ်ရ” သာ်ဝွံ အ္စာသုတေသနဝၚ် နာဲသာန်ဝေန် ဟီုရ။
ကၟာၚ်ဍုၚ်သုဝဏ္ဏဘုမ္မိဂှ် နူသၠုၚ်ကျာ စိုပ်ဒိုဟ်သၟဝ်ကျာ ဇမၠိၚ် (၂) တိုၚ်၊ သမၠုၚ်ၜိုတ် (၂၀) ပေ၊ ဒၞာဲလ္ၚဵုဇမၞော် (သတီု) (၅၀) ပေပြၚ် ဂွံညာတ်ကေတ်မံၚ် ပ္ဍဲကဵုတိ စဵုလၟုဟ်ဏီ ဂးရ။
“လၟုဟ်နူကဵုဌာနသုတေသနအာဲကၟာဲတြေံ ကၠုၚ်ခဲါမံၚ်ရ။ ၜံက်ခဲါလဝ် (အရက်သည်မရွာ) (၂) ကုန်၊ ပ္ဍဲကဵုကွာန်ဝၚ်ကဂှ် (၆) ကုန်ရ။ သွက်ဂၠးတိတေံ ဂွံစၟတ်သမ္တီဍုၚ်တြေံဂှ် ဒးခဲါဒၞာဲ (၅၀) ပြၚ်ဏောၚ်” သာ်ဝွံ နာဲသာန်ဝေန် ဟီုရ။
ကၟာၚ်ဍုၚ်၊ ဒၞာဲဘုတ်ဘာသာသနိက စပ်ကဵုပရေၚ်ရှေ်သှေ်၊ ဒၞာဲမၞိဟ်တံ မံၚ်ကၠုၚ်လဝ်တံဂှ် ဒးၜံက်ခဲါ ဗွဲမချိုတ်ပၠိုတ်တုဲ ဒးၜတ်ကၞာတ် နကဵုပၞောန်သုတေသနဂၠးတိမာန်မ္ဂး ညးဂၠးကဝ်တံ ဒုၚ်တဲရောၚ် ညးဆက်ဟီုရ။
ဒၞာဲၜံက်ခဲါဆဵုညာတ်လဝ် အာဲကၟာဲတြေံတံဂှ် ညံၚ်ဟွံဂွံကၠေံဗ္ဒန်အာပၠန်ဂှ် နူကဵုညးတာလျိုၚ်ယေန်သၞာၚ်တွဵုရးမန် ဝန်ဇၞော်ဒံက်တာမေန်နဲသဵုတံ သွက်ဂွံကၟဳဖ္ဍာန်ကဵုနွံတုဲ နူကဵုကၟိန်ဍုၚ် ညံၚ်ဂွံစၟတ်သမ္တီကဵု တိဍာ်အာဲကၟာဲယေန်သၞာၚ်တြေံဂှ် ဂိုတ်ဂစာန်မံၚ်ရောၚ် ဂွံတီကေတ် နူကဵုသုတေသနဂှ်ရ။
ဍုၚ်သုဝဏ္ဏဘုမ္မိဂှ် ပ္ဍဲကဵုတ္ကအ်သုမတြာလေဝ်ကီု၊ အာယှဒိုဟ်အဂၞဲသီုဖအိုတ်လေဝ်ကီု၊ ပ္ဍဲနခေါန်ပထုမ် ဍုၚ်သေံလေဝ်ကီု မိက်ဂွံစၟတ်နွံတုဲ ပ္ဍဲဒၞာဲဍုၚ်သုဝဏ္ဏဘုမ္မိတြေံတအ်ဂှ် မသက္ကုသၟေဟ် လီုလာ်အာအိုတ်တးရောၚ် အ္စာဝၚ်လ္ၚဵုတံ ဟီုဂးလဝ် နွံရ။
ပ္ဍဲကဵုလိက်သၠပတ် ဥပ္ပန္နသုဓမ္မဝတဳရာဇဝံသဂါထာဝွံ ဍုၚ်သုဝဏ္ဏဘုမ္မိဂှ် ကၟာၚ်ဍုၚ်ထပှ်ထပ်၊ ထ္ၜိုၚ်ထပှ်ထပ်နွံရောၚ် အတိုၚ်မချူခၞံလဝ်ဂှ်ဟေၚ် ဂၠာဲဆဵုညာတ်ကေတ် ပ္ဍဲကဵုတိဍာ်ဍုၚ်မန် လၟုဟ်ဏံရ။ ပ္ဍဲကဵုဒေသကွာန်ဇုက်သော်ဂှ် ကၟာၚ်ဍုၚ်ထပှ်ထပ်၊ ပ္ဍဲကဵုကွာန်ဝၚ်ကကဵု ကွာန်(အရက်သည်မရွာ) ဂှ် ကၟာၚ်ထပှ်ထပ် သှေ်မံၚ်စဵုလၟုဟ်တုဲ ပ္ဍဲကဵုကျာ်ကသာဂှ် ဟိုတ်နူကဵုဍုၚ်လာ်စှေ်အာ သၟဝ်မှာသၟိတ်နွံတုဲ သှေ်မံၚ်မသုန်ထပ်ဏီရောၚ် ဂးရ။