မာံသုတ– ဒပ်ပၞာန်ဗော်သွးကောန်ဂကူကရေၚ် KNU ကဵု ဒပ်ပၞာန်အလဵုအသဳဗၟာတံ ပ္ဍဲဂိတုဂျောန် ၁၃ ကဵု ၁၄ ဂှ် လ္ပာ်ဗၟံက်ပွိုၚ်ဍုၚ်တနၚ်သဳ(ဒေသဗိက်) ကရပ်ပယျဵုသေံ ဒၞာဲဗ္ဒိုပ်မဵုကဖအ်ဂှ် ဒှ်ပေဲါဗ္တိုက် (၂) ဝါတုဲ လ္ပာ် KNU ချိုတ်အာ ၂ တၠဂှ် ညးတာလျိုၚ်မဟာဒပ် (၄) မွဲတၠ လဴထ္ၜးဏာကဵု ဋ္ဌာန်ပရိုၚ်ဗၠးၜးမန် IMNA ရ။

ညးတာလျိုၚ်မဟာဒပ် (၄) KNU ဂှ် “ ဒၞာဲပိုဲဖျေံလဝ်ဒပ်ဂှ် ဍေံတံလုပ်ပန်ဏာရ၊ ဂွံလဝ်ဓဝ်ညဳသာ ဒေါအ်ပန်ပှော်တုဲရတှေ် ဒဒှ်ဗီုဏံကတဵုဒှ်ဟွံမာန်ဏောၚ် ဟွံထေၚ်ခယျလဝ်ရ၊ ကောန်ပၞာန်ပိုဲ ပြဟ်လလုဲအာ (၂) တၠဂှ် လွဟ်ကဵုမကမ်တံ ဗၟာတံသီကေတ်ဏာ” သာ်ဝွံ ဟီုလဴရ။
ပ္ဍဲဂိတုဂျောန် (၁၄) အခိၚ်နူဂယး (၉) နာဍဳဂှ် ကရောၚ်ပၞာန်နူဒပ်ပၞာန်အလဵုအသဳဗၟာ ခမရ-၅၈၂ လုပ်ပန်ဏာ ကောန်ပၞာန်တမ်ဒပ် KNU လၟိဟ် (၁၁) သာ်ဏံဂှ် ညးတာလျိုၚ် KNU ဂးရ။
ပ္ဍဲဂိတုဂျောန် (၁၃)တေံပၠန် ကရောၚ်ပၞန်ဗၟာ ခမရ-၅၇၇ ဆဵုကောန်ပၞာန် KNU (၃)တၠ ကရပ် တမ်ဒပ်မဵုကဖအ်ဂှ် ကတဵုဒှ်ပေဲါဗ္တိုက် ၜိုတ်ပွိုၚ် ၁၀ မဏေတ်တုဲ ကောန်ပၞာန်ဗၟာသဳဂွံ ဇွကောန်ပၞာန် KNU (၁) ၊ လွဟ် M-16 မွဲဇကိုအ်၊ မကမ် ၁၁၀ မ၊ ဖျေဲ ၂ မဂှ် ရဲထံၚ်ပရိုၚ်သေံ နွံဒေသပယျဵုမွဲတၠ ဟီုလဴရ။

ညးက္ဍိုက်ပ်ဒေသစန်ဒက်ခရိုၚ်ဗိက်(ဗော်ဍုၚ်မန်တၟိ) ဒု-သ္ကိုပ်ဗဵုဇၞော် ဟံသာဂှ် “ ဒပ် KNU ကဵု ဒပ်အလဵုအသဳ ကတဵုဒှ်ပေဲါဗ္တိုက် (၂) ဝါဂှ် ဂွံတီကေတ်ရ၊ ဒေါအ်လဝ်ပန်ပှော်ရဂးတုဲ စိုတ်ၜိုဟ်မံၚ်ဟွံဂွံပုဟ်၊ သတိပၠန်ဂတးလ္ပဝိုတ်ညိ” သာ်ဝွံ ဟီုလဴကဵု ဋ္ဌာန်ပရိုၚ်ဗၠးၜးမန် IMNA ရ။

တုပ်ကဵုသာ်ဏံကီု ဂိတုဂျုလိုၚ် သၞာံအာတုဲကၠုၚ်တေံဂှ်လေဝ် ပ္ဍဲကရပ်ပယျဵုသေံ-ဗၟာ ဒၞာဲဗော်ဍုၚ်မန်တၟိဖျေံလဝ်ဗ္ဒိုပ်ခရိုၚ်ဗိက်တေံဂှ် ဒပ်ပၞာန်အလဵုအသဳဗၟာဟိုတ်နူလုပ်ပန်ဟလိပ်ဏာတုဲ ကောန်ပၞာန်မန်(ဗော်ဍုၚ်မန်တၟိ) (၂) တၠစုတိအာ ပရူဒဒှ်သီကေတ်ဏာသီုလွဟ်တံဂှ်လေဝ် ဌာန်ပရိုၚ်မဳဒဳယာတံ ထမံက်ပတိတ်လဝ်နွံရ။

အပ္ဍဲတွဵုရးသေံ(ယျှာန်)တေံ ဗော်တဴတက်သေံ (SSPP) ကီု၊ ဗော်ကလေၚ်ဒက်ပ္တန်ဍုၚ်သေံ (RCSS) တံကီု ဂကောံရပ်လွဟ်ကောန်ဍုၚ်အရၚ်ကဵု အလဵုအသဳဗၟာတံ နကဵုကဆံၚ်တွဵုရး၊ ကဆံၚ်ကၟိန်ဍုၚ် ၜိုန်ရကေတ်လဝ်ဓဝ်ညဳသာ ထပက်လဝ်စၟတ်တဲဒေါအ်ပန်ပှော်ကီုလေဝ် ပေါဲဗတိုက်ကတဵုဒှ်ကၠုၚ်လဝ် ၁၀၀ အလန်ပြၚ်အာယျရောၚ်ဂှ် ဌာန်ပရိုၚ်မဳဒဳယာဂမၠိုၚ် ချူထ္ၜးလဝ်ရ။