ကမ္ပတဳဓမံက်ရုပ်ရဴ ပရေၚ်ၜိုဟ်လလံကၟိန်ဍုၚ် UPWC ကဵု ဂကောံပညဳပညပ်ဒေံါပန် ပှော်အလုံဍုၚ် NCCT တံ ဆဵုဂဗအလန် ၆ ဝါ ပ္ဍဲဂိတုဏံစနူစၟတ်တ္ၚဲ ၂၂ ကၠောန်ကၠုၚ်ပေဲါသဳကၠဳဂှ် တၚ်ဟွံပြေပြံၚ်နွံဗွဲမဂၠိုၚ်ရောၚ် က္ဍိုပ်ဂကောံ NCCT နာဲဟံသာ ဟီုရ။

“တ္ၚဲပထမဂှ် တၚ်တုပ်စိုတ် မွဲသာ်ဟွံဂွံပုဟ်၊ ပတိုန်ထ္ၜးလဝ် ဗီုပိုဲတံရန်တၟံလဝ် ဒေံါပန်ပှော်တုဲ ဂကောံထိၚ်ဒဝ်ဆေၚ်စပ်ကဵုစေဝ်ပၞောန်ဒပ် Code of Conduct တံ၊ ဒေံါပန်ပှော်တုဲ ပံၚ်တောဲမၚ်ရံၚ်ကျောဝ် Jion Monitoring တံ ဗီုလဵုဂွံဒက်ပ္တန်အာရောဟီုဂှ် ညးစၞးအလဵုအသဳတံ ထပက်စၟတ်တဲဒေံါပန်ပှော်တုဲမှ သဳကၠဳအာရောၚ်ဂးရ” သာ်ဏံ နာဲဟံသာဟီုရ။

ပ္ဍဲသေပ်တေန်ပါ ၂၃ သဳကၠဳတ္ၚဲဒုတိယဂှ်ပၠန်လေဝ် နူကဵုဂကောံ UPWC ပတိုန်ထ္ၜးလဝ် ကၠောန်သ္ပကောံဓရီုဇၞော် ပရေၚ်ၜိုဟ်လလံကၟိန်ဍုၚ်တုဲ ဂွံနၚ်တၚ်တုပ်စိုတ်တံဂှ် ဒးပတိုန်ထ္ၜးကဵုကၠတ်ထဝ်ကၟိန်ဍုၚ်ဏောၚ်ဟီုဂှ် NCCT ဟွံဒုၚ်တဲဟွံမာန် နာဲဟံသာ လဴရ။

နကဵု NCCT ပၠောပ်လဝ်ဂလာန် ပရေၚ်ဒက်ပ္တန်ဒပ်ကၟိန်ဍုၚ်ဂှ် လပါ်က္ဍိုပ်သ္ကိုပ်ဒပ်ပၞာန်အလဵုအသဳတံ တးပဲါထောံတုဲ အခိၚ်သဝ်တ္ၚဲ ၃ နာဍဳ ကဝက်ဂှ် ဒးဒေံါဇူထောံပေါဲသဳကၠဳရ သာ်ဝွံ ဂွံတီကေတ် နူ MPC ရ။

ပ္ဍဲဂကောံ UPWC ဂှ် ဒုဥက္ကဌ ဥူအုၚ်မေန် (ဝန်ဇၞော်ကၟိန်ဍုၚ်)၊ ဒု ဥက္ကဌ ဥူတိၚ်ဇြဝ်(ကၠတ်ထဝ်ညးဍုၚ်ကွာန်)၊ ညးမဒှ် ကောန်ဂကောံတံဂှ် ဒုသ္ကိုပ်ပၞာန်ဇၞော် တိတ်နာၚ်ဝေန်၊ ဥူဃေန်ယဳ၊ ဥူတာန်ဌေ၊ ဒုသ္ကိုပ်ပၞာန်ဇၞော် မျေအ်သဵု၊ ဒုသ္ကိုပ်ပၞာန်ဇၞော် ဃေန်ဇြဝ်ဥူ၊ ဒုသ္ကိုပ်ပၞာန်ဇၞော် ယျေဝ်အုၚ်(သ္ကိုပ်ဥပဒေပၞာန်)၊ ဥူထောန်ထောန်ဥူ၊ သ္ကိုပ်ဗိုလ်ဇၞော် ကျဝ်သဵုဝေန်၊ ဥူသဝ်ထောန်မျအံၚ် (ကၠတ်ထဝ်ကောန်ဂကူ)၊ မိယေန် ဆာန် (ကၠတ်ထဝ်ညးဍုၚ်ကွာန်) တံ ၁၄ တၠ တိုန်စိုပ်ရ။

မွဲလ္ပာ်ပၠန် ညးစၞးဂကောံ NCCT ဂှ် က္ဍိုပ်ဂကောံ နာဲဟံသာ NMSP၊ ပဒဵုသဝ်ကွဲထူဝေန် KNU၊ သ္ကိုပ်ပၞာန် ဂွန်မဝ် KIO၊ ဒံက်တာ သလိုၚ် လျာန် မှုန်ဆာခေါၚ် CNF၊ ဒဝ်သဝ်မျရာဇာလေန် ALP၊ သ္ကိုပ်ဗိုလ်ဇၞော် ခေါန်ဥက္ကာ PNLO၊ ခူတဝ်ယေဝ်(အက်စ်)KNPP၊ ဥူထောန်ဇြဝ် ANC၊ တာအိုက်ညောအ် WNO၊ သိုၚ်ဘထောန် SSPP၊ ဒုသ္ကိုပ်ဗိုလ်ဇၞော် ကျဝ်ဟာန် AA၊ သ္ကိုပ်ဗိုလ် သဝ်လုၚ်ၚ် DKBA၊ သ္ကိုပ်ဗိုလ် တားဝရ်ခြိုဝ် PSLT/TNLA၊ သ္ကိုပ်ဗိုလ်ဇၞော် သဝ်လမန် LDU ၁၄ တံ ပါလုပ်ရ။

နူဂိတုသေပ်တေန်ပါ ၂၂ စိုပ် ၂၆ ပွိုၚ် ၅ တ္ၚဲ ကၠောန်သ္ပပေဲါသဳကၠဳ ဒၞာဲဌာန်ဗဟဵု ကလေၚ်ဒက်ပတန် ပရေၚ်ၜိုဟ်လလံကၟိန်ဍုၚ်ဗမာ Myanmar Peace Center မၞုံပ္ဍဲဍုၚ်လ္ဂုၚ်ရ သာ်ဝွံဂွံတီကေတ် နူ MPC ရ။