အေမဳအံၚ် -သွက်ဂွံသိုၚ်ခၞံ သ္ၚိကၠတ်ထဝ်တွဵုရးဍုၚ်မန် ပ္ဍဲဍုၚ်မတ်မလီုဂှ် ရန်လဝ်ကရပ်ဥဒျာန်တာန်လောန် ဒၞာဲသုသာန်ကြုက်တြေံရ သာ်ဝွံညးစၞးကၠတ်ထဝ်တွဵုရး ဒံက်တာအံၚ်နာၚ်ဥူ ဟီုလဴကဵု ဌာန်ပရိုၚ်ဗၠးၜးမန် (IMNA) ရ။

ဒံက်တာအံၚ်နာၚ်ဥူဂှ် “ဂိတုဂျူလာၚ် သတ္တဟပထမတှေ် ဖျေံပၞက်သေဝ်ဏောၚ်၊ အပ္ဍဲပွိုၚ် ၂ သၞာံ သွက်ဂွံသိုၚ်တုဲဒှ်အာဂှ် ဂွံလဝ်တုပ်စိုတ်ကဵု ကါမ္ပဏဳတုဲရ” သာ်ဝွံ ညးဟီုရ။

တုပ်လဝ်စိုတ် ကဵုကါမ္ပဏဳ TRINE TOP သွက်ဂွံသိုၚ်ခၞံအာ တိုက်ပိထပ် ဇမၠိၚ် ၂၀၀ ပေ၊ အနာမ် ၈၀ ပေ အပ္ဍဲကဵုဗွိုၚ်တိ ၂ ဒဿမ ၈၀ ဧကဂှ် ရန်လဝ်ၚုဟ်မးၜိုတ် ၁ လက်ကိုဋ် ဒကေဝ်ကီုလေဝ် ဟိုတ်နူသြန် သြန်လၟေၚ်သၞာံ Budget ဟွံရုမ်ဂပ်တုဲ ပြဟ်ဟ်ဏံ စပ္တံသိုၚ်ခၞံအာ ၝောံခန်ကၠတ်ထဝ်ဇမၠိၚ် ၁၀၀ ပေ အနာမ် ၈၀ ပေမွဲမကၠာ သာ်ဝွံ ညးဆက်ဟီုရ။

တုဲပၠန် သွက်ဂွံထပ်သိုၚ်ခၞံအာ ဂၠံၚ်ဍာန်၊ ဗ္ဒမ်ဇူဒီု၊ သၞေဟ်ကၚ်ပရေၚ်ဂီုကၠီု ကဵု ကၟာၚ်ဒပ်တံမာန်ဂှ် စိုပ်ကဝက်သၞာံဏံမ္ဂး သွက်ဂွံထပ်အာတ်မိက်သြန်ၜိုတ် ၆ လ္ၚီကိုဋ်ဒကေဝ်ပၠန်ဂှ်လေဝ် ဂွံတီနူညးစၞးကၠတ်ထဝ်တွဵုရးမန်တံရ။
သၟာကၞေဟ်လိက်ပရေၚ် တာန်လောန်အေဂှ် “ ကၠတ်ထဝ်မန်ဟီုတှေ် နကဵုညးဍုၚ်ကွာန်နွံမံၚ်အပ္ဍဲတွဵုရးဍုၚ်မန်တံမာန်ဂှ်တှေ် သွက်ဂွံကေတ်ဂုဏ်စရာဲ မိက်ဂွံကဵုသိုၚ်ခၞံ ဗီုပြၚ်ကွတ်တဲအခိုက်ကၞာမန်ပိုဲရ” သာ်ဝွံ ညးဟီုကဵုဌာန်ပရိုၚ်ဗၠးၜးမန် IMNA ရ။

သ္ၚိကၠတ်ထဝ်ဟီုဂှ် ဒှ်ဒၞာဲညးဍုၚ်ကွာန်တံ ဆဵုဂဗသဳကၠဳကီု တၚ်နွံပၟိက် ကေုာံတၚ်အာတ်မိက်ညးဍုၚ်ကွာန်တံဒှ်တုဲ တုပ်တဴညံၚ်ရဴဗီုပြၚ်ရဲဍုၚ်သၟာၚ်တံကီု ဒၞဲါသွက်ညးဍုၚ်ကွာန်တံ ဂွံပံက်ထ္ၜးဆန္ဒမာန်ဂှ် ဒၞဲါတၞဟ်ခြာမွဲလေဝ် ထေက်ကဵုဒးစွံအာကီုရ သာ်ဏံ ညးဆက်ဟီုရ။

ရုၚ်ကၠတ်ထဝ်တွဵုရးဍုၚ်မန်လၟုဟ်ဏံဂှ် နွံဒၟံၚ်လက်ကြဴရုၚ်အလဵုအသဳတွဵုရးမန် ဒၞာဲၝောံခန်ဒုၚ်ကၟုဲရောၚ် ဂွံတီရ။