ဌာန်ပရိုၚ်ဗၠးၜးမန် – ကွဳစက် ဖ္ဍိုက်ရဲအာတရဴဂမၠိုၚ် မဂြိပ်ဒၟံၚ် နူလ္ဂုၚ်ကဵုဓဝါဲဂှ် စၟတ်တ္ၚဲ သေပ်တေမ်ဗာ ၁၅ ပယာံသ္ဂာဗ္တံလောန် စိုပ်ညောန်ကဵု ကွာန်သၞေဟ်ဇုက်၊ ပွိုၚ်ဍုၚ်ရေ

ဝ် (ဂၠံၚ်ကွဳစက် မတ်မလီု ကဵု ရေဝ် ဒၞါဲ တိုၚ်မာၚ် ၈၂/၆) ဂှ် ဒမၠဗ္တိုက် ဒးအာဘဲဝပ် ၂ တလ သာ်ဝွံ ဒပ်ဗၠာဲသၟိၚ်ကေုာံ ညးတာလျိုၚ် လာၚ်ကွဳစက် နူလ္ဂုၚ်ကဵုဓဝါဲ လဴတုဲ ဂွံတီကေတ်ရ။

လဟီု ညးတာလျိုၚ်မွဲတလ နူလာၚ်ကွဳစက် (လ္ဂုၚ်ကဵုဓဝါဲ) မွဲလာၚ်ဂှ်မ္ဂး “နူကဵုသ္ကဲဂၠံၚ် ဖံက်လွဟ် ၂ တဲတုဲ ပဒိုအ်ကွဳစက်ပိုဲ၊ပိုဲဟွံမိၚ်တုဲ ဂုန်နူဟွံဒိုအ်ဂှ်ရ မၞိဟ်မွဲတလ တိတ်ကၠုၚ်လ္တူဂၠံၚ်တုဲ ထပ်ပန် ပဒိုအ်ကွဳစက် ပၠန်ရ။ ရဲအာတရဴဖ်အိုတ် ကဵုစှေ်နူကွဳစက်တုဲ ကဵုမိုပ်မံၚ် ပ္ဍဲသ္ကဲဂၠံၚ်ရ။ ပိုဲဟွံကေတ်ထဝ်ပုဟ်၊ သြန်ၜိုတ်ပါဂှ် ပ္တိတ်ကဵုဖ်အိုတ် ဍေံကညာၚ်ဟီုသာ်ဏံ” ဂးတဴရ။

အယျၚ် ကျိုၚ်လဝ်ကယိုၚ်ကၞၚ်ကၠ မွဲတလဂှ် ဗက်ပန်ကဵုလွဟ်တုဲ ကွဳစက် နူလာၚ် ယှိုဲပလေဝ်တဳဂှ် ၁ မ၊ နူလာၚ် အာန်တဳဝေန်ဂှ် ၁ မ၊ နူလာၚ် အံၚ်ရတနာဂှ် ၂ မ၊ နူလာၚ် ကံၚ်တေတ်ဇြာန်ဂှ် ၁ မ၊ နူလာၚ် ဠက်ကဳသတာဂှ် ၁ မ၊ နူလာၚ် ယှိုဲမျေအ်မဵုဂှ် ၁ မ၊ ကွဳစက် ထပှ်မဏံ ဒးလွဟ်တုဲ လီုလာ်ယောၚ်ယာအာ နွံ ဂွံတီကေတ်ရ။

ကရောံဂှ် တိၚ်ထောန်အံၚ် မၞိဟ်ဗက်ဍုတ်ကွဳစက် ယှိုဲပလေဝ်တဳဂှ် ဒးလွဟ်ပ္ဍဲဒဳပုၚ် မကံဟွံကၠိုဟ်၊ မေန်မေန် (ကော်) နှုက်ခါန်မွေ မၞိဟ်ဒဳကွဳစက် ဠက်ကဳသတာဂှ် ဒးအာလွဟ် နူသၟဝ်ကၞေၚ်မတ်ပါဲ လိုက်ဒဵုကဵု က္တောဝ်ပါဲတုဲ၊ နူကဵု ရဲအာတရဴတံကီု၊ နူကဵုမၞိဟ်ဒဳကွဳစက်တံကီု ဒမၠ ဂွံဏာသြန် ၜိုတ် ၆ ကိုဋ်ရ။

သၞာဲဒဴ ဗၠာဲသၟိၚ်မွဲတလ နူဗ္ဒိုပ်ဗၠာဲသၟိၚ်လၟိုၚ်ဂှ်လေဝ် “ကွဳစက် ဒးဒုၚ်ပန် ရ မ၊ဒရာဲဗာမွဲ၊သပေဝ်ယျာမွဲ ဒးဝပ်တုဲ၊ ဒရာဲဗာဂှ် ဒးပ္တိုန်စွံလဝ် ပ္ဍဲရုၚ်ဂဥုဲ” ဂးရ။

စပ်ကဵုဒဒှ်ဏံတုဲ ဥုခေန်အံၚ် တၠကွဳစက် ဠက်ကဳသတာဂှ် သ္ပမၞိ်ဟ်စောဲအမှု အာတေၚ်လဝ်ကဵု ရုၚ်ဗၠာဲသၟိၚ် ဍုၚ်လၟိုၚ်တုဲ၊ နကဵု ပိုဒ်ဒုဟ်-၃၉၄- ပံက်အမှု ဂၠိုက်ဂၠာဲမံၚ်ဖိုဟ်တုဲ နူကဵု ဒပ်ဒေသဂှ် တံလေဝ် ဂြးဂၠာဲမံၚ်ကီု ဂွံတီရ။

ကွာန်သၞေဟ်ဇုက်ဝွံ လုပ်အဝေါၚ် ပွိုၚ်ဗ္ဒိုပ်ဗၠာဲသၟိၚ် ဍုၚ်လၟိုၚ်တုဲ၊ ကၠာတေံ ဒှ်ကၠုၚ်ဗ္ဒိုပ်သၞေဟ်ကၚ် ကရေၚ်ဖျေံလွဟ် မွဲက္ဍိုပ် မဗက်မံၚ်အကံက်ကွဳစက်ကီု သာ်ဝွံ ဂွံတီလဝ် နူရဲဒဳကွဳစက်တံကီုရ။