ကောံဓရီုကၠတ်ထဝ်တွဵုရးဍုၚ်မန် အလန်ပထမ ကောံဓရီုလၟေၚ်နဝမ တ္ၚဲဒုတိယ (၈ – ၉ -၂၀၁၄) ဂှ် ညးစၞးကၠတ်ထဝ် နူကဵုပွိုၚ်ဍုၚ်ကျာ်ထဝ် ဥူသုၚ်မျေအ် ပတိုန်ဂလာန် ဗတိုက်ဖအောဝ် “သၞောဝ်ဥပဒေသ္ပဒတန်လဝ် အပ္ဍဲတွဵုရးဍုၚ်မန်တံ ပရေၚ်ဓမံက်ရုပ်ရဴ ဇြဟတ်ဂွံခိုဟ်တိုန်မာန်” ဂှ် ညးစၞးကၠတ်ထဝ်တံ ထပ်သဳကၠဳတုဲ နူကဵုကၠတ်ထဝ်ဂှ် သ္ပစၟတ်သမ္တီ ဂလာန်ပတိုန်လဝ်ဂှ်ရောၚ် ဂွံတီကေတ်ရ။
“သၞောဝ်သ္ပဒတန်လဝ် အပ္ဍဲတွဵုရးဍုၚ်မန်တအ်ဂှ် ညးဍုၚ်ကွာန်တအ် ဂွံတီလဝ်အောန်မံၚ်ဏီကီု ဌာန(အလဵုအသဳ) မဆေၚ်စပ်တအ်လေဝ် လပါ်ဓမံက်ရုပ်ရဴ ဍိုန်လျမံၚ်ဏီရ” သာ်ဝွံ ညးစၞးကၠတ်ထဝ်ပွိုၚ်ဍုၚ်ကျာ်ထဝ် ဆန္ဒမာဲလၟိဟ် (၂) ဥူသုၚ်မျေအ် ဟီုဂးဏာ ပ္ဍဲကၠတ်ထဝ်ဂှ်ရ။
စပ်ကဵုဂလာန်ဥူသုၚ်မျေအ်ပတိုန်လဝ်ဂှ်တုဲ ညးစၞးကၠတ်ထဝ် နူပွိုၚ်ဍုၚ်ပံၚ် ဥူမိုၚ်လာန်၊ နူပွိုၚ်ဍုၚ်မုဟ်ဍုၚ် ဒံက်တာမာံနဲသဵု၊ နူပွိုၚ်ဍုၚ်သဓီု ဥူတုၚ်ဇြဝ်၊ နူပွိုၚ်ဍုၚ်ၜါသွာၚ် နာဲအံၚ်နာၚ်ဥူ ကေုာံ နူပွိုၚ်ဍုၚ်မတ်မလီု ဒံက်တာတိုဝ်ဝ်အံၚ်တံ သဳကၠဳဏာလဝ်တုဲ နူကဵုကၠတ်ထဝ်တွဵုရးမန်ဂှ် သ္ပစၟတ်သမ္တီအာရောၚ် ဥက္ကဋ္ဌကၠတ်ထဝ် တွဵုရးမန် ဥူကျေန်ဖေ လလောၚ်တြးဏာ အပ္ဍဲကောံဓရီုကၠတ်ထဝ် တ္ၚဲတတိယ (၉ – ၉ -၂၀၁၄) ဂှ်ရ။
အမာတ်မန် နာဲအံၚ်နာၚ်ဥူ နူကဵုပွိုၚ်ဍုၚ်ၜါသွာၚ်ဂှ် “မွဲဒမြိပ်ဇၟောဝ်ဍာ် ပရေၚ်ဍုၚ်ကွာန်ဂှ် ပိုဲအာတ်မိက်ကၠုၚ်လဝ် အ ခေါၚ်ကံကုသဵုဇကု ဇကုဂွံဖန်ဖက်ကေတ်တ်မာန် အၚ်္ဂလက်သန်မွဲ ပါလုပ်ကၠုၚ်ရ၊ ဒက်ပတန်လဝ်ကၟိန်ဍုၚ် နကဵု တွဵုရး၊ ရးဒေသဇၞော်တအ်တုဲ ကၟိန်ဍုၚ်ဂှ် နကဵုလက်သန်ဖေဝ်ဒရေဝ် အခေါၚ်ခၞံပတိုန်သၞောဝ်ဥပဒေ ကေုာံ ပရေၚ်ပါ် ပရအ်အဝဵုအာဏာတံဂှ် ကဵုလဝ်အခေါၚ် ဗၞတ်ထေက်ကြိုက်ကီုရ” သာ်ဝွံ ညးဟီုဂး သဳကၠဳလဝ်ကီုရ။
ဌာနအလဵုအသဳ မဆေၚ်စပ်တံဝွံ ကေၚ်ကၠောန်ကၠုၚ်လဝ် သၟဝ်တဲအလဵုသဳပၞာန် (၅၀) သၞာံပြၚ်ၚ်တုဲ လတေၚ်ချိုတ် မံၚ်ကဵု သၞောဝ်တြေံတြဟ်တေံဏီရ။ သၞောဝ်ဥပဒေတွဵုရးမန်တံဂှ် ဒးမံၚ်ဃယံက်သၞောဝ်ဥပဒေကၟိန်ဍုၚ်တံတုဲ လမျီုဟွံလုပ် ဟွံဒှ်စကာဂှ်ရ သၞောဝ်တိက်သၠိၚ်မံၚ် အပ္ဍဲကဵုဒေသဇကုရောၚ် ညးစၞးကၠတ်ထဝ်တံ ပါ်ပဲါလဝ်ကီုရ။
ကၠတ်ထဝ်တွဵုရးမန်ဂှ် နူကဵုသက္ကရာဇ် (၂၀၁၁) သၞာံ၊ ဂိတုဂျာန္နဝါရဳ (၃၁) ဂှ် စပတံဒက်တန်ကၠုၚ်လဝ်တုဲ အာယုက် ကၠတ်ထဝ် (၃) သၞာံပြၚ်ဂှ် ဥပဒေမူအပြောံ (၂၅) စံၚ် ချူခၞံကၠုၚ်လဝ်ရ။ အပ္ဍဲကဵုကောံဓရီုကၠတ်ထဝ်လၟေၚ်နဝမ ဏအ် ကလေၚ်သ္ပဒတန်လဝ် ဥပဒေအပြောံ (၃) စံၚ်ပၠန်တုဲ ဒှ်အာ (၂၈) စံၚ်ရောၚ် ဂွံတီကေတ်ရ။
0 Comments